71வது சுதந்திர தின கொண்டாட்டத்தில் ஒடிஷா முதல்வருக்கு உடல் நலக்குறைவு.. விழாவில் பரபரப்பு

சுதந்திர தினக் கொண்டாட்டத்தின் போது ஒடிஷா மாநில முதல்வருக்கு திடீர் உடல் நலக்குறைவு ஏற்பட்டதால் பரபரப்பு ஏற்பட்டது.

புவனேஸ்வர்: ஒடிஷா மாநில முதல்வர் நவீன் பட்நாயக்கிற்கு சுதந்திர தின கொண்டாட்டத்தின் போது திடீரென உடல் நலக்குறைவு ஏற்பட்டதால் அங்கு பரபரப்பு ஏற்பட்டது

இந்தியா முழுவதும் இன்று 71வது சுதந்திர தின விழா கொண்டாடப்பட்டது. ஒடிஷா தலைநகர் புவனேஸ்வரில் அம்மாநில முதல்வர் கொடியேற்றி உரையாற்றும் நிகழ்ச்சி ஏற்பாடு செய்யப்பட்டிருந்தது.

இந்த நிகழ்ச்சியில் கலந்து கொண்ட முதல்வர் நவீன் பட்நாயக், மேடை ஏறி சுதந்திர தின உரையாற்றினார். அப்போது திடீரென அவர் நிலை தடுமாறினார். இதனால் பதற்றமடைந்த பாதுகாவலர்கள், உடனடியாக அவருக்கு இருக்கையை வழங்கினார்கள்.

அப்போது, நவீன் பட்நாயக்கிற்கு முகம் முழுவதும் வேர்த்துக் கொட்டியது. அதனை நன்றாக துடைத்துக் கொண்ட பட்நாயக், இருக்கையில் அமர்ந்து சிறிது நேரம் ஆசுவாசப்படுத்திக் கொண்டார்.

இதனிடையே பாதுகாவலர்கள் அவருக்குக் குடை பிடித்தனர். இதனை அடுத்து அவர் மருத்துவமனைக்கு அழைத்துச் செல்லப்பட்டார். அங்கு அவருக்குச் சிகிச்சை அளிக்கப்பட்ட பின்னர் அவரது உடல்நிலை சீராக உள்ளதாக அதிகாரிகள் தெரிவித்துள்ளனர்.

English summary

Odisha Chief Minister Naveen Patnaik felt unwell while delivering speech on the occasion of 71st independence day in Bhubaneswar.