பரபர கேஸ்கள்..அமலாக்கத்துறை இயக்குநர் எஸ்கே மிஸ்ரா பதவி காலம் முடிவு!இடைக்கால இயக்குநர் ராகுல் நவீன்

டெல்லி: அமலாக்கத்துறையின் இடைக்கால இயக்குநராக ராகுல் நவீன் நியமிக்கப்பட்டுள்ளதாக மத்திய அரசு அறிவித்துள்ளது.

இது தொடர்பாக மத்திய அரசு வெளியிட்டுள்ள அறிவிக்கையில், தற்போதைய அமலாக்கத்துறை இயக்குநர் எஸ்கே மிஸ்ரா பதவிக் காலம் இன்றுடன் முடிவடைகிறது. இதனையடுத்து அமலாக்கத்துறை இடைக்கால இயக்குநராக ராகுல் நவீன் நியமிக்கப்பட்டுள்ளார் என தெரிவித்துள்ளது.

அமலாக்கத்துறையின் சிறப்பு இயக்குநராக இருப்பவர் ராகுல் நவீன். அமலாக்கத்துறையின் புதிய இயக்குநர் நியமிக்கப்படும் வரை ராகுல் நவீன், பொறுப்பு இயக்குநராக செயல்படுவார் எனவும் மத்திய அரசு தெரிவித்துள்ளது.

அமலாக்கத்துறை இயக்குநரான சஞ்சய் மிஸ்ராவின் (சஞ்சய் குமார் மிஸ்ரா) (எஸ்கே மிஸ்ரா) (மிஸ்ரா) பதவி காலம் முடிவடைந்த பின்னர் 3 முறை மத்திய பாஜக அரசு பணி நீட்டிப்பு வழங்கியது. கடந்த ஆண்டு நவம்பர் மாதம் 3-வது முறையாக சஞ்சய் மிஸ்ராவுக்கு இன்னொரு பதவி நீட்டிப்பு வழங்கப்பட்டது.

மத்திய பாஜக அரசின் இந்த நடவடிக்கைக்கு எதிராக உச்சநீதிமன்றத்தில் பல வழக்குகள் தொடரப்பட்டன. காங்கிரஸ் கட்சியின் ரந்தீப்சிங் சுர்ஜிவாலா, ஜெயா தாக்கூர், திரிணாமுல் எம்பி மஹூவா மொய்த்ரா உள்ளிட்டோர் இந்த வழக்குகளைத் தாக்கல் செய்திருந்தனர்.

இந்த வழக்குகளை நீதிபதி ஆர்.ஆர்.கவாய் தலைமையிலான பெஞ்ச் விசாரித்து வந்தது. இவ்வழக்கில் இன்று உத்தரவிட்ட நீதிபதி கவாய் தலைமையிலான பெஞ்ச், அமலாக்கத்துறை இயக்குநர் எஸ்கே மிஸ்ராவின் பதவி நீட்டிப்பு சட்டவிரோதமானது. 2021-ம் ஆண்டு உச்சநீதிமன்றம் வழங்கிய தீர்ப்புக்கு எதிரானது. அமலாக்கத்துறை இயக்குநர் பதவியில் வரும் ஜூலை 31-ந் தேதி வரை மட்டும்தான் எஸ்கே மிஸ்ரா பதவியில் இருக்க வேண்டும். அதற்கு பின் அந்தப் பதவியில் அவர் நீடிக்கக் கூடாது என அதிரடியாக உத்தரவிட்டது.

பின்னர் மத்திய அரசு மீண்டும் உச்சநீதிமன்றத்தை எஸ்கே மிஸ்ராவின் பதவி நீட்டிப்புகாக நாடியது. அப்போது உச்சநீதிமன்றமானது, செப்டம்பர் 15-க்குப் பின்னர் எஸ்கே மிஸ்ரா எந்த நிலையிலும் அமலாக்கத்துறை இயக்குநராக நீடிக்கவே கூடாது; செப்டம்பர் 15-ந் தேதி நள்ளிரவுடன் எஸ்கே மிஸ்ராவின் பதவிக் காலம் முடிவடைந்ததாக கருதப்படும் என கறார் உத்தரவு பிறப்பித்தது. இதனையடுத்து செப்டம்பர் 15-ந் தேதி நள்ளிரவு நெருங்கும் நிலையில் அமலாக்கத்துறையின் இடைக்கால இயக்குநராக ராகுல் நவீன் நியமிக்கப்பட்டுள்ளார்.

English summary

IRS officer Rahul Navin has been appointed as the interim director of Enforcement Directorate.