“இந்துக்கள் இல்லையெனில்.. உலகம் அழிந்துவிடும்!” ஆர்எஸ்எஸ் தலைவர் மோகன் பகவத் கருத்து!

Updated: Saturday, November 22, 2025, 14:52 [IST]

Subscribe to Oneindia Tamil

டெல்லி: "இந்துக்கள் இல்லையெனில் உலகம் அழிந்துவிடும். வெவ்வேறு நாடுகளின் எழுச்சியையும் வீழ்ச்சியையும் நாம் கண்டோம், ஆனால் நாம் இன்னும் இங்கு இருக்கிறோம், அப்படியே இருப்போம். பாரதம் ஒரு அழியாத நாகரீகம்" என்று ஆர்எஸ்எஸ் தலைவர் மோகன் பகவத் பேசியிருப்பது விவாதங்களை தூண்டியுள்ளது.

மூன்று நாட்கள் பயணமாக மோகன் பகவத் மணிப்பூர் சென்றிருக்கிறார். அங்கு ஆர்எஸ்எஸ் உறுப்பினர்களிடையே அவர் பேசியதாவது, "இந்துக்கள் இல்லையென்றால், உலகம் இருக்காது. பல்வேறு நாடுகள் அழிந்த போதிலும், இந்தியா ஒரு சேதமுமின்றி வளர்ந்து வருகிறது. சூழல்கள் வரும், போகும். உலகில் உள்ள அனைத்து நாடுகளும் வெவ்வேறு சூழ்நிலைகளை எதிர்கொள்ள வேண்டியிருந்தது. சில நாடுகள் அழிந்தன. கிரீஸ், எகிப்து மற்றும் ரோமா ஆகிய அனைத்து நாகரீகங்களும் பூமியில் மறைந்துவிட்டன.

முழு இந்தியாவும் நமக்குச் சொந்தமானது என்பது அனைவருக்கும் இடையிலான அடிப்படை புரிதல். ஆனால் தற்போது தலைவர்கள் அரசியல் கட்டாயங்கள் காரணமாக மாறுபட்ட கருத்துக்களை வெளிப்படுத்துகிறார்கள். பாரதவர்ஷம் (பாரதம்) காலம் காலமாக இருந்து வருகிறது. மகாபாரதம், ராமாயணம் மற்றும் காளிதாசரின் சிறந்த இலக்கியங்களிலும் பாரதவர்ஷம் பற்றிய முழுமையான குறிப்புகள் உள்ளன. மணிப்பூரிலிருந்து ஆப்கானிஸ்தான் வரையிலான நிலப்பரப்பே பாரதவர்ஷம் என வரையறுக்கப்பட்டிருக்கிறது.

இந்தியா, பல பேரரசுகளின் மாற்றத்தை கண்டிருக்கிறது. பல அரசர்கள் இருந்த காலங்களும், பின்னர் ஒரு சிறந்த ஆட்சியாளர் இருந்த காலங்களும் உண்டு. நாம் சுதந்திரமாக இருந்த காலங்களும் உண்டு, தாக்குதலுக்கு உள்ளான காலங்களும் உண்டு. ஆனால் இந்தியா வலிமையாக நிலைத்து நின்று, ஐக்கியப்பட்ட ஒரு வரலாற்று நாடாக இருந்தது. இருப்பினும், 1945ல் இரண்டாம் உலகப் போருக்குப் பிறகு அரசியல் நிலப்பரப்பு மாறியது. அதன்பிறகு இந்த விஷயத்தில் வெவ்வேறு கருத்துக்கள் எழுந்தது.

ஆர்எஸ்எஸ் எந்த அரசியலிலும் ஈடுபடுவதில்லை, எந்த அமைப்பையும் ரிமோட் கன்ட்ரோல் செய்வதில்லை. இந்தியா ஒன்றுப்பட வேண்டிய நேரமிது" என்று பேசியுள்ளர். மணிப்பூரின் இம்பாலில் பழங்குடி தலைவர்களைச் சந்தித்த பாகவத், சமூக ஒற்றுமைக்கு அழைப்பு விடுத்தார்.