எமெர்ஜென்சி காலத்தில் ஜனநாயகம் காக்க போராடிய முக்கிய படைவீரர் முலாயம் சிங் - பிரதமர் மோடி இரங்கல்

Updated: Monday, October 10, 2022, 11:15 [IST]

Subscribe to Oneindia Tamil

டெல்லி: உத்தரப்பிரதேச முன்னாள் முதலமைச்சரும் சமாஜ்வாடி கட்சித் தலைவருமான முலாயம் சிங் யாதவ் காலமான நிலையில் அவரது மறைவுக்கு பிரதமர் நரேந்திர மோடி இரங்கல் தெரிவித்து இருக்கிறார்.

வட இந்தியாவில் சக்திவாய்ந்த கட்சிகளில் ஒன்றான சமாஜ்வாடி கட்சியை நிறுவியவர் முலாயம் சிங் யாதவ். இந்திய அளவில் அனுபவமும், பலமும் வாய்ந்த அரசியல்வாதியாக பார்க்கப்படுகிறார்.

உத்தர பிரதேச மாநிலத்தில் 1989 ஆம் ஆண்டு முதல் 1991 ஆம் ஆண்டு வரையிலும், 1993 ஆம் ஆண்டு முதல் 1995 ஆம் ஆண்டு வரையிலும், 2003 ஆம் ஆண்டு முதல் 2007 ஆம் ஆண்டு வரையிலும் என 3 முறை முதலமைச்சராக பதவி வகித்துள்ளார்.

மருத்துவமனையில் அனுமதி

உத்தரப்பிரதேச முன்னாள் முதலமைச்சர் அகிலேஷ் யாதவின் தந்தையான இவர் கடந்த சில ஆண்டுகளாகவே தீவிர அரசியலைவிட்டு விலகி இருந்து வந்தார். இந்த நிலையில் கடந்த ஆகஸ்டு 22 ஆம் தேதி முலாயம் சிங் யாதவுக்கு திடீரென உடல்நலக்குறைவு ஏற்பட்டது. இதையடுத்து அவர் அரியானா மாநிலம் குருகிராமில் உள்ள மருத்துவமனையில் சிகிச்சைக்காக அனுமதிக்கப்பட்டார்.

காலமானார் முலாயம்

தொடர்ந்து முலாயம் சிங் யாதவின் உடல்நிலை கண்காணிக்கப்பட்டு மருத்துவர்கள் சிகிச்சை அளித்து வந்தனர். ஆனாலும் அவரது உடல்நிலை கவலைக்கிடமாக உள்ளது என மருத்துவமனை நிர்வாகம் தெரிவித்தது. இந்த நிலையில் இன்று காலை அவர் காலமானார். அவருக்கு வயது 82. முலாயம் சிங் யாதவ் மறைவால் உத்தரப்பிரதேச மக்கள், சமாஜ்வாடி தொண்டர்கள் சோகத்தில் மூழ்கியுள்ளனர்.

பிரதமர் மோடி இரங்கல்

இதுகுறித்து ட்விட்டரில் பதிவிட்டுள்ள பிரதமர் மோடி, "முலாயம் சிங் யாதவ் உத்தரப்பிரதேச மற்றும் தேசிய அரசியலில் புகழ்பெற்றவர். எமர்ஜென்சி காலத்தில் ஜனநாயகத்தை காக்க போராடிய முக்கிய படைவீரர் அவர். இந்திய பாதுகாப்புத்துறை அமைச்சராக வலுவான இந்தியாவை கட்டமைக்க உழைத்தவர். அவரது நாடாளுமன்ற பேச்சுக்கள் அறிவுசார்ந்ததாகவும், தேசிய நலனில் அக்கறை மிகுந்ததாகவும் இருக்கும்.

இரங்கல்

நாங்கள் வெவ்வேறு மாநிலங்களின் முதலமைச்சர்களாக இருந்தபோது பல முறை உரையாடி இருக்கிறோம். இருவருக்கும் இடையிலான நெருக்கம் தொடர்ந்ததுடன் அவரது கருத்துக்களையும் எப்போதும் கவனித்து வந்தேன். அவரது மறைவு என்னை காயப்படுத்துகிறது. அவரது குடும்பத்தினருக்கும் லட்சக்கணக்கான ஆதரவாளர்களுக்கும் என்னுடைய இரங்கலை தெரிவிக்கிறேன்." என்றார்.