முக்காபுலா பிரபுதேவா மாதிரி.. தலை இல்லாமல் ஊர் சுற்றிய உருவம்.. ஷாக் தந்த கூகுள்மேப்!
கூகுள்மேப்பில் பதிவான தலையில்லாத உருவத்தின் படம் இணையத்தில் வைரலாகியுள்ளது.
நியூயார்க்: தலையில்லாமல் வெள்ளை நிற உடையில் சாலையில் ஒரு வினோத உருவம் நடந்து செல்வது போல் கூகுள் மேப்பில் பதிவாகியுள்ள புகைப்படங்கள் இணையத்தில் வைரலாகி நெட்டிசன்கள் மத்தியில் குழப்பத்தை ஏற்படுத்தியுள்ளது.
முன்பெல்லாம் தெரியாத இடத்திற்கு செல்கிறோம் என்றால், அங்கு உள்ளவர்களிடம் தான் விலாசம் விசாரிப்போம். ஆனால் நிலைமை இப்போது அப்படியில்லை. கூகுள் மேப் உதவியோடு அடுத்த ஊரில் இருக்கும் இடத்தைக்கூட தெளிவாக தெரிந்து கொள்ளும் வசதி வந்து விட்டது.
புதிய இடத்திற்கு செல்வதென்றால் கூகுள் மேப்பிடம் சொல்லி விட்டால் போதும், அது நம் காதுக்குள்ளேயே நுழைந்து, 'ரைட்ல திரும்பு.. லெப்ட்ல போ..' என நாம் செல்ல நினைக்கும் இடத்திற்கு கொண்டு சேர்த்துவிடும். சில சமயங்களில் கூகுள் மேப் பல்பு கொடுப்பதும் உண்டு என்பது தனிக்கதை.
தலையில்லாத உருவம்
உலகில் ஒரு சில பகுதிகளுக்கு மட்டும் கூகுள் 3டி வியூகளை வழங்குகிறது. அதாவது அந்தப் பகுதியில் நாம் உண்மையிலேயே நடந்து செல்லும் போது எப்படி உணருவோமோ அப்படியான அனுபவத்தை தரும் வியூகளை நமக்கு வழங்குகிறது. இப்படியாக சமீபத்தில் அமெரிக்காவின் நியூயார்க் மாகாண கூகுள் மேப்பில், சாலையொன்றில் தலையே இல்லாமல் வெறும் ஆடையுடன் ஒரு உருவம் நடந்து செல்வது போல புகைப்படம் பதிவாகி இருப்பது பரபரப்பை ஏற்படுத்தியுள்ளது.
ஆர்வம்
நியூயார்க் நகரில் உள்ள ப்ரூக்ளின் நேவி என்ற பகுதியில், அந்நாட்டின் கப்பல் படைக்கு சொந்தமான இடத்தில் இந்த உருவம் பதிவாகியுள்ளது. கொரோனாவின் தாக்கம் அதிகமாக இருந்த கடந்தாண்டு மே மாதத்தில் இந்த புகைப்படம் எடுக்கப்பட்டுள்ளது. இந்த வீடியோ மற்றும் புகைப்படங்கள் இணையத்தில் வெளியானதில் இருந்து, நெட்டிசன்கள் ஆர்வத்துடன் இதனைப் பகிர்ந்து வருகின்றனர்.
வைரல்
பலத்த பாதுகாப்பு மிகுந்த அப்பகுதியில் இப்படி ஒரு காட்சி பதிவாகி இருப்பது ஆச்சர்யத்தை ஏற்படுத்தியுள்ளது. ஊரடங்கு காலம் என்பதால் யாருமற்ற சாலையில் தனியாக அந்த உருவத்தின் புகைப்படம் மட்டும் பல்வேறு கோணங்களில் பதிவாகியுள்ளது. நடந்து செல்வது, நடனம் ஆடுவது என இதில் பல புகைப்படங்கள் உள்ளன. இந்த புகைப்படங்கள் தற்போது வைரலாக பரவி வருகின்றன.
கம்யூட்டர் கிராபிக்ஸ்?
ஏதேனும் தொழில்நுட்ப கோளாறு காரணமாக இப்படி பதிவாகியுள்ளதா அல்லது கம்யூட்டர் கிராபிக்ஸ் உதவியால் குறும்பர்களின் கை வரிசையா என்பது பற்றி தெளிவான தகவல்கள் இல்லை. ஆனால் காதலன் படத்தில் வரும் முக்காபுலா பாடலின் இறுதியில் பிரபுதேவா இருப்பாரே அதனை ஞாபகப் படுத்துகிறது இந்த உருவம்.
Click it and Unblock the Notifications
Sign in with Google