முஸ்லிம்களுக்கு 4% இட ஒதுக்கீடா? நாடாளுமன்றத்தில் அமளி!.இரு அவைகளும் அடுத்தடுத்து ஒத்திவைப்பு

டெல்லி: கர்நாடகாவில் முஸ்லீம்களுக்கு அரசு ஒப்பந்தத்தில் 4 சதவீத இட ஒதுக்கீடு அளிக்கும் மசோதா விவகாரம் தொடர்பாக நாடாளுமன்றத்தில் இன்று கடும் அமளி ஏற்பட்டது. பாஜக எம்.பிக்கள் இந்த பிரச்சினையை எழுப்பினர். இதனால், ஏற்பட்ட அமளியை தொடர்ந்து இரு அவைகளும் பிற்பகல் 2 மணி வரை ஒத்திவைக்கப்பட்டுள்ளது.

நாடாளுமன்ற பட்ஜெட் கூட்டத்தொடரின் 2-வது அமர்வு கூடி இன்று நடைபெற்று வருகிறது. கடந்த 10 ஆம் தேதி அவை கூடியதில் இருந்தே எதிர்க்கட்சிகள் பல்வேறு பிரச்சினைகளை எழுப்பி அமளியில் ஈடுபட்டு வருகின்றன. இன்று காலை கூடியதும் இரு அவைகளிலும் அமளி ஏற்பட்டது. லோக்சபாவில் சமாஜ்வாடி கட்சியைச் சேர்ந்த எம்பிக்கள் பதாகைகளைக் காண்பித்து அமளியில் ஈடுபட்டனர்.

உத்தர பிரதேசத்தில் நடைபெறும் பிரச்சினைகளை எழுப்பி சமாஜ்வாடி எம்பிக்கள் பதாகைகளை காட்டினர். சபாநாயகர் அமளியில் ஈடுபட்ட எம்.பிக்களை அமைதிப்படுத்த முயன்றார். ஆனால் தொடர்ந்து அமளி நீடித்தது. இதையடுத்து நண்பகல் 12 மணி வரை அவை ஒத்திவைக்கப்பட்டது. இதையடுத்து, மீண்டும் அவை கூடிய போதும், கர்நாடக துணை முதல்வர் டிகே சிவக்குமார் கருத்து தொடர்பாக அமளி நீடித்ததால் பிற்பகல் 2 மணி வரை ஒத்திவைக்கப்பட்டது.

அதே போல ராஜ்யசபாவில், கர்நாடகா விவகாரம் எதிரொலித்தது. அதாவது கர்நாடகாவில் சிறுபான்மையினருக்கு பொதுப்பணித்துறை ஒப்பந்தங்களில் 4 சதவீத இட ஒதுக்கீடு அளிக்கும் அம்மாநில அரசின் முடிவு குறித்து மல்லிகார்ஜுன கார்கே விளக்கம் அளிக்க வேண்டும் என்று மத்திய அமைச்சர் கிரண் ரிஜிஜூ கூறினார். இவருக்கு ஆதரவாக என்.டி.ஏ எம்பிக்கள் கோஷங்கள் எழுப்பினர்.

தொடர்ந்து பேசிய கிரண் ரிஜிஜூ, அரசியல் அமைப்பு பதவியில் இருக்கும் காங்கிரஸ் தலைவர் ஒருவர் இட ஒதுக்கீடு அளிப்பதற்காக அரசியல் அமைப்பு மாற்றப்படும் என்று கூறியிருக்கிறார். இது குறித்து நான் எதிர்க்கட்சி தலைவரிடம் விளக்கம் கேட்கிறேன்" என்றார். இதையடுத்து, மத்திய அமைச்சர் ஜேபி நட்டாவும் இதே விவகாரத்தை எழுப்பினார்.

அப்போது அவைத்தலைவர் ஜெகதீப் தன்கர் எழுப்பிய கேள்விக்கு பதிலளித்த, ஜேபி நட்டா " இதுபோன்ற சட்டங்கள் திரும்ப பெற வேண்டும். கார்கே பதிலளிக்க வேண்டும்" என்றார். இந்த விவகாரம் தொடர்பாக எம்பிக்கள் தொடர்ந்து அமளியில் ஈடுபட்டனர். இதனால், பிற்பகல் 2 மணி வரை ஒத்திவைக்கப்பட்டது.

English summary

There was a huge uproar in Parliament today over the bill to provide 4 percent reservation to Muslims in government contracts in Karnataka. BJP MPs raised the issue. Due to this, both the houses were adjourned till 2 pm following the uproar.