27 ராஜ்ய சபா எம்.பிக்கள் பதவியேற்பு.. தமிழகத்தில் இருந்து ஒருவர்.. சி.வி.சண்முகம் இன்று மிஸ்ஸிங்!

டெல்லி : சமீபத்தில் மாநிலங்களவை எம்.பிக்களாக தேர்ந்தெடுக்கப்பட்ட 57 உறுப்பினர்களில் 27 பேர், இன்று அரசியலமைப்பு சாசனப்படி முறையாகப் பதவியேற்றுக் கொண்டனர்.

27 மாநிலங்களவை உறுப்பினர்கள் மாநிலங்களவைத் தலைவரும் துணை குடியரசுத் தலைவருமான வெங்கையா நாயுடு முன்னிலையில் பதவியேற்றுக் கொண்டனர்.

தமிழகத்தைச் சேர்ந்த அதிமுக எம்.பி ஆர்.தர்மர் இன்று பதவியேற்றுக் கொண்டார். சி.வி.சண்முகம் இன்று பதவியேற்கவில்லை.

ராஜ்யசபா தேர்தல்

மாநிலங்களவையில் காலியாக உள்ள 57 எம்.பி பதவிகளுக்கு இந்திய தேர்தல் ஆணையம் தேர்தல் அறிவித்தது. அதில், 11 மாநிலங்களில் 41 வேட்பாளர்கள் போட்டியின்றி தேர்ந்தெடுக்கப்பட்டனர். மகாராஷ்டிரா, ராஜஸ்தான், ஹரியானா மற்றும் கர்நாடகா ஆகிய நான்கு மாநிலங்களில் உள்ள 16 இடங்களுக்கு ஜூன் 10ஆம் தேதி தேர்தல் நடைபெற்றது. அதன்படி 16 பேர் எம்.பிக்களாக தேர்ந்தெடுக்கப்பட்டனர்.

பதவியேற்பு

மாநிலங்களவைக்கு தேர்ந்தெடுக்கப்பட்ட 57 எம்.பிக்களில், இன்று 10 மாநிலங்களைச் சேர்ந்த 27 பேர் அரசியலமைப்பு சாசனப்படி முறையாகப் பதவியேற்றனர். அவர்கள் அனைவரும் மாநிலங்களவைத் தலைவரும் துணை குடியரசுத் தலைவருமான வெங்கையா நாயுடு முன்னிலையில் பதவியேற்றுக் கொண்டனர். பதவியேற்பு விழாவில் பாஜக தேசிய தலைவர் ஜே.பி.நட்டா, நாடாளுமன்ற விவகாரங்கள் துறை இணையமைச்சர் முரளீதரன் ஆகியோர் பங்கேற்றனர்.

நிர்மலா சீதாராமன்

மாநிலங்களவை எம்.பி.யாக இன்று பதவியேற்ற 27 பேரில் 18 பேர் பா.ஜ.கவைச் சேர்ந்தவர்கள். மத்திய அமைச்சர்களாக பொறுப்பு வகித்து வரும் நிர்மலா சீதாராமன் மற்றும் பியூஷ் கோயல் ஆகியோர் இன்று ராஜ்யசபா எம்.பியாக பதவியேற்றுக்கொண்டனர். காங்கிரஸ் கட்சியின் முன்னணி தலைவர்களான ஜெய்ராம் ரமேஷ், விவேக் கே தன்கா, முகுல் வாஸ்னிக் ஆகியோரும் இன்று பதவியேற்றனர்.

தமிழில் ஒருவர்

10 மாநிலங்களைச் சேர்ந்த இந்த 27 உறுப்பினர்கள் வெவ்வேறு மொழிகளில் இன்று பதவிப் பிரமாணம் எடுத்துக்கொண்டனர். 12 எம்பிக்கள் இந்தியிலும், 4 பேர் ஆங்கிலத்திலும், சமஸ்கிருதம், கன்னடம், மராத்தி மற்றும் ஒரியா ஆகிய மொழிகளில் தலா இருவரும், பஞ்சாபி, தமிழ் மற்றும் தெலுங்கு ஆகிய மொழிகளில் தலா ஒருவரும் பதவியேற்றனர்.

சி.வி.சண்முகம் பதவியேற்கவில்லை

= அதிமுகவைச் சேர்ந்த ஆர்.தர்மர் இன்று ராஜ்யசபா எம்.பியாக தமிழில் பதவியேற்றுக் கொண்டார். அதிமுக சார்பில் எம்.பியாக தேர்ந்தெடுக்கப்பட்ட சி.வி.சண்முகம் இன்று பதவியேற்கவில்லை. திமுக சார்பில் தேர்ந்தெடுக்கப்பட்ட 3 எம்.பிக்கள் இன்று பதவியேற்றுக் கொள்ளவில்லை. இன்று பதவியேற்காத எஞ்சிய எம்.பி.க்கள், நாடாளுமன்ற மழைக்கால கூட்டத்தொடரின் முதல் நாளில் பதவியேற்க வாய்ப்புள்ளதாக கூறப்படுகிறது.

English summary

27 Rajya sabha members were formally sworn in today as per the Constitution. ADMK MP R Dharmar from Tamil Nadu took oath today. CV Shanmugam did not take oath today.