கல்வானில் சீனா கொடியேற்றும் வீடியோ.. இப்பவாவது மவுனத்தை கலையுங்க... மோடிக்கு ராகுல் அப்பீல்

Updated: Monday, January 3, 2022, 9:30 [IST]

Subscribe to Oneindia Tamil

டெல்லி: லடாக்கின் கல்வான் பள்ளத்தாக்கில் புத்தாண்டு நாளில் சீனா கொடியேற்றும் வீடியோவை வெளியிட்டுள்ளது. இதனை சுட்டிக்காட்டியுள்ள மூத்த காங்கிரஸ் தலைவர் ராகுல் காந்தி, சீனா விவகாரத்தில் இப்போதாவது பிரதமர் மோடி மவுனம் கலைக்க வேண்டும் என வேண்டுகோள் விடுத்துள்ளார்.

கல்வான் பள்ளத்தாக்கு

கல்வான் பள்ளத்தாக்கு எல்லையில் இந்தியா, சீனா வீரர்கள் ரோந்து வருவது வழக்கம். கல்வான் பள்ளத்தாக்கு பகுதியை ஒட்டி இந்தியா சாலைகளை அமைத்து வருகிறது. இது சீனாவை ஆத்திரமூட்டியது. இதனைத் தொடர்ந்து 2020-ம் ஆண்டு கல்வான் பள்ளத்தாக்கு பகுதிக்குள் ஊடுருவி இந்திய நிலப்பகுதியை சீனா ஆக்கிரமிக்க முயற்சித்தது.

20 வீரர்கள் வீரமரணம்

கல்வான் பள்ளத்தாக்கில் 2020-ம் ஆண்டு ஜூன் 15,16 ஆகிய தேதிகளில் இரு ராணுவத்தினரிடையே கைகலப்பு மோதல்கள் நிகழ்ந்தன. இதில் இந்திய ராணுவ வீரர்கள் 20 பேர் வீரமரணம் அடைந்தனர். சீனா ராணுவ வீரர்கள் 35 பேர் கொல்லப்பட்டனர். ஆனால் சீனா இதனை அதிகாரப்பூர்வமாக அறிவிக்கவில்லை. அப்போது முதல் இருநாடுகளிடையே தொடர்ந்து பேச்சுவார்த்தைகள் நடைபெற்று வருகின்றன. ஆனால் இதுவரை எந்த தீர்வும் காணப்படவில்லை.

சீண்டும் சீனாவின் வீடியோ

இந்நிலையில் புத்தாண்டு நாளில் சீனா ஊடகங்களில் ஒரு வீடியோ வெளியிடப்பட்டது. அதில் கல்வான் பள்ளத்தாக்கு பகுதியில் சீனாவின் கொடியேற்றும் காட்சிகள் இடம்பெற்றிருந்தன. இதனால் கல்வான் பள்ளத்தாக்கு பகுதியில் மீண்டும் பதற்றத்தை ஏற்படுத்தியது சீனா. இது தொடர்பாக மூத்த காங்கிரஸ் தலைவர் ராகுல் காந்தி தமது ட்விட்டர் பக்கத்தில் இந்தியில் சில கருத்துகளைப் பதிவிட்டுள்ளார்.

ராகுல் வேண்டுகோள்

அதில், கல்வான் பள்ளத்தாக்கில் நமது மூவர்ண கொடி பட்டொளி வீசி பறக்க வேண்டும். சீனாவுக்கு தக்க பதிலடி கொடுக்கப்பட வேண்டும். பிரதமர் மோடி அவர்களே, இப்போதாவது மவுனம் கலையுங்கள் என வேண்டுகோள் விடுத்துள்ளார் ராகுல் காந்தி. கடந்த வெள்ளிக்கிழையன்று, அருணாச்சல பிரதேசத்தின் 15 பகுதிகளுக்கு சீனா புதிய பெயர் சூட்டியிருப்பதை சுட்டிக் காட்டி மத்திய அரசு தெளிவான, கடுமையான முடிவுகளை எடுக்க வேண்டிய தருணம் இது என குறிப்பிட்டிருந்தார் ராகுல் காந்தி.