5ம் தலைமுறை போர் விமானம்.. லட்டு மாதிரி ஆஃபர் கொடுத்த ரஷ்யா! இந்தியா இன்னும் யோசிக்குதே!

டெல்லி: இந்தியாவிடம் 5ம் தலைமுறை போர் விமானம் கிடையாது. ஆனால், சீனாவிடம் இருக்கிறது. அதேபோல சீனாவிடமிருந்து விரைவில் பாகிஸ்தானும் 5ம் தலைமுறை போர் விமானங்களை வாங்கிவிடும். இப்படி இருக்கையில் இந்தியாவுக்கு 5ம் தலைமுறை போர் விமானங்களையும், அதன் தொழில்நுட்பங்களையும் தர ரஷ்யா முன் வந்திருக்கிறது. இருப்பினும் இந்த விஷயத்தில் இன்னும் இந்தியா எந்த முடிவையும் அறிவிக்காமல் இருப்பது பல்வேறு சந்தேகங்களை கிளப்பியிருக்கிறது.

இந்தியாவிடம் இருப்பதில் மிகவும் சக்தி வாய்ந்த போர் விமானம் ரஃபேல்தான். இது 4.5ம் தலைமுறை விமானமாகும். 5ம் தலைமுறை விமானங்கள் இதை விட மேம்பட்டு இருக்கும். குறிப்பாக 5ம் தலைமுறை விமானங்களில் மறைந்திருந்து தாக்குதல் திறன் அதிகமாக இருக்கும். அதைப்போல வேகமும் கூடுதலாக இருக்கும். இப்படியான விமானங்களை இந்தியா உருவாக்க திட்டமிட்டு வருகிறது. இந்த திட்டம் முழுமையடைய 2030 வரை காலம் எடுக்கும் என்பதால், இந்தியாவுக்கு 5ம் தலைமுறை விமானங்கள் உடனடி தேவையாக இருக்கின்றன.

ரஷ்யா கொடுக்கும் ஆஃபர்

இந்த சூழலில்தான் ரஷ்யா நமக்கு விமானங்களை தர முன் வந்திருக்கிறது. அதனுடைய SU-57 ஐந்தாம் தலைமுறை விமானத்தை இந்தியாவில் முழுமையாக தயாரிப்பதற்கு ரஷ்யா ஒப்புக் கொண்டிருக்கிறது. வெறுமனே விமானத்தை தயாரிப்பது மட்டுமில்லாமல் விமானத்தின் தொழில்நுட்ப தகவல்களையும் இந்தியாவுக்கு விற்க முன் வந்திருக்கிறது. இந்த சலுகை இந்தியாவினுடைய தற்சார்பு இந்தியா திட்டத்திற்கு மிகுந்த உதவியாக இருக்கும் என்றும் ரஷ்யா கருதுகிறது.

5ம் தலைமுறை தொழில்நுட்பம்

இதெல்லாம் ஓகேதான். ஆனால், இந்த ஒப்பந்தத்தில் கையெழுத்து இடுவதில் இந்தியாவுக்கு சில தயக்கங்கள் இருக்கின்றன. ஏற்கனவே ரஷ்யாவுடன் சேர்ந்து 5ம் தலைமுறை விமானத்தை தயாரிக்கும் திட்டத்தில் இந்தியா வேலை செய்திருக்கிறது. இந்தத் திட்டத்தில் சில பின்னடைவுகள் ஏற்பட்டிருந்தன. குறிப்பாக இரு நாடுகளும் சேர்ந்து தயாரிக்கும் 5ம் தலைமுறை விமானத்தில் வேகம் குறைவாக இருந்ததாகவும், மறைந்திருந்து தாக்கம் தொழில்நுட்பம் மற்றும் விமானங்களை விட ஒப்பிட்டு அளவில் குறைவாக இருந்ததாகவும் சொல்லப்படுகிறது. எனவே இந்த திட்டத்திலிருந்து இந்தியா பின்வாங்கி இருந்தது.

நிபுணர்கள் எச்சரிக்கை

இப்படி இருக்கையில் ரஷ்யா தயாரித்திருக்கும் 5ம் தலைமுறை விமானம், எப்படி நம்பகமாக இருக்கும் என்று பலரும் கேள்வி எழுப்புகின்றனர். அதேபோல இப்போதைக்கு தொழில்நுட்ப தகவல்களை ரஷ்யா பகிர்ந்து கொள்வதாக சொன்னாலும், அந்த தகவல்களை முழுமையாக வழங்காது என்று முன்னாள் ஏர் மார்ஷல் அணில் சோப்ரா போன்ற நிபுணர்கள் எச்சரித்துள்ளனர். இதெல்லாம் ரஷ்யாவின் ஆஃபரை பரிசிலிக்க தடையாக இருக்கின்றன.

வேலைக்கு ஆகுமா?

ரஷ்யாவின் ஆஃபருக்கு முன்னரே, பிரான்ஸிடமிருந்து ரபேல் விமானங்களை அதிக அளவில் கொள்முதல் செய்ய இந்தியா ஆர்டர் கொடுத்து விட்டது. அப்படி இருக்கையில் புதிய 5ம் தலைமுறை விமானங்களை வாங்கும் அளவுக்கு இந்தியாவிடம் நிதி இருக்குமா என்பது கேள்விக்குறி.

மட்டுமல்லாது இந்தியா சுயமாக 5ம் தலைமுறை விமானங்களை (AMCA) உருவாக்கும் பணியில் ஈடுபட்டிருப்பதால் தற்போது ஐந்தாம் தலைமுறை விமானங்களை வாங்குவதன் மூலம் நம்முடைய சொந்தத் தயாரிப்பு விமானத்தில் பணிகள் தாமதமாக வாய்ப்புகள் உள்ளதாக சந்தேகிக்கப்படுகிறது. இந்தக் காரணங்களால் ரஷ்யாவின் ஆஃபரை இந்தியா மறுக்க வாய்ப்புகள் அதிகம் உள்ளது என்று நிபுணர்கள் கூறுகின்றனர்.

English summary

India is likely to decline Russia's Su-57E stealth fighter offer and instead explore developing a twin-seat Sukhoi variant, reflecting strategic shifts in IAF's combat aircraft acquisition priorities.