மோடி அமைச்சரவையில் மாற்றம்.. 19 புதிய அமைச்சர்கள் பதவியேற்பு.. பிரகாஷ் ஜவடேகர் கேபினட் அமைச்சரானார்

டெல்லி: பிரதமர் நரேந்திர மோடி தலைமையிலான மத்திய அமைச்சரவை பொறுப்பேற்று இரண்டு ஆண்டுகளுக்குப் பிறகு, அமைச்சரவையில் இன்று மிகப்பெரிய மாற்றம் செய்யப்பட்டுள்ளது. 19 புதிய அமைச்சர்கள் பதவியேற்றுள்ளனர். பிரகாஷ் ஜவடேகர் கேபினட் அமைச்சராக புரமோஷன் கொடுக்கப்பட்டுள்ளார்.

மத்திய விளையாட்டு துறை அமைச்சர் சர்பானந்தா சோனோவால் அசாம் மாநில முதல்வராக பதவியேற்றுள்ளதால், அந்த பதவியிடத்திற்கு அதே மாநிலத்தை சேர்ந்த ராஜன் கோஹெய்ன் நியமிக்கப்பட்டுள்ளார்.

19 புதிய மத்திய அமைச்சர்களில் 2 பெண்கள் இடம்பெற்றுள்ளனர். இதன் மூலம் மத்திய அமைச்சர்களின் எண்ணிக்கை 83 ஆக உயர்ந்துள்ளது.

மத்திய பிரதேசத்தைச் சேர்ந்த எம்.ஜே. அக்பர் மத்திய அமைச்சராகியுள்ளார். ராஜஸ்தானைச் சேர்ந்த அர்ஜூன் ராம் மெக்வால் மத்திய அமைச்சராக பதவியேற்றுள்ளார்.

கர்நாடகாவை சேர்ந்த ஜிக ஜினாகி இணை அமைச்சராக பதவியேற்றார். இவர் வட கர்நாடக பாஜகவின் முக்கிய பிரமுகராகும். மத்திய பிரதேசத்தைச் சேர்ந்த அனில் மாதவ் தவே மத்திய அமைச்சராக பதவியேற்றார். குஜராத்தை சேர்ந்த மன்சுக் எல்.மண்டாவியா, உ.பி.யை சேர்ந்த மகேந்திரநாத் பாண்டே, அனுப்பிரியா பட்டேல் ஆகியோரும் மத்திய அமைச்சர்களாக பதவியேற்றனர்.

மகாராஷ்டிராவைச் சேர்ந்த ராம்தாஸ் அத்வாலே மத்திய அமைச்சராக பொறுப்பேற்றார். டெல்லியைச் சேர்ந்த விஜய் கோயல் மத்திய இணை அமைச்சராக பொறுப்பேற்றார். குஜராத்தைச் சேர்ந்த புருஷோத்தம் ரூபாலா மத்திய இணையமைச்சராகியுள்ளார். கடவுள் மீது ஆணையிட்டு அனைவரும் அமைச்சர்களாக பதவியேற்றனர்.

English summary

Nineteen new faces are set to be inducted in the Union Council of Ministers Tuesday when Prime Minister Narendra Modi goes in for an expansion of his team.