ச்சே மாணவரா? விமானத்தில் சக பயணி மீது சிறுநீர் கழித்தது யார்? அடையாளத்தை வெளியிட்ட டெல்லி போலீஸ்

Published: Sunday, March 5, 2023, 17:22 [IST]

Subscribe to Oneindia Tamil

டெல்லி: அமெரிக்க விமானத்தில் சக பயணி மீது போதையில் சிறுநீர் கழித்தவரின் அடையாளத்தை டெல்லி காவல்துறை வெளியிட்டுள்ளது.

இதில், சிறுநீர் கழித்த நபர் அமெரிக்காவில் படித்து வரும் இந்தியாவைச் சேர்ந்த மாணவர் என்பது தெரியவந்துள்ளது. மேலும் அவரிடம் தொடர்ந்து விசாரணை நடைபெற்று வருகிறது.

இதனிடையே, அந்த மாணவருக்கு தங்கள் விமானத்தில் பறக்க சம்பந்தப்பட்ட விமான நிறுவனம் தடை விதித்துள்ளது. மேலும், இந்திய விமானப் போக்குவர்தது இயக்குநரகமும் அந்த மாணவர் மீது எடுக்கப்பட வேண்டிய அடுத்தக்கட்ட நடவடிக்கை குறித்து ஆலோசித்து வருகிறது.

அலறிய பயணி

அமெரிக்கன் ஏர்லைன்ஸ்' விமானம் நியூயார்க் நகரில் இருந்து புறப்பட்டு கடந்த வெள்ளிக்கிழமை டெல்லி வந்து கொண்டிருந்தது. அப்போது அதில் பயணித்த ஒரு பயணி விடிய விடிய மது அருந்திக் கொண்டும், அக்கம்பக்கத்தில் உள்ளவர்களிடம் தேவையில்லாமல் பேசிக்கொண்டும் வந்துள்ளார். இதுதொடர்பாக சக பயணிகள் புகார் அளிக்கவே, விமான ஊழியர்கள் அவரை எச்சரித்தனர். இதனால் சிறிது நேரம் அவர் அமைதியாக வந்தார். இந்நிலையில், விமானத்தில் திடீரென அலறல் சத்தம் கேட்டுள்ளது.

சாகவாசமாக சிறுநீர் கழித்த இளைஞர்

இதனால் அதிர்ச்சியடைந்த சக பயணிகளும், விமான ஊழியர்களும் அங்கு வந்தனர். அப்போது அந்த போதை ஆசாமி தனக்கு அருகே அமர்ந்திருந்த சக ஆண் பயணி மீது சிறுநீர் கழித்தது தெரியவந்தது. இதையடுத்து, அவரிடம் விமான ஊழியர்கள் விசாரணை நடத்தினர். இதில், தான் தூங்கிக் கொண்டிருந்த போது சிறுநீர் கழித்துவிட்டதாகவும், தன்னை மன்னித்துவிடும்படியும் அவர் கேட்டுள்ளார். பின்னர், பாதிக்கப்பட்ட பயணியும் அவர் மீது புகார் அளிக்க விரும்பவில்லை எனத் தெரிவித்தார். எனினும், சனிக்கிழமை டெல்லி விமான நிலையத்திற்கு விமானம் வந்ததும், ஊழியர்கள் அவரை போலீஸாரிடம் ஒப்படைத்தனர்.

இந்திய மாணவர்

இந்நிலையில், அந்த நபரின் விவரத்தை டெல்லி போலீஸார் தற்போது வெளியிட்டுள்ளனர். அவரது பெயர் ஆர்யா வோஹ்ரா (21). இவர் அமெரிக்காவில் உள்ள ஒரு பல்கலைக்கழகத்தில் படித்து வருகிறார். டெல்லியில் உள்ள ராணுவக் குடியிருப்பில் இவர் தங்கியுள்ளார். இப்போதைக்கு இந்த விவரங்களை மட்டுமே டெல்லி காவல்துறை தெரிவித்துள்ளது. அவரிடம் தொடர்ந்து விசாரணை நடைபெற்று வருகிறது.

வாழ்நாள் தடை

இந்த சூழலில், சம்பந்தப்பட்ட மாணவர் தங்கள் விமானங்களில் பயணிப்பதற்கு 'அமெரிக்கன் ஏர்லைன்ஸ்' விமானம் வாழ்நாள் தடை விதித்துள்ளது. இதுகுறித்து இந்திய விமானப் போக்குவரத்து இயக்குநரக அதிகாரி ஒருவர் கூறுகையில், "சம்பந்தப்பட்ட விமான நிறுவனம் இந்த சம்பவத்தை சரியாக கையாண்டுள்ளது. இச்சம்பவத்தின் முழு விவரங்களையும் அந்த விமான நிறுவனத்திடம் கேட்டிருக்கிறோம். அந்த அறிக்கையை ஆராய்ந்த பிறகு, சம்பந்தப்பட்ட நபர் மீது நடவடிக்கை எடுக்கப்படும்" என்றார்.

Published On March 5, 2023