போர் நிறுத்தத்தில் அமெரிக்காவின் பங்கு இல்லை.. அணுகுண்டை எடுக்கவும் இல்லை - வெளியுறவு செயலாளர் தகவல்

Updated: Monday, May 19, 2025, 20:56 [IST]

Subscribe to Oneindia Tamil

டெல்லி: இந்தியா-பாகிஸ்தான் இடையே போர் நிறுத்தத்திற்கு காரணம் அமெரிக்காதான் என்று பேசப்பட்டு வந்த நிலையில், இதில் அமெரிக்காவுக்கு எந்த பங்கும் இல்லை என்று வெளியுறவு செயலாளர் விக்ரம் மிஸ்ரி கூறியுள்ளார்.

இரு நாடுகளுக்கு இடையில் சண்டை ஏற்பட்டபோது, போர் நிறுத்தம் குறித்து அமெரிக்க அதிபர் டிரம்ப் அறிவித்திருந்தார். இந்தியா போர் நிறுத்தத்தை அறிவிக்காமல் டிரம்ப் அறிவித்தது ஏன்? இந்திய பிரதமரை விட அமெரிக்க அதிபர் அதிகாரம் கொண்டவரா? என்றெல்லாம் எதிர்க்கட்சி தலைவர்கள் கேள்வி எழுப்பியிருந்தனர்.

இந்நிலையில், போர் நிறுத்தத்தில் டிரம்ப்பின் பங்கு எதுவும் இல்லை என்று வெளியுறவு செயலாளர் விக்ரம் மிஸ்ரி கூறியுள்ளார். அதே நேரம், பாகிஸ்தான் தரப்பிலிருந்து அணு ஆயுத அச்சுறுத்தல் எதுவும் இல்லை என்றும் மிஸ்ரி கூறியுள்ளார். இதனை சிஎன்என்-நியூஸ்18 செய்தி ஊடகம் உறுதி செய்துள்ளது. இது வழக்கமான சண்டைதான். ஆனால், அமெரிக்கா கூறுவதை போல அணு ஆயுத தாக்குதலுக்கான எந்த அறிகுறியும் தெரியவில்லை எனவும் கூறியுள்ளார்.

பாகிஸ்தானின் இராணுவ நடவடிக்கைகளுக்கான இயக்குநர் ஜெனரல், இந்தியாவின் ராணுவ தளபதியை தொடர்பு கொண்டு போர்நிறுத்த வேண்டுகோள் விடுத்ததாகவும் மிஸ்ரி கூறியுள்ளார்.

பஹல்காம் தாக்குதலை தொடர்ந்து, இந்தியா ஆபரேஷன் சிந்தூர் எனும் ராணுவ நடவடிக்கையை மேற்கொண்டது. இதில் ஜெய்ஷ் இ முகமது எனும் தீவிரவாத அமைப்பை சேர்ந்த சுமார் 100க்கும் அதிகமானவர்கள் கொல்லப்பட்டார்கள் என்று இந்தியா கூறியிருந்தது. இந்த ஆபரேஷன் இரு நாடுகளுக்கு இடையே மோதலை தூண்டியது. இந்த மோதலை நான்தான் தலையிட்டு நிறுத்தியதாகவும், இல்லையெனில் அணு ஆயுத போர் வெடித்திருக்கும் எனவும் டிரம்ப் பல இடங்களில் கூறி வருகிறார்.

போர் நிறுத்தம் குறித்து தனது சோஷியல் மீடியாவில் அவர் கூறியிருந்ததாவது, "போர் நிறுத்தத்திற்காக இரவு நீண்ட நேரம் பேச்சுவார்த்தையில் அமெரிக்கா ஈடுபட்டிருந்தது. இதனால் இந்தியாவும், பாகிஸ்தானும் முழுமையான மற்றும் உடனடி போர் நிறுத்தத்திற்கு ஒப்புக்கொண்டதை அறிவிப்பதில் மகிழ்ச்சி அடைகிறேன். போர் நிறுத்தத்திற்காக புத்திசாலித்தனமாக செயல்பட்ட இரு நாடுகளுக்கும் வாழ்த்துக்கள்" என்றும் கூறியிருந்தார். இது இந்தியாவில் எதிர்க்கட்சிகளிடையே கடுமையான விமர்சனங்களை ஏற்படுத்தியிருந்தது.

ஆனால் கடந்த வாரமே, அமெரிக்காவின் தலையீடு போர் நிறுத்தத்தில் இல்லை என்று இந்திய வெளியுறவுத்துறை அமைச்சகம் தெளிவுப்படுத்தியிருந்தது. இதனை தொடர்ந்து மிஸ்ராவும் அதையே கூறியுள்ளார் என்பது குறிப்பிடத்தக்கது.