நாட்டின் பெயர் இனி "இந்தியா" இல்லை? "பாரத்"? நாடாளுமன்ற சிறப்பு கூட்டத்தில் மத்திய அரசு தீர்மானம்?

டெல்லி: நாட்டின் "இந்தியா" என்ற பெயரை "பாரத்" அல்லது "பாரதம்" என மாற்றும் முயற்சியில் மத்திய அரசு பாஜக இறங்கிவிட்டது; நாடாளுமன்ற சிறப்புக் கூட்டத்தில் இதற்கான தீர்மானத்தை மத்திய அரசு கொண்டுவரக் கூடும் என எதிர்க்கட்சிகள் அச்சம் தெரிவித்துள்ளன.

லோக்சபா தேர்தலை எதிர்கொள்வதற்காக நாட்டின் பிரதான எதிர்க்கட்சிகள் அனைத்தும் இணைந்து "இந்தியா" என்ற கூட்டணியை உருவாக்கி உள்ளன. "இந்தியா" என கூட்டணிக்கு பெயர் வைத்தது முதலே மத்தியில் ஆளும் பாஜக அரசு கடுமையாக விமர்சித்து வருகிறது. மேலும் "இந்தியா" என உச்சரிப்பதற்கு பதிலாக "பாரதம்" என்ற சொல்லையே மத்திய அமைச்சர்கள், பாஜக தலைவர்கள் தொடர்ந்து பயன்படுத்தி வருகின்றனர்.

இந்நிலையில் மத்திய பாஜக அரசு திடீரென நாடாளுமன்ற சிறப்புக் கூட்டத்தை கூட்டியிருப்பதாக அறிவித்தது. செப்டம்பர் 18-ந் தேதி முதல் செப்டம்பர் 22 வரை இந்தக் கூட்டம் நடைபெற உள்ளது. இந்தக் கூட்டத்துக்கான செயல் திட்டம் இன்னமும் அறிவிக்கப்படவில்லை.

ஆனால் மத்திய அரசு கூட்டும் இந்தக் கூட்டத்தில் ஒரே நாடு ஒரே தேர்தல் எனும் மசோதா கொண்டுவரப்பட இருக்கிறது என்பது உறுதியாகி உள்ளது. அதாவது லோக்சபா, நாட்டின் அனைத்து மாநில சட்டசபைகளுக்கும் ஒரே தேர்தல் நடத்துவது என்பதுதான் மத்திய பாஜக அரசின் திட்டம். இதற்காக முன்னாள் ஜனாதிபதி ராம்நாத் கோவிந்த் தலைமையில் ஒரு குழுவையும் மத்திய அரசு அமைத்துள்ளது.

இதனிடையே அண்மைக்காலமாக மத்திய அமைச்சர்கள் "பாரதம்" என்ற சொல்லை பயன்படுத்துகின்றனர். "இந்தியா" என்பதை தவிர்த்தும் வருகின்றனர். தற்போது ஜி.20 மாநாட்டில் பங்கேற்கும் விருந்தினர்களுக்கான அழைப்பிதழில் பாரத ஜனாதிபதி என இடம்பெற்றுள்ளது. பாஜக எம்பி ஹர்நாத் சிங் என்பவரும் நாட்டின் பெயரை பாரத் என பெயர் மாற்றம் செய்ய கோரி வருகிறார். இதற்கு முன்னர் பாஜகவின் தாய் அமைப்பான ஆர்.எஸ்.எஸ்.தலைவர் மோகன் பகவத்தும் பாரத தேசம் என்றே அழைக்க வலியுறுத்தினார். தமிழ்நாட்டின் ஆளுநர் ஆர்.என்.ரவியும் பாரதம் என்ற சொல்லை பயன்படுத்தி வருகிறார்.

இதனால் மத்திய அரசு கூட்டியுள்ள நாடாளுமன்ற சிறப்புக் கூட்டத்தில் நாட்டின் பெயரான "இந்தியா" என்பதையே "பாரத்" அல்லது "பாரதம்" என மாற்ற மத்திய பாஜக அரசு திட்டமிட்டுள்ளதோ? என்ற சந்தேகம் எழுப்பப்பட்டுள்ளது. மத்திய பாஜக அரசின் இந்த சர்வாதிகாரப் போக்குக்கு திமுக, காங்கிரஸ் , இடதுசாரிகள் கடும் கண்டனமும் எதிர்ப்பும் தெரிவித்து வருகின்றன.

English summary

Union BJP Govt likely will rename India as Bharat in Parliament Special Session, sources said.