உச்சநீதிமன்ற நீதிபதியாக தமிழர் ஆர்.மகாதேவன் பதவியேற்பு-முழுமையானது உச்சநீதிமன்ற நீதிபதிகள் எண்ணிக்கை

டெல்லி: உச்சநீதிமன்றத்தின் நீதிபதியாக தமிழ்நாட்டைச் சேர்ந்த சென்னை உயர்நீதிமன்றத்தின் பொறுப்பு தலைமை நீதிபதி ஆர்.மகாதேவன் இன்று பதவியேற்றுக் கொண்டார். இதேபோல ஜம்மு காஷ்மீர் உயர் நீதிமன்றத்தின் தலைமை நீதிபதி கோடீஸ்வர் சிங்கும் உச்சநீதிமன்றத்தின் நீதிபதியாக இன்று பதவியேற்றார். இதனையடுத்து உச்சநீதிமன்றத்தில் நீதிபதிகள் எண்ணிக்கை முழுமையடைந்தது.

உச்சநீதிமன்றத்தில் மொத்த நீதிபதிகள் எண்ணிக்கை 34. உச்சநீதிமன்றத்தில் இரண்டு நீதிபதிகள் இடம் காலியாக இருந்தது. இதனையடுத்து உச்சநீதிமன்றத்தின் நீதிபதிகளை நியமிக்கும் கொலிஜியம் குழுவானது, சென்னை உயர்நீதிமன்றத்தின் பொறுப்பு தலைமை நீதிபதி ஆர்.மகாதேவன், ஜம்மு காஷ்மீர் உயர் நீதிமன்றத்தின் தலைமை நீதிபதி கோடீஸ்வர் சிங் ஆகியோரை உச்சநீதிமன்ற நீதிபதிகளாகப் பரிந்துரைத்தது.

உச்சநீதிமன்ற கொலிஜியம் குழுவின் இந்தப் பரிந்துரையில், ''The Collegium said Justice Mahadevan was ''eminently suitable'' for appointment as a Supreme Court Judge. He belongs to a backward community from Tamil Nadu, and will bring diversity to the Supreme Court Bench.'' என குறிப்பிட்டிருந்தது. அதாவது தமிழ்நாட்டின் பிற்படுத்தப்பட்ட சமூகத்தைச் சேர்ந்தவர் பிரதிநிதித்துவம் பெற வேண்டும் என்பதற்காக சமூக நீதி அடிப்படையில் ஆர்.மகாதேவன், உச்சநீதிமன்ற நீதிபதியாக கொலிஜியம் குழுவால் பரிந்துரைக்கப்பட்டார். கொலிஜியம் குழுவின் இந்த பரிந்துரை தமிழ்நாட்டில் பெரும் பாராட்டைப் பெற்றது. தமிழ்நாட்டின் மூத்த எழுத்துலக ஆளுமை மா.அரங்கநாதனின் மகன் ஆர்.மகாதேவன்.

இதனையடுத்து உச்சநீதிமன்ற நீதிபதிகளாக ஆர்.மகாதேவன், கோடீஸ்வர் சிங் ஆகியோரை நியமிக்கும் கொலிஜியம் குழுவின் பரிந்துரையை மத்திய அரசும் ஏற்று ஜனாதிபதி திரவுபதி முர்மு ஒப்புதல் அளித்தார்.

இதனடிப்படையில் உச்சநீதிமன்றத்தில் நீதிபதிகள் ஆர்.மகாதேவன், கோடீஸ்வர் சிங் ஆகியோர் இன்று பதவியேற்றுக் கொண்டனர். இருவருக்கும் தலைமை நீதிபதி டிஒய் சந்திரசூட் பதவியேற்பு செய்துவைத்தார். இரு நீதிபதிகள் பதவியேற்பைத் தொடர்ந்து உச்சநீதிமன்றத்தில் நீதிபதிகள் எண்ணிக்கையான 34-ம் முழுமையடந்தது. உச்சநீதிமன்றத்தில் தற்போதைய நிலையில் நீதிபதிகள் பணியிடம் காலியாக இல்லை என்பது குறிப்பிடத்தக்கது.

English summary

Justices Kotiswar Singh, Justice R Mahadevan were sworn in as judges of the Supreme Court today.