சிவனும் - சக்தியும் சேர்ந்தாச்சு.. ஜி ஜின்பிங் சந்திப்பில் மோடி சொன்ன மேட்டர்! கவனிக்கும் டிரம்ப்

Updated: Sunday, August 31, 2025, 14:30 [IST]

Subscribe to Oneindia Tamil

பெய்ஜிங்: 7 ஆண்டுகளுக்கு பிறகு பிரதமர் மோடி முதல் முறையாக சீனா சென்றுள்ளார். இன்று தொடங்கும் ஷாங்காய் ஒத்துழைப்பு மாநாட்டுக்கு முன்னதாக அவர் சீன அதிபர் ஜி ஜின்பிங்கை சந்தித்து பேசினார். அப்போது பிரதமர் மோடி, ‛‛எல்லையில் ஏற்பட்ட மோதல்களுக்குப் பிறகு, அமைதி மற்றும் ஸ்திரத்தன்மைக்கான சூழல் உருவாக்கப்பட்டுள்ளது. எல்லை மேலாண்மைக்காக ஒப்பந்தம் செய்யப்பட்டுள்ளது. இருநாடுகளுக்கு இடையே நேரடி விமான சேவை தொடங்கப்பட்டுள்ளது. பரஸ்பர நம்பிக்கை, மரியாதை அடிப்படையில் எங்கள் உறவுகளை முன்னோக்கி எடுத்துச் செல்ல நாங்கள் உறுதிபூண்டுள்ளோம்'' என்று கூறியுள்ளார்.

கடந்த 7 ஆண்டுகளுக்கு பிறகு பிரதமர் மோடி முதல் முதலாக சீனா சென்றுள்ளார். 2018 ம் ஆண்டு சீனாவில் நடந்த ஷாங்காய் ஒத்துழைப்பு மாநாட்டுக்கு மோடி சீனா சென்றார். அதன்பிறகு 2020 கல்வான் பள்ளத்தாக்கில் இருநாடுகள் இடையே எல்லை பிரச்சனை ஏற்பட்டு மோதல் நடந்தது. இதையடுத்து இருநாடுகள் இடையேயான உறவு மோசமானது.

we-are-committed-to-taking-our-relations-forward-on-the-basis-of-mutual-trust-says-pm-modi-to-xi-ji

இந்நிலையில் தான் தற்போது 7 ஆண்டுகளுக்கு பிறகு சீனாவின் தியான்ஜின் நகரில் இன்றும், நாளையும் ஷாங்காய் ஒத்துழைப்பு மாநாடு நடைபெற உள்ளது. இந்த மநாட்டுக்காக பிரதமர் மோடி நேற்று ஜப்பானில் இருந்து சீனா சென்றார். சீனா சென்ற பிரதமர் மோடிக்கு சிறப்பான வரவேற்பு அளிக்கப்பட்டது. நாளை வரை பிரதமர் மோடி அங்கு இருப்பார்.

ஜி ஜின்பிங் - மோடி சந்திப்பு

சீனாவின் ஷாங்காய் ஒத்துழைப்பு அமைப்பின் முதல் நிகழ்ச்சியாக பிரதமர் மோடி, சீன அதிபர் ஜி ஜின்பிங்கை சந்தித்து பேசினார். இது இருநாடுகளின் உறவில் முக்கிய மைல்கல்லாக பார்க்கப்படுகிறது.

இருநாடுகள் இடையேயான எல்லை பிரச்சனைக்கு தீர்வு கண்டு உறவை மேம்படுத்துவது தொடர்பாக அவர்கள் இருவரும் ஆலோசித்தனர். இந்த சந்திப்பின்போது பிரதமர் மோடி பேசும்போது கூறியதாவது:

ஜி ஜின்பிங்கிற்கு மோடி நன்றி

‛‛ஷாங்காய் ஒத்துழைப்பு மாநாட்டுக்கு தலைமையேற்று இருக்கும் சீனாவுக்கு நான் வாழ்த்து தெரிவிக்கிறேன். சீனாவுக்கு வரும்படி அழைப்பு விடுத்ததற்கும், இன்றைய சந்திப்புக்கும் நன்றி கூறுகிறேன். கடந்த ஆண்டு ரஷ்யாவின் கசானில் நடந்த சந்திப்பு இருநாடுகளுக்கு இடையேயான. உறவில் நேர்மறை எண்ணத்தை உருவாக்கியது. இது மிகவும் பயனுள்ளதாக அமைந்தது.

எல்லையில் ஏற்பட்ட மோதல்களுக்குப் பிறகு, அமைதி மற்றும் ஸ்திரத்தன்மைக்கான சூழல் உருவாக்கப்பட்டுள்ளது. எல்லை மேலாண்மை தொடர்பாக எங்கள் சிறப்பு பிரதிநிதிகளிடையே ஒரு ஒப்பந்தம் எட்டப்பட்டுள்ளது. அதேபோல் கைலாஷ் மானசரோவர் யாத்திரை மீண்டும் தொடங்கப்பட்டுள்ளது. இரு நாடுகளுக்கும் இடையே நேரடி விமான சேவைகளும் மீண்டும் தொடங்கப்பட்டுள்ளது.

சேர்ந்து செயல்பட வேண்டும்

இரு நாடுகளையும் சேர்ந்த 2.8 பில்லியன் மக்களின் நலன்கள் தான் எங்களின் ஒத்துழைப்பை இணைத்துள்ளது. இது மக்களின் நலனுக்கு வழிவகுக்கும் வகையில் உள்ளது. பரஸ்பர நம்பிக்கை, மரியாதை அடிப்படையில் எங்கள் உறவுகளை முன்னோக்கி எடுத்துச் செல்ல நாங்கள் உறுதிபூண்டுள்ளோம்'' என்றார்.

அதாவது சிவனும், சக்தியும் சேர்ந்தா மாஸ்டா என்ற வகையில் இருநாடுகளும் சேர்ந்து செயல்பட வேண்டும் என்று பிரதமர் மோடி விருப்பம் தெரிவித்துள்ளார். சீனாவுக்கு இந்தியாவை வைத்து செக் வைக்க வேண்டும் என்று அமெரிக்க வியூகம் வகுத்து இருந்தது.

அமெரிக்காவுக்கு சிக்கல்

ஆனால் தற்போது டிரம்பின் வரி விதிப்பு என்பது இந்தியா - அமெரிக்கா உறவை சல்லி சல்லியாக உடைத்து விட்டது. இதனால் இந்தியாவும், சீனாவும் கைகோர்த்துள்ளது. இது அமெரிக்காவுக்கு பெரும் சிக்கலாக பார்க்கப்படுகிறது. ஆசியாவில் சீனாவும், இந்தியாவும் சக்திவாய்ந்த நாடுகளாக உள்ளது. இப்படி இருக்கும்போது இருநாடுகளையம் பகைத்து கொள்வது ஆசியாவில் அமெரிக்காவின் செல்வாக்கை சரிய வைக்கும்.

அதுமட்டுமின்றி இனி சீனாவையோ, இந்தியாவையோ அமெரிக்கா சீண்டினால் இருநாடுகளும் சேர்ந்து பதிலடி கொடுக்கும் இதுவும் அமெரிக்காவுக்கு சங்கடத்தை ஏற்படுத்தும். இதனால் இந்த ஷாங்காய் மாநாட்டின் ஒவ்வொரு விஷயங்கத்தையும், அரசியல் தலைவர்களின் நடவடிக்கைகளையம் டிரம்ப் முதல் அமெரிக்காவின் தலைவர்கள் உன்னிப்பாக கவனித்து வருகின்றனர்.