ஆள் கடத்தலா... மைனர் பெண் கடத்தலா.... அனைத்திலும் அஸ்ஸாம்தான் 'டாப்'- தமிழகம் 3வது இடம்!!

டெல்லி: ஆள் கடத்தல் மற்றும் மைனர் பெண் கடத்தலில் அஸ்ஸாம் மாநிலம்தான் முதலிடத்தில் இருப்பதாக தேசிய குற்ற ஆவணக் காப்பகம் தகவல் வெளியிட்டுள்ளது.

2015ம் ஆண்டில் பதிவாகியுள்ள குற்றங்கள் குறித்த புள்ளி விவரங்களை அண்மையில் தேசிய குற்ற ஆவணக் காப்பகம் வெளியிட்டுள்ளது. இதில் அஸ்ஸாம் மாநிலத்தில் ஆள் கடத்தல் மற்றும் மைனர் பெண் கடத்திய வழக்குகள் அதிக அளவில் பதிவாகியுள்ளது தெரிய வந்துள்ளது.

அஸ்ஸாமில் 3.22 கோடி மக்கள் தொகை கொண்ட அஸ்சாமில் 1294 ஆள் கடத்தல் வழக்குகள் பதிவாகியுள்ளன. இது நாடு முழுவதிலும் பதிவாகியுள்ள ஆள் கடத்தல் வழக்குகளில் 21.7 சதவீதமாகும்.

மே. வங்கத்தில்...

அஸ்ஸாம் மாநிலத்தை தொடர்ந்து அதன் அண்டை மாநிலமான மேற்கு வங்கத்தில் அதிக அளவில் ஆள் கடத்தல் வழக்குகள் பதிவாகியுள்ளன. 9.3 கோடி மக்கள் தொகையுள்ள மேற்குவங்கத்தில் 1,255 ஆள் கடத்தல் வழக்குகள் பதிவாகியுள்ளன. இது நாட்டில் மொத்தமாக பதிவாகியுள்ள வழக்குகளில் 18.2 சதவீதமாகும்.

மொத்தம் 40%

இந்த இரண்டு மாநிலங்களிலும் பதிவாகியுள்ள ஆள்கடத்தல் வழக்குகளின் மொத்த எண்ணிக்கை 2,799. இது மொத்தமாக இரு மாநிலங்களையும் சேர்த்து 40 சதவீத அளவாகும்.

3- வது இடம் தமிழகம்

இதற்கு அடுத்த இடத்தில் இருப்பது தமிழ்நாடுதான். இங்கு 577 ஆள் கடத்தல் வழக்குகள் பதிவாகியுள்ளன. இது மொத்த வழக்குகளில் 8.4 சதவீதமாகும்.2015ம் ஆண்டில் மட்டும் 6877 ஆள் கடத்தல் வழக்குகள் இந்தியா முழுவதும் பதிவாகியுள்ளது.

மைனர் பெண் கடத்தல்

மைனர் பெண்களை கடத்திய வழக்கிலும் அஸ்ஸாம் மற்றும் மேற்கு வங்கம் ஆகிய இரு மாநிலங்களே முதல் இரண்டு இடத்தில் இருக்கின்றன. நாடு முழுவதும் மைனர் பெண்கள் கடத்திய வழக்குகள் 3087 பதிவாகியுள்ளது. இதில் 1303 அஸ்ஸாமிலும், 1003 வழக்கு மேற்குவங்கத்திலும் பதிவாகியுள்ளது. இந்த இரு மாநிலங்களையும் சேர்த்து 74 சதவீதம் மைனர் பெண்களை கடத்திய வழக்குகள் பதிவாகியுள்ளது என்று தேசிய குற்ற ஆவணக் காப்பகம் வெளியிட்டுள்ள தகவல்கள் தெரிவிக்கின்றன.

English summary

NCRB data for 2015 also finds 74 per cent cases of procuration of minor girls pertain to the two states.