தெலங்கானா சட்டசபைத் தேர்தல்.. சரியும் பிஆர்எஸ் செல்வாக்கு! பிரசாந்த் கிஷோரை நாடிய சந்திரசேகர ராவ்?

ஹைதராபாத்: தெலங்கானாவில் வரும் 30ம் தேதி சட்டமன்ற தேர்தல் நடைபெறுகிறது. ஆனால், சந்திரசேகர ராவின் ஆளும் பிஆர்எஸ் கட்சிக்கு செல்வாக்கு குறைந்துள்ளதாக உளவுத்துறை கூறியுள்ளது. எனவே இதனை சரி செய்ய பிரபல தேர்தல் வியூக வகுப்பாளரான பிரசாந்த் கிஷோரை, அம்மாநில முதலமைச்சரும் ஆளும் பிஆர்எஸ் கட்சியின் தலைவருமான சந்திரசேகரராவ் சந்தித்திருப்பதாக தகவல்கள் வெளியாகியுள்ளன.

தெலங்கானாவில் மொத்தம் 119 சட்டமன்ற தொகுதிகள் இருக்கின்றன. இங்கு பாரத் ராஷ்டிர சமிதி (பிஆர்எஸ்) கட்சி ஆட்சியில் இருந்து வருகிறது. தேர்தலையொட்டி இக்கட்சி மீண்டும் ஆட்சியை பிடிக்க தீவிரமாக போராடி வருகிறது. ஆனால் காங்கிரஸ் பயங்கர டஃப் கொடுத்து வருகிறது. இந்நிலையில் கட்சி மீதான மக்கள் செல்வாக்கை அதிகரிக்க பிஆர்எஸ் பிரபல தேர்தல் வியூக வகுப்பாளரான பிரசாந்த் கிஷோரை நாடியுள்ளது.

அதாவது பொதுவாக தேர்தலுக்கு முன்னர் உளவுத்துறை ஆளும் கட்சிக்கு ஒரு அறிக்கையை கொடுக்கும். அதில் மாநில மக்களின் ஆதரவு ஆட்சிக்கும், கட்சிக்கும் எவ்வாறு இருக்கிறது என்பது தெளிவாக குறிப்பிடப்பட்டிருக்கும். அப்படிதான் தற்போது தெலங்கானாவில் மக்களின் மனநிலை, ஆளும் கட்சிக்கான ஆதரவு எப்படி இருக்கிறது என்பது குறித்த உளவுத்துறை அறிக்கை வெளியாகியிருக்கிறது. அதில் ஆளும் பிஆர்எஸ் கட்சிக்கு செல்வாக்கு குறைந்து வருவதாக தெரிவிக்கப்பட்டிருக்கிறது.

இதனை சரிகட்ட தான் பிரசாந்த் கிஷோரை கட்சி நாடியிருக்கிறது. அம்மாநிலத்தில் தேர்தலுக்கு இன்னும் 9 நாட்கள்தான் இருக்கின்றன. எனவே இந்த குறுகிய நேரத்தில் பிரச்னைகளை சரி செய்ய கட்சியின் தலைவரும் முதலமைச்சருமான சந்திரசேகர ராவ் மற்றும் அவரது மகனும் அமைச்சருமான கே.டி.ராமாராவ் ஆகியோர் பிரசாந்த் கிஷோரிடம் நேற்று 3 மணி நேரம் ஆலோசனை மேற்கொண்டிருப்பதாக தகவல்கள் வெளியாகியுள்ளன. இதனை சமூக ஆர்வலரும், தேர்தல் வியூக வகுப்பாளருமான குருராஜ் அஞ்சன் கூறியுள்ளார்.

கடந்த 2019ல் பாஜக மற்றும் சிவசேனா கட்சிகளுக்கு பிரசாந்த் கிஷோர் தேர்தல் வியூகங்களை வகுத்து கொடுத்த நிலையில், இவரை நம்பி கேசிஆர் களத்தில் இறங்கியுள்ளார். இவரது திட்டம் வெற்றி பெறுமா? என மிகுந்த எதிர்பார்ப்பு மேலெழுந்திருக்கிறது. எனவே இந்த விவகாரம் அம்மாநில அரசியல் தளத்தில் பேசுபொருளாகியுள்ளது.

English summary

Intelligence reports suggest that Chandrasekhara Rao's ruling BRS party has lost its influence as assembly elections in Telangana are due on November 30. Reports have surfaced that Chandrasekhara Rao has sought Prashant Kishore, election strategist, to fix this. This has created a stir in the politics of the state.