உ.பி-இல் ஆக்சிஜன் இல்லாமல்.. 10 நாட்களில் 100க்கும் மேற்பட்டோர் பலி.. பாஜக எம்எல்ஏ பரபரப்பு கடிதம்

லக்னோ: உத்தரப் பிரதேசத்தில் ஆக்சிஜன் தட்டுப்பாடு இல்லை என அம்மாநில அரசு தொடர்ந்து தெரிவித்து வரும் நிலையில், ஆக்சிஜன் பற்றாக்குறையைப் போக்க உடனடியாக நடவடிக்கை எடுக்க வேண்டும் என அம்மாநில பாஜக எம்எல்ஏக்களே கடிதம் எழுதியுள்ள சம்பவம் பரபரப்பை ஏற்படுத்தியுள்ளது.

இந்தியாவில் தற்போது கொரோனா வைரசின் தாக்கம் தொடர்ந்து அதிகரித்து வருகிறது. கொரோனா 2ஆம் அலை நாட்டில் தொடங்கிவிட்டதாகவும் அது வரும் காலங்களில் மேலும் அதிகரிக்கும் எனவும் ஆராய்ச்சியாளர்கள் எச்சரிக்கை விடுத்துள்ளனர்.

கொரோனா நோயாளிகளில் ஒரு குறிப்பிட்ட சதவீத பேருக்கு மூச்சுத் திணறல் பிரச்சினை ஏற்படும். அவர்களுக்கு ஆக்சிஜன் சிலிண்டர்களின் உதவி தேவை. டெல்லி, பெங்களூரு போன்ற நகரங்களில் ஆக்சிஜன் சிலிண்டர்களுக்கு தட்டுப்பாடு ஏற்பட்டுள்ளதாகக் கூறப்படுகிறது.

ஆக்சிஜன் பற்றாக்குறை இல்லை

உத்தரப் பிரதேசத்திலும் ஆக்சிஜன் பற்றாக்குறை இருப்பதாகச் சொல்லப்பட்டது. இருப்பினும், கடந்த வாரம் செய்தியாளர்களிடம் பேசிய அம்மாநில முதல்வர் யோகி ஆதித்யநாத் உத்தரப் பிரதேசத்தில் ஆக்சிஜன் பற்றாக்குறை இல்லை என திட்டவட்டமாக மறுத்தார். ஆக்சிஜன் போதிய அளவு இருப்பதாகக் கூறிய அவர், மாநிலத்தில் ஆக்சிஜன் பற்றாக்குறை இருப்பதாகப் பொய் தகவல் பரப்புவோர் மீது நடவடிக்கை எடுக்கப்படும் என்றும் அவர் எச்சரித்தார்.

ஆக்சிஜனே இல்லை

இந்நிலையில், தனது தொகுதியில் ஆக்சிஜன் பற்றாக்குறை காரணமாக மக்களை உயிரிழக்க விட்டுவிட வேண்டாம் என்றும் கூடுதல் படுக்கைகள், ஆக்சிஜன் சிலிண்டர்கள், மருந்துகள் ஆகியவற்றை ஏற்பாடு செய்யுமாறும் வக்கிம்பூர் கோல கோக்ரநாத் தொகுதியின் பாஜக எம்எல்ஏ அரவிந்த் கிரி மாவட்ட மாஜிஸ்திரேட்டிற்கு கடிதம் எழுதியுள்ளார். கடந்த 10 நாட்களில் மட்டும் ஆக்சிஜன் பற்றாக்குறை காரணமாகத் தனது நண்பர்கள் உட்பட 100க்கும் மேற்பட்டோர் உயிரிழந்துள்ளதாகவும் அவர் தனது கடிதத்தில் குறிப்பிட்டுள்ளார்,

தேர்தல் முடிவுகள்

அதேபோல மற்றொரு பாஜக எம்எல்.ஏ பிரதாப் சிங் பஞ்சாயத்து தேர்தல் வாக்கு எண்ணிக்கையை தள்ளி வைக்க வேண்டும் எனக் கோரிக்கை விடுத்துள்ளார். இது பற்றி அவர் முதல்வர் யோகி ஆதித்யநாத் மற்றும் மாநில தேர்தல் அதிகாரி ஆகியோருக்கு கடிதம் எழுதியுள்ளார். கிராம புறங்களில் பொதுமக்களிடம் போதிய விழிப்புணர்வு இல்லை என்றும் வாக்கு எண்ணிக்கையின்போது மக்கள் ஒரே இடத்தில் கூடினால் கொரோனா பரவல் பல மடங்கு அதிகரிக்கும் அபாயம் ஏற்பட்டுள்ளதாகவும் அவர் தெரிவித்துள்ளார்.

தேர்தல் ஆணையம் மறுப்பு

இதனால் பஞ்சாயத்துத் தேர்தல் வாக்கு எண்ணிக்கையைக் குறைந்தபட்சம் ஒரு மாதமாவது தள்ளி வைக்க வேண்டும் என அவர் வலியுறுத்தியுள்ளார். இருப்பினும், வாக்கு எண்ணிக்கை திட்டமிட்டபடி நாளை நடைபெறும் என தேர்தல் ஆணையம் அறிவித்துள்ளது. தேர்தல் முகவர்களும், வேட்பாளர்களும் கொரோனா தடுப்பூசி எடுத்துக்கொண்ட சான்றிதழ்கள் அல்லது கொரோனா நெகடிவ் சான்றிதழை சமர்ப்பிக்க வேண்டியது கட்டாயம் என அறிவிக்கப்பட்டுள்ளது.

போலீஸ் நடவடிக்கை

உத்தரப் பிரதேசத்தில் மருத்துவமனைகளில் ஆக்சிஜன் கிடைப்பதில்லை, படுக்கைகள் கிடைப்பதில்லை என தொடர்ந்து பலரும் குற்றஞ்சாட்டி வருகின்றனர். முன்னதாக, கடந்த சில தினங்களுக்கும் முன் தனது தாத்தாவுக்கு ஆக்சிஜன் உதவி தேவை என ஒருவர் ட்விட்டரில் பதிவிட்டிருந்தார். உத்தரப் பிரதேச போலீசார் அவர் மீது வழக்குப்பதிவு செய்து, கைது செய்திருந்தது குறிப்பிடத்தக்கது.

English summary

Oxygen shortage for Corona patients in Uttar Pradesh.