எதை அழிக்க முயன்றாரோ அதை வணங்கி.. அந்த பயம் இருக்கணும்... மோடியை எச்சரித்த காங்கிரஸ்..ஏன் தெரியுமா?

டெல்லி: பாஜக தலைமையிலான தேசிய ஜனநாயகக் கூட்டணியின் கூட்டத்தில் பங்கேற்ற பிரதமர் மோடி, இந்திய அரசியல் சாசனப் புத்தகத்தை கையில் எடுத்து வணங்கியதை முன்வைத்து விவாதங்கள் நடைபெறுகின்றன.

லோக்சபா தேர்தல் பிரசார களத்தில் அதிகம் பேசப்பட்டது அரசிய சாசனம் குறித்தும்தான். இந்திய தேர்தல் ஆணையமே அரசியல் சாசனத்தை எல்லாம் உங்க தேர்தல் பிரசாரத்தில் இழுத்துவிடக் கூடாது என கடிந்தும் கொண்டது.

அஸ்ஸாம் முதல்வரான பாஜகவின் ஹிமந்த பிஸ்வாஸ் சர்மா, அயோத்தியை உள்ளடக்கிய பைசாபாத் தொகுதியில் தோற்ற பாஜகவின் லல்லு சிங் தொடங்கி பாஜகவினர் கோரஷாக, 400க்கும் அதிகமான இடங்களில் பாஜக வென்றுவிட்டால் இந்தியாவின் அரசியல் சாசனத்தையே மாற்றி எழுதுவோம் என ஆவேசமாகப் பேசினர்.

இதற்கு இந்தியா கூட்டணித் தலைவர்களும் பதிலடி கொடுத்தனர். பாஜகவுக்கு மட்டும் 400 இடங்கள் கிடைத்துவிட்டால் இந்திய அரசியல் சாசனத்தை நிச்சயம் ஒழித்துவிடுவார்கள்; அத்துடன் ஒடுக்கப்பட்ட- பிற்படுத்தப்பட்ட- தாழ்த்தப்பட்ட மக்களுக்கான இடஒதுக்கீட்டையும் ஒழித்தே விடுவார்கள் எனவும் மூத்த காங்கிரஸ் தலைவர் ராகுல் காந்தி, சமாஜ்வாதி கட்சித் தலைவர் அகிலேஷ் யாதவ் உள்ளிட்டோர் பிரசாரம் செய்தனர்.

இந்தியா கூட்டணியின் இந்தப் பிரசாரம் கடும் தாக்கத்தை ஏற்படுத்தியதால், அய்யய்யோ நாங்கள் அரசியல் சாசனத்தை மாற்றி எழுத மாட்டோம் என நரேந்திர மோடி, அமித்ஷா உள்ளிட்டோர் பதறிப் போய் மறுத்தனர். ஆனாலும் வாக்காளர்களிடையே இது எடுபடவில்லை என்பதுதான் லோக்சபா தேர்தல் முடிவுகள் பல தொகுதிகளில் வெளிப்பட்டிருக்கிறது.

இந்த நிலையில் டெல்லியில் இன்று பாஜக தலைமையில் தேசிய ஜனநாயகக் கூட்டணியின் கூட்டம் நடைபெற்றது. பழைய நாடாளுமன்றத்தின் மைய மண்டபத்தில் இக்கூட்டம் நடைபெற்றது. இந்தக் கூட்டத்தில் பங்கேற்க நரேந்திர மோடி வருகை தந்தார். அப்போது அங்கே வைக்கப்பட்டிருந்த இந்திய அரசியல் சாசனப் புத்தகத்தை தொட்டு வணங்கினார். பின்னர் அதை கையில் எடுத்தும் வணங்கினார். 2019-ம் ஆண்டும் இதே போல செய்தார் மோடி.

நரேந்திர மோடி, அரசியல் சாசனப் புத்தகத்தை வணங்கியதை தமது சமூக வலைதளப் பக்கத்தில் சுட்டிக்காட்டிய தமிழ்நாடு காங்கிரஸ் கமிட்டி, "நரேந்திர மோடி எந்த அரசியலமைப்பை அழிக்க முயன்றாரோ அதே அரசியலமைப்பிற்கு இன்று தலைவணங்ககிறார். அந்த பயம் இருக்கணும்..." என பதிவிட்டுள்ளது.

English summary

TNCC Comments on Narendra Modi touches Constitution book to forehead in the Delhi NDA meeting.