இந்தியாவில் நேற்று 6,822 பேருக்கு கொரோனா பாதிப்பு- 220 பேர் மரணம்

டெல்லி: இந்தியாவில் கடந்த 24 மணிநேரத்தில் 6,822 பேருக்கு கொரோனா தொற்று உறுதி செய்யப்பட்டுள்ளது. மேலும் திங்கள்கிழமையன்று மொத்தம் 220 பேர் கொரோனாவால் உயிரிழந்துள்ளனர்.

உலக நாடுகளில் கொரோனா அடுத்த கட்ட அலை ஓமிக்ரான் வடிவில் விஸ்வரூபம் எடுத்துள்ளது. இந்தியா உட்பட பல நாடுகள் ஓமிக்ரான் வைரஸ் பாதிப்பை கண்டறிந்துள்ளன.

இதனைத் தொடர்ந்து கொரோனா தடுப்பூசிகள் போடும் நடவடிக்கைகளை அனைத்து நாடுகளும் முழுவீச்சில் மேற்கொண்டு வருகின்றன. இந்தியாவில் தொடர்ந்து ஓமிக்ரான் பாதிப்பு உறுதி செய்யப்பட்டு வருகிறது. இந்தியாவின் மொத்த ஓமிக்ரான் பாதிப்பு எண்ணிக்கை 23. தமிழகத்தில் இதுவரை ஓமிக்ரான் பாதிப்ப்பு கண்டறியப்படவில்லை.

6,822 பேருக்கு கொரோனா

இந்தியாவில் கடந்த 24 மணிநேரத்தில் 6,822 பேருக்கு கொரோனா பாதிப்பு உறுதி செய்யப்பட்டுள்ளது. இது கடந்த 558 நாட்களில் மிக குறைவான பாதிப்பு எண்ணிக்கையாகும். மேலும் முந்தைய நாளை ஒப்பிடுகையில் 17.9% குறைந்துள்ளது.

குணமடைதல் அதிகரிப்பு

கடந்த 24 மணிநேரத்தில் 10,004 பேர் கொரோனா பாதிப்பில் இருந்து குணமடைந்துள்ளனர். இதுவரை கொரோனா பாதிப்பில் இருந்து மொத்தம் 3,40,79,612 பேர் குணமடைந்துள்ளனர். அதாவது நாட்டில் கொரோனா பாதிப்பில் இருந்து குணமடைதல் விகிதமானது 98.36% ஆக உள்ளது.

இந்தியாவின் ஆக்டிவ் கேஸ்கள்

நாட்டில் தற்போது கொரோனாவுக்கு சிகிச்சை பெறுவோர் எண்ணிக்கை 95,014. ஆக்டிவ் கேஸ்களைப் பொறுத்தவரையில் கடந்த 554 நாட்களில் மிக குறைவானதாகும். ஒட்டுமொத்த கொரோனா பாதிப்பு எண்ணிக்கையில் இது 0.27% மட்டுமே ஆகும்.

கேரளாவில் அதிகம்

மாநிலங்களைப் பொறுத்தவரையில் கேரளாவில்தான் அதிகமாக கொரோனா பாதிப்பு பதிவாகி உள்ளது. கேரளாவில் மொத்தம் 3,277 பேருக்கு நேற்று கொரோனா தொற்று கண்டறியப்பட்டுள்ளது. இதனையடுத்து தமிழகத்தில் 719 பேருக்கு கொரோனா தொற்று உறுதி செய்யப்பட்டுள்ளது. மகாராஷ்டிராவில் 518, மேற்கு வங்கத்தில் 465, மிசோரமில் 330 பேருக்கு கொரோனா பாதிப்பு உறுதி செய்யப்பட்டது.

கொரோனா தடுப்பூசிகள்

நாட்டின் இந்த 5 மாநிலங்களில்தான் மொத்த கொரோனா பாதிப்பு 77.83% ஆக பதிவாகி இருக்கிறது. மொத்த கொரோனா பாதிப்பில் கேரளா எண்ண்ணிக்கை மட்டும் 48.04% ஆகும். நாட்டில் இதுவரை கொரோனாவுக்கு 4,73,757 பேர் உயிரிழந்துள்ளனர். கேரளாவில் நேற்று அதிகபட்சமாக 168 பேரும் தமிழகத்தில் 10 பேரும் கொரோனாவால் மரணம் அடைந்தனர். கடந்த 24 மணிநேரத்தில் மட்டும் 79,39,038 டோஸ்கள் கொரோனா தடுப்பூசிகள் போடப்பட்டுள்ளன. நாடு முழுவதும் மொத்தம் 1,28,76,10,590 கொரோனா தடுப்பூசிகள் போடப்பட்டுள்ளன.

English summary

India has reported 6,822 new cases, 10,004 recoveries and 220 deaths in the last 24 hours.