நீட் முதுநிலை தேர்வில் நெகட்டிவ் மார்க் எடுத்தாலும் சீட்.. கட் ஆப் மதிப்பெண்கள் அதிரடியாக குறைப்பு
டெல்லி: நீட் முதுநிலை தேர்வில் Cut-off மதிப்பெண் 0% ஆகக் குறைக்கப்பட்டுள்ளது. Negative Marking முறை இருப்பதால், ஓபிசி, எஸ்.சி, எஸ்.டி பிரிவினர் 800க்கு - 40 மதிப்பெண்கள் எடுத்தாலே போதுமானது என அறிவிக்கப்பட்டுள்ளது. பொதுப் பிரிவினருக்கான Cut-off மதிப்பெண் 50%-லிருந்து 7% ஆக குறைக்கப்பட்டுள்ளது. அதாவது 800-க்கு 103 மதிப்பெண்கள் எடுத்தாலே போதும்.
இரண்டாம் கட்ட கலந்தாய்விற்குப் பிறகும் தனியார் கல்லூரிகளில் ஏராளமான இடங்கள் காலியாக இருப்பதால், மத்திய அரசு, கட் ஆஃப் மதிப்பெண்களை குறைத்துள்ளது.
எம்.டி, எம்.எஸ். மற்றும் முதுநிலை டிப்ளமோ போன்ற மருத்துவப் படிப்புகளில் சேர்வதற்கான நீட் முதுநிலை தேர்வு (NEET-PG) கடந்த ஆகஸ்ட் மாதம் 3 ஆம் தேதி நடைபெற்றது. நாடு முழுவதும் சுமார் 2 லட்சத்திற்கும் மேற்பட்டவர்கள் இந்த தேர்வை எழுதினர். தேர்வு முடிவுகள் ஆகஸ்ட் 19ஆம் தேதி வெளியிடப்பட்டன.
இதனை தொடர்ந்து மாணவர் சேர்க்கைக்கான கலந்தாய்வு தொடங்கப்பட்டு, இதுவரை 2 சுற்று கலந்தாய்வுகள் நடந்து முடிந்துள்ளன. அதில், மொத்த மதிப்பெண்களான 800-ல் பொதுப்பிரிவினருக்கு 276 மதிப்பெண்களும், ஓபிசி, எஸ்.சி., எஸ்.டி., பிரிவினருக்கு 235 மதிப்பெண்களும் கட் ஆஃப் ஆக நிர்ணயிக்கப்பட்டு இருந்தன.
ஆனால் 2 சுற்று கலந்தாய்வு நிறைவடைந்த பிறகும், நாடு முழுவதும் இன்னும் 18 ஆயிரம் இடங்கள் காலியாக உள்ளன. ஏராளமான தனியார் கல்லூரிகளில் இடங்கள் காலியாக உள்ளன. இதனால், மத்திய அரசின் ஒப்புதலுடன் அடுத்த சுற்று கலந்தாய்வுக்கான கட் ஆப் மதிப்பெண்களை குறைத்து தேசிய மருத்துவத் தேர்வுகள் வாரியம் அறிவிப்பு வெளியிட்டுள்ளது.
அதன்படி பொதுப் பிரிவிற்கான நீட் முதுநிலை கட்ஆப் பர்சண்டைல் 50-ல் இருந்து 7 ஆக குறைக்கப்பட்டுள்ளது. அதாவது, பொதுப்பிரிவினர் 800 மதிப்பெண்களுக்கு 103 மதிப்பெண்கள் எடுத்தால் முதுநிலை மருத்துவப் படிப்பில் சேரலாம். அதேபோல் ஓபிசி, எஸ்.சி., எஸ்.டி., பிரிவினருக்கான கட் ஆஃப் பர்சண்டைல் 40 ல் இருந்து பூஜ்ஜியமாக குறைக்கப்பட்டுள்ளது. நெகட்டிவ் மதிப்பெண் முறை இருப்பதால், 800க்கு -40 மதிப்பெண்கள் எடுத்தாலே போதுமானது என்பது குறிப்பிடத்தக்கது.
Click it and Unblock the Notifications
Sign in with Google