ஈரான் போருக்கும்.. LPG சிலிண்டருக்கும் என்ன தொடர்பு? எப்படி தட்டுப்பாடு வந்தது? சிக்கலின் ஆதி புள்ளி

டெல்லி: ஈரான் - இஸ்ரேல் மோதல் முற்றிய நிலையில், உலக வர்த்தகத்தின் இதயத் துடிப்பாகக் கருதப்படும் 'ஹார்முஸ் ஜலசந்தி' வழியாகக் கப்பல்கள் செல்வதில் சிக்கல் ஏற்பட்டுள்ளது. "ஈரானுக்கும் நமக்கும் கொஞ்சம் நல்ல உறவுதானே... பின் ஏன் காஸ் தட்டுப்பாடு?" என்று நீங்கள் கேட்கலாம். விஷயம் ஈரான் எண்ணெய் மட்டுமல்ல, அந்தப் பாதைதான்!

மத்திய கிழக்கு நாடுகளின் போர் பதற்றத்தால் ஹார்முஸ் ஜலசந்தி முடங்கியுள்ள நிலையில், இந்தியாவின் முக்கிய நகரங்களில் எல்.பி.ஜி (LPG) தட்டுப்பாடு விஸ்வரூபம் எடுத்துள்ளது. இந்தியா தனது சமையல் எரிவாயு தேவையில் சுமார் 60% முதல் 80% வரை கத்தார் மற்றும் சவுதி அரேபியா போன்ற நாடுகளிலிருந்து இறக்குமதி செய்வதால், இந்த கடல்வழிப் பாதை அடைப்பு நேரடிப் பாதிப்பை ஏற்படுத்தியுள்ளது.

குறிப்பாக சென்னை, மும்பை மற்றும் டெல்லி போன்ற பெருநகரங்களில் வணிக ரீதியான சிலிண்டர்களுக்கு (Commercial Cylinders) கடும் தட்டுப்பாடு நிலவுகிறது; இதனால் உணவகங்கள் மற்றும் சிறு தொழில்கள் முடங்கும் அபாயம் ஏற்பட்டுள்ளது. வீட்டு உபயோக சிலிண்டர்களுக்கு அரசு முன்னுரிமை அளித்தாலும், விநியோகச் சங்கிலியில் ஏற்பட்டுள்ள இந்தத் தடையால் சிலிண்டர் முன்பதிவு செய்த பிறகு வீட்டிற்கு வந்து சேர எடுக்கும் கால அவகாசம் கணிசமாக அதிகரித்துள்ளது, இது பொதுமக்களிடையே பெரும் கவலையை ஏற்படுத்தியுள்ளது.

LPG என்றால் என்ன?

LPG (Liquefied Petroleum Gas) என்பது நாம் சமையலுக்குப் பயன்படுத்தும் திரவமாக்கப்பட்ட பெட்ரோலிய வாயு. இது ஒரு தனி எரிபொருள் அல்ல; இது ஹைட்ரோகார்பன் வாயுக்களான புரோப்பேன் (Propane) மற்றும் பியூட்டேன் (Butane) ஆகியவற்றின் கலவை. இதற்கெனத் தனியாக மணம் கிடையாது என்பதால், கசிவைக் கண்டறிய 'மெர்காப்டன்' (Mercaptan) எனும் வேதிப்பொருள் சேர்க்கப்படுகிறது.

எப்படித் தயாராகிறது இந்த 'நீலச் சுவாலை'?

எல்.பி.ஜி என்பது காற்றில் இருந்து பிடிக்கப்படுவதில்லை. இது இரண்டு வழிகளில் கிடைக்கிறது:

இயற்கை எரிவாயு எடுக்கும்போது: பூமிக்கு அடியில் இருந்து இயற்கை எரிவாயுவைத் தோண்டி எடுக்கும்போது, அதனுடன் கலந்து வரும் புரோப்பேன் மற்றும் பியூட்டேன் வாயுக்கள் தனியாகப் பிரித்தெடுக்கப்படுகின்றன. (இது சுமார் 60% பங்கு வகிக்கிறது).

கச்சா எண்ணெய் சுத்திகரிப்பு: பெட்ரோல், டீசல் எடுப்பதற்காக கச்சா எண்ணெயைச் சுத்திகரிப்பு நிலையங்களில் (Refineries) காய்ச்சும்போது, ஒரு உப-பொருளாக (By-product) இந்த வாயுக்கள் கிடைக்கின்றன. (இது சுமார் 40% பங்கு).

இந்தியாவுக்கும் ஹார்முஸ் ஜலசந்திக்கும் என்ன தொடர்பு?

இங்குதான் சிக்கலே ஆரம்பிக்கிறது. இந்தியா தனது எல்.பி.ஜி தேவையில் 60% முதல் 80% வரை இறக்குமதியைத்தான் நம்பியுள்ளது. நாம் வாங்கும் இந்த காஸில் பெரும்பகுதி சவுதி அரேபியா, கத்தார், ஐக்கிய அரபு அமீரகம் மற்றும் குவைத் ஆகிய நாடுகளிலிருந்து வருகிறது.

இந்தப் பாரசீக வளைகுடா நாடுகளிலிருந்து கிளம்பும் எந்தவொரு கப்பலும், ஹார்முஸ் ஜலசந்தி எனும் குறுகிய கடல் பாதை வழியாகத்தான் அரபிக்கடலுக்குள் நுழைய முடியும்.

பகீர் பின்னணி: இந்தியா இறக்குமதி செய்யும் எல்.பி.ஜி-யில் சுமார் 90% இந்தப் பாதை வழியாகத்தான் வருகிறது. தற்போது நிலவும் போர் பதற்றத்தால், ஈரானிய புரட்சிகர காவல்படை இந்தப் பாதையைக் கட்டுப்படுத்துவதால் அல்லது கப்பல் காப்பீட்டு நிறுவனங்கள் அங்கு செல்ல மறுப்பதால், இந்தியா வர வேண்டிய 'கேஸ் கப்பல்கள்' நடுக்கடலில் தவிக்கின்றன.

தட்டுப்பாட்டின் தற்போதைய நிலை என்ன?

தற்போது இந்தியாவின் முக்கிய நகரங்களான சென்னை, மும்பை மற்றும் பெங்களூருவில் வர்த்தக ரீதியான சிலிண்டர்களுக்கு (Commercial Cylinders) கடும் தட்டுப்பாடு நிலவுகிறது. ஹோட்டல்கள் மற்றும் உணவகங்கள் தங்களது சேவையைக் குறைக்க வேண்டிய நிலைக்குத் தள்ளப்பட்டுள்ளன. வீட்டு உபயோக சிலிண்டர்களுக்கு அரசு முன்னுரிமை அளித்து வருவதால், தற்போதைக்கு வீடுகளில் பெரிய பாதிப்பு இல்லை என்றாலும், இந்தப் பதற்றம் நீடித்தால் சமையலறை பட்ஜெட் எகிற வாய்ப்புள்ளது.

அரசாங்கம் தற்போது ரஷ்யா மற்றும் அமெரிக்காவிலிருந்து மாற்றுப் பாதைகள் வழியாக எல்.பி.ஜி-யைக் கொண்டு வரவும், உள்நாட்டு சுத்திகரிப்பு நிலையங்களில் உற்பத்தியை அதிகரிக்கவும் தீவிர முயற்சிகளை மேற்கொண்டு வருகிறது.

English summary

India LPG crisis 2026: What is the connection between Iran war and gas cylinders?