ஏற்கனவே ஏகப்பட்ட 'ஏழரை'- ஒட்டுமொத்த "இந்தியா" கூட்டணியும் ஆடிப் போனது- மாயாவதி நிபந்தனை அப்படி!

டெல்லி: "இந்தியா" கூட்டணிக்குள் இருக்கிற பிரச்சனைகள் போதாது என பகுஜன் சமாஜ் கட்சித் தலைவர் மாயாவதி விதித்ததாக சொல்லப்படும் நிபந்தனைகள் புதிய தலைவலியை உருவாக்கி உள்ளதாக கூறப்படுகிறது.

லோக்சபா தேர்தலில் பாஜகவை வீழ்த்த 28 எதிர்க்கட்சிகள் ஒருங்கிணைந்து உருவாக்கியதுதான் "இந்தியா" கூட்டணி. இந்த கூட்டணியை உருவாக்கியதில் முக்கிய பங்கு வகித்தவர் பீகார் முதல்வர் நிதிஷ்குமார். "இந்தியா" கூட்டணி இதுவரை 4 ஆலோசனைக் கூட்டங்களை நடத்தியிருக்கிறது. இந்த 4 ஆலோசனைக் கூட்டங்களைத் தொடர்ந்து தற்போது ஒவ்வொரு மாநிலத்திலும் தொகுதிப் பங்கீட்டு பேச்சுவார்த்தைகளில் தீவிரம் காட்டுகின்றன.

"இந்தியா" கூட்டணியில் மாநில கட்சிகள் அதிகமாக இருப்பதால் ஒவ்வொரு மாநிலத்திலும் செல்வாக்குள்ள மாநில கட்சிகள், காங்கிரஸுக்கு சொற்பமான இடங்களையே ஒதுக்கி வருகின்றன. இதனை சகித்துக் கொள்ள முடியாமல் காங்கிரஸ் தத்தளித்துக் கொண்டிருக்கிறது. இன்னொரு பக்கம், தம்மை பிரதமர் வேட்பாளராக முன்னிறுத்தவில்லை என கொந்தளித்துக் கொண்டிருக்கிறார் பீகார் முதல்வர் நிதிஷ்குமார்.

உத்தரப்பிரதேசத்தைப் பொறுத்தவரை, மாயாவதியின் பகுஜன் சமாஜ் கட்சியை "இந்தியா" கூட்டணிக்குள் கொண்டு வர அம்மாநில காங்கிரஸ் கட்சி தலைவர்கள் முனைப்பு காட்டுகின்றனர். ஆனால் பகுஜன் சமாஜ் கட்சி உள்ளே வந்தால் நாங்கள் வெளியே செல்வோம் என்கிறது அகிலேஷ் யாதவின் சமாஜ்வாதி கட்சி. உத்தரப்பிரதேசத்தில் காங்கிரஸுக்கு அதிகபட்சம் 6 தொகுதிகள்தான் தர முடியும் என்கிறது அகிலேஷ் யாதவின் சமாஜ்வாதி கட்சி. இதனை ஏற்க முடியாமல்தான் பகுஜன் சமாஜ் கட்சியுடன் கூட்டணிக்கு விரும்புகின்றனர் மாநில காங்கிரஸ் தலைவர்கள்.

இந்த நிலையில் "இந்தியா" கூட்டணியில் இணைவதற்காக பகுஜன்சமாஜ் கட்சி அதிரடியாக ஒரு நிபந்தனை விதித்துள்ளதாம். அதாவது மாயாவதியை "இந்தியா" கூட்டணியின் பிரதமர் வேட்பாளராக அறிவிக்க வேண்டும் என்பதுதான் அந்த நிபந்தனையாம். ஏற்கனவே மல்லிகார்ஜூன கார்கேவை மமதாவும் அரவிந்த் கெஜ்ரிவாலும் பிரதமர் வேட்பாளராக பரிந்துரைத்ததால்தான் நிதிஷ்குமார் கோபத்தில் இருக்கிறார். இப்போது மாயாவதி இப்படி ஒரு நிபந்தனை விதித்து இலவு காத்த கிளியாக காத்திருப்பது "இந்தியா" கூட்டணியில் புகைச்சலை அதிகப்படுத்தி இருக்கிறது என்கின்றன டெல்லி தகவல்கள்.

English summary

Now heated debate over the I.N.D.I.A. bloc's decision on Mayawati as PM candidate for the Lok Sabha Election 2024.