ரேபரேலி, அமேதி வேட்பாளர்கள் யார்? என்னத்துக்கு இவ்ளோ சஸ்பென்ஸ்.. கடுப்பாகும் உ.பி. காங்கிரஸ்!

டெல்லி: லோக்சபா தேர்தலில் உத்தரப்பிரதேசத்தின் ரேபரேலி மற்றும் அமேதி தொகுதிகளின் வேட்பாளர்கள் யார் என அறிவிக்காமல் இழுத்தடித்துக் கொண்டிருப்பது அம்மாநில காங்கிரஸ் கட்சியினரிடையே அதிருப்தியை ஏற்படுத்தி உள்ளதாகக் கூறப்படுகிறது.

18-வது லோக்சபா நாடு முழுவதும் 7 கட்டங்களாக நடத்தப்பட்டு வருகிறது. ஏப்ரல் 19, ஏப்ரல் 26-ல் முதல் 2 கட்ட வாக்குப் பதிவு நடைபெற்றது. ஜூன் 1-ந் தேதி வரை எஞ்சிய 5 கட்ட தேர்தல் நடைபெற உள்ளது.

மே 20-ந் தேதி 5-வது கட்ட தேர்தல் நடைபெற உள்ளது. உத்தரப்பிரதேசத்தில் நேரு குடும்பத்தின் பாரம்பரிய வாக்கு வங்கியை கொண்ட அமேதி, ரேபரேலி தொகுதிகளில் மே 20-ந் தேதி தேர்தல் நடைபெற உள்ளது. தற்போது வேட்பு மனுத் தாக்கல் நடைபெற்று வருகிறது. வேட்பு மனுத் தாக்கல் செய்ய மே 3-ந் தேதிதான் கடைசி நாள்.

ஆனால் அமேதி, ரேபரேலி லோக்சபா தொகுதிகளுக்கான வேட்பாளர்களை காங்கிரஸ் மேலிடம் இன்னமும் அறிவிக்கவில்லை. வயநாடு தொகுதியில் போட்டியிடும் ராகுல் காந்தி, அமேதியிலும் போட்டியிடுவார் என கூறப்படுகிறது. அதே நேரத்தில் ராகுல் காந்திக்கு பதில் அவரது மைத்துனரும் பிரியங்கா காந்தியின் கணவருமான ராபர்ட் வதேரா போட்டியிடக் கூடும் எனவும் கூறப்படுகிறது. ரேபரேலியில் போட்டியிட்ட சோனியா காந்தி தற்போது ராஜ்யசபா எம்பியாகிவிட்டார். அத்தொகுதியில் பிரியங்கா காந்தி களம் காணக் கூடும் எனவும் கூறப்படுகிறது.

இன்னொரு பக்கம் ரேபரேலியில் ராபர்ட் வதேராவும் அமேதியில் காங்கிரஸ் கமிட்டித் தலைவர் மல்லிகார்ஜூன கார்கேவும் கூட போட்டியிடலாம் எனவும் உறுதிப்படுத்தப்படாத தகவல்கள் வெளியாகி இருக்கின்றன. கடந்த 10 நாட்களாகவே அமேதி, ரேபரேலி வேட்பாளர்கள் குறித்து காங்கிரஸ் கட்சி இன்றைக்கு முடிவு எடுக்கும் என்றே ஊடகங்களும் எழுதி வருகின்றன. ஆனாலும் காங்கிரஸ் மேலிடம் ஏதோ ஒரு காரணத்துக்காக இவ்வளவு சஸ்பென்ஸ் வைத்துக் கொண்டிருக்கிறது.

காங்கிரஸ் மேலிடத்தின் இந்த புதிரான நடவடிக்கையால் உத்தரப்பிரதேசத்தில் ஏதோ ஒன்றிரண்டு தொகுதிகளையாவது வெல்வோம் என்ற ஆர்வத்தில் இருக்கும் காங்கிரஸ் கட்சியினரும் சோர்வடைந்து போய்வருவதாகவும் கூறப்படுகிறது. ரேபரேலி, அமேதி தொகுதிகளின் வேட்பாளர்களை காங்கிரஸ் மேலிடம் விரைவாக அறிவித்து சஸ்பென்ஸ் யூகங்களுக்கு முற்றுப்புள்ளி வைக்க வேண்டும் என்பது உ.பி. காங்கிரசாரின் வேண்டுகோள்.

English summary

Congress party yet to announce UP Rae Bareli, Amethi Candidates for the Lok Sabha Election 2024.