எப்புடி இருந்த மனுசன்.. கைதான சந்திரபாபு நாயுடு! நீதிமன்றத்தில் ஆஜர்படுத்திய போலீஸ் -ரிமாண்ட் ஆவாரா?

அமராவதி: ஆந்திர மாநில முன்னாள் முதலமைச்சர் சந்திரபாபு நாயுடு கைது செய்யப்பட்டு உள்ள நிலையில், அவர் நீதிமன்றத்தில் ஆஜர்படுத்தப்பட்டு உள்ளார்.

ஆந்திர பிரதேசத்தில் கடந்த 2014 ஆம் ஆண்டு முதல் 2019 ஆம் ஆண்டு வரை முதலமைச்சராக இருந்த சந்திரபாபு நாயுடு, திறன் மேம்பாட்டு கழக ஊழல் வழக்கில் கைது செய்யப்பட்டு இருக்கிறார். நேற்று இரவு நந்தியாலா மாவட்டத்தில் தெலுங்கு தேசம் கட்சியின் பொதுக்கூட்டத்தில் சந்திரபாபு நாயுடு கலந்துகொண்டார். அதன் பின்னர், அங்கு உள்ள ஒரு திருமண மண்டபத்தில் பேருந்து நிறுத்தி உறங்கிக் கொண்டிருந்தார்.

அப்போது, நந்தியாலா போலீசார் நேற்று அதிகாலை 6 மணியளவில் அங்கு வந்து அவரைக் கைது செய்தனர். கைது செய்யப்பட்ட சந்திரபாபு நாயுடுவுக்கு மருத்துவ பரிசோதனை செய்யப்பட்ட பின்னர், விஜயவாடாவில் உள்ள சிஐடி அலுவலகத்திற்கு அவர் அழைத்துச் செல்லப்பட்டார். அங்கு அவரிடம் ஊழல் வழக்கு தொடர்பாக பல மணி நேரம் விசாரணை நடத்தப்பட்டது.

இந்த நிலையில் இன்று காலை, விஜயவாடாவில் உள்ள ஊழல் தடுப்பு நீதிமன்றத்தில் சந்திரபாபு நாயுடு ஆஜர்படுத்தப்பட்டார். வழக்கு தொடர்பாக அவரைக் காவலில் எடுத்து விசாரிக்க அனுமதி கோரி மாநில குற்றப் புலனாய்வுத் துறை தரப்பில் மனு தாக்கல் செய்யப்பட்டது. இந்த மனு தொடர்பான விசாரணை நீதிமன்றத்தில் நடைபெற்று வருகிறது.

இதில் அவர் நீதிமன்ற காவலில் சிறைக்கு அனுப்பப்படுவாரா என்ற கேள்வி எழுந்து இருக்கிறது. தெலுங்கு தேசம் கட்சித் தலைவர் சந்திரபாபு நாயுடு மீது சுமத்தப்பட்டு உள்ள ஊழல் குற்றச்சாட்டு தொடர்பாக கடந்த சில ஆண்டுகளாக சிஐடி விசாரணை மேற்கொண்டு வருகிறது. இந்த வழக்கில் ஏற்கனவே சிலர் கைது செய்யப்பட்டு உள்ளார்கள்.

ஆளும் ஒய்.எஸ்.ஆர். காங்கிரஸ் அரசு சந்திரபாபு நாயுடு மீது அரசியல் பழிவாங்கும் நடவடிக்கை எடுப்பதாக தெலுங்கு தேசம் கட்சி தொடர்ந்து குற்றம் சாட்டி வந்தது.. இந்த நிலையில் அக்கட்சியின் தலைவரையே அம்மாநில போலீசார் கைது செய்து இருக்கும் சம்பவம் ஆந்திராவில் பெரும் பரபரப்பை ஏற்படுத்தி உள்ளது.

English summary

Former Chief Minister of Andhra Pradesh Chandrababu Naidu has been arrested and has been produced in court.