நாளை வங்கி கணக்கில் வரும் பணம்.. நாடு முழுக்க பல லட்சம் பேருக்கு ரூ.2000.. யாருக்கெல்லாம் வரும்?

டெல்லி: பிரதமர் கிசான் சம்மான் நிதி யோஜனா திட்டத்தின் கீழ் விவசாயிகளுக்கு வழங்கப்படும் அடுத்த தவணை விரைவில் விடுவிக்கப்படலாம் என்று தகவல்கள் தெரிவிக்கின்றன. பெரும்பாலும் இந்த பணம் நாளை விடுவிக்கப்படலாம் என்று கூறப்படுகிறது. அதாவது நாளை ரூ.2000 வழங்கப்படலாம் என்கிறார்கள். இந்தத் திட்டம் விவசாயிகளுக்கு ஆண்டுக்கு ரூ.6,000 நிதியுதவி அளிக்கிறது.

இந்த நிதியானது, நான்கு மாதங்களுக்கு ஒருமுறை ரூ.2,000 வீதம் மூன்று தவணைகளாக விவசாயிகளின் வங்கிக் கணக்கில் செலுத்தப்படுகிறது. கடைசியாக, 19-வது தவணை பிப்ரவரி 24, 2025 அன்று செலுத்தப்பட்டது. அதன் பிறகு, விவசாயிகள் 20-வது தவணைக்காகக் காத்திருக்கின்றனர்.

பொதுவாக தவணைக்கு தவணை நான்கு மாத இடைவெளி இருக்கும் நிலையில், ஜூன் மாதம் முடிந்து ஜூலை தொடங்கியும் பணம் வரவில்லை. இதனால், அடுத்த தவணை எப்போது வரும் என்ற கேள்வி விவசாயிகளிடையே எழுந்துள்ளது.

ஜூலை 18, 2025 அன்று அடுத்த தவணை வெளியாக வாய்ப்புள்ளதாக ஊடக அறிக்கைகள் தெரிவிக்கின்றன. பிரதமர் நரேந்திர மோடி அன்று பீகார் மாநிலம் மோதிஹாரியில் ஒரு பொதுக்கூட்டத்தில் உரையாற்ற இருக்கிறார். அப்போது, பி.எம். கிசான் திட்டத்தின் 20-வது தவணை விடுவிக்கப்படலாம் என்று எதிர்பார்க்கப்படுகிறது.

பிரதமர் மோடி வெளிநாட்டுப் பயணத்தில் இருந்ததால், தவணை செலுத்துவதில் தாமதம் ஏற்பட்டது. அவர் தற்போது நாடு திரும்பிவிட்டதால், ஜூலை 18 அன்று விவசாயிகளின் கணக்கில் பணம் வர வாய்ப்புள்ளது.

அரசின் தரப்பிலிருந்து தேவையான அனைத்து நடைமுறைகளும் முடிந்துவிட்டதாகவும், அதிகாரப்பூர்வ அறிவிப்பு மட்டுமே வரவேண்டியுள்ளது என்றும் ஊடகங்கள் தெரிவிக்கின்றன. கடந்த முறை போலவே, இந்த முறையும் ஒரு பெரிய நிகழ்வின் மூலம் தவணை வெளியிடப்படலாம் என எதிர்பார்க்கப்படுகிறது.

சம்மான் நிதியின் அடுத்த தவணை எந்தத் தடங்கலும் இல்லாமல் கிடைக்க, விவசாயிகள் சில முக்கிய விஷயங்களைப் புதுப்பிக்க வேண்டும். குறிப்பாக, eKYC அவசியம். eKYC செய்யாத விவசாயிகளுக்கு தவணை கிடைக்காது என்று அரசு தெரிவித்துள்ளது. எனவே, pmkisan.gov.in இணையதளத்திலோ அல்லது அருகிலுள்ள CSC மையத்திலோ eKYC-யை உடனடியாகப் புதுப்பிக்கவும்.

வங்கிக் கணக்கு மூடப்பட்டிருந்தாலோ அல்லது IFSC குறியீடு தவறாக இருந்தாலோ தவணை வருவதில் சிக்கல் ஏற்படலாம். எனவே, வங்கிக் கணக்கு விவரங்கள், IFSC குறியீடு மற்றும் ஆதார் இணைப்பு போன்ற தகவல்களைச் சரிபார்க்கவும்.

பி.எம். கிசான் இணையதளத்தில் உள்ள 'பயனாளி நிலை' பிரிவில், பதிவு எண் அல்லது மொபைல் எண்ணை உள்ளிட்டு, பயனாளிகள் பட்டியலில் உங்கள் பெயர் இருக்கிறதா என்பதை உறுதிப்படுத்திக் கொள்ளுங்கள். பெயர் நீக்கப்பட்டிருந்தாலோ அல்லது தகவல் முழுமையடையாமல் இருந்தாலோ பணம் வராது.

விவசாயிகள் தங்கள் மாநில இணையதளம் அல்லது அருகிலுள்ள CSC மையத்திற்குச் சென்று விவசாயி பதிவைச் செய்துகொள்ளலாம். வரி செலுத்துபவராக இருந்தாலோ, நிறுவன நிலம் இருந்தாலோ அல்லது ரூ.10,000-க்கு மேல் ஓய்வூதியம் பெற்றாலோ, கிசான் சம்மான் நிதி யோஜனாவின் பலனைப் பெற முடியாது.

தகவல்களைச் சரியாகப் புதுப்பித்திருந்தால், ரூ.2,000-க்கான அடுத்த தவணை விரைவில் உங்கள் கணக்கில் வரலாம். ஜூலை 18-ம் தேதி பிரதமர் பீகாரில் விவசாயிகளுக்காக ஒரு முக்கிய அறிவிப்பை வெளியிடலாம் என்று எதிர்பார்க்கப்படுகிறது.

English summary

PM Kisan Scheme: Will Rs. 2000 be released to the farmers by tomorrow?