அணிவகுத்து வந்த CISF வீரர்கள்.. தடுத்த தமிழக போலீஸ்.. யாரிந்த ஐ.ஜி. பிரேம் ஆனந்த்.. பெரிய பின்னணி

மதுரை: திருப்பரங்குன்றம் கோயிலுக்கு செல்ல CISF வீரர்களுக்கு அனுமதி மறுக்கப்பட்டு உள்ளது. திருப்பரங்குன்றத்தில் பதற்றம் நிலவும் நிலையில் தென்மண்டல ஐ.ஜி. பிரேம் ஆனந்த் சின்ஹா அங்கே முகாமிட்டு உள்ளார்.

இன்று திருப்பரங்குன்றம் மலை மேல் உள்ள உச்சிப் பிள்ளையார் கோயில் அருகே, எப்போதும் போல கார்த்திகை தீபம் ஏற்றப்பட்டது. இதையடுத்து திருப்பரங்குன்றம் மலை உச்சியில் கார்த்திகை தீபம் ஏற்ற உயர் நீதிமன்றக் கிளை உத்தரவிட்டும் எந்த ஏற்பாடுகளும் செய்யவில்லை என தனி நீதிபதி ஜி.ஆர். சுவாமிநாதன் முன்பு மனுதாரர் ராம ரவிக்குமார் முறையீடு விசாரிக்கப்பட்டது. தீபத்தூணில் விளக்கு ஏற்றாத காரணத்தால் பதற்றம். திருப்பரங்குன்றம் மலை உச்சியில் தீபம் ஏற்றக் கோரி, திரண்டிருந்த இந்து முன்னணி கட்சியினர், தடுப்புகளை உடைத்துச் சென்றனர்.

ஆனால் போலீசார் அவர்களுக்கு அனுமதி அளிக்கவில்லை. போலீசாரின் கட்டுப்பாட்டில் திருப்பரங்குன்றம் மலை கொண்டு வரப்பட்ட நிலையில் மத்திய தொழிற்பிரிவு பாதுகாப்பு படையினருடன் சென்று, இந்து அமைப்பினர் தீபம் ஏற்ற நீதிபதி ஜி.ஆர்.சுவாமிநாதன் உத்தரவிட்டார். ஆனால் அங்கே 144 தடை உத்தரவு உடனடியாக போடப்பட்டது.

இதை கருத்தில் கொண்டு திருப்பரங்குன்றம் கோயிலுக்கு செல்ல CISF வீரர்களுக்கு அனுமதி மறுக்கப்பட்டு உள்ளது. CISF வீரர்கள் தடுக்கப்பட்ட நிலையில் திருப்பரங்குன்றத்தில் தென்மண்டல ஐ.ஜி. பிரேம் ஆனந்த் சின்ஹா முகாமிட்டு உள்ளார். அவரின் கீழ் படையினர் களமிறக்கப்பட்டு உள்ளனர்.

களமிறங்கிய தென்மண்டல ஐ.ஜி. பிரேம் ஆனந்த் சின்ஹா

2001-ம் ஆண்டு தமிழ்நாடு கேடர் ஐ.பி.எஸ் அதிகாரியான பிரேம் ஆனந்த் சின்ஹா, தனது பணிக்காலத்தில் பல முக்கிய நடவடிக்கைகளால் வலுவான நற்பெயரை ஈட்டியுள்ளார். போதைப்பொருள் வலையமைப்புகளை எதிர்ப்பது முதல் சிக்கலான சட்டம்-ஒழுங்கு சூழ்நிலைகளை நிர்வகிப்பது வரை, இவரின் பணிகள் காவல்துறையின் கவனத்தை ஈர்த்துள்ளன. சிக்கலான சட்டம்-ஒழுங்கு சூழ்நிலைகளை கவனிப்பதில் இவர் திறன் கொண்டனர்.

சென்னை போதைப்பொருள் தடுப்புப் பிரிவின் (NCB) மண்டல இயக்குநராக சின்ஹா பணியாற்றியது அவரது முக்கியப் பங்களிப்புகளில் ஒன்றாகும். தமிழ்நாடு, கேரளா, புதுச்சேரி, லட்சத்தீவு ஆகிய பகுதிகளை உள்ளடக்கிய இந்த மண்டலத்தில், சின்ஹா தலைமையில் NCB போதைப்பொருள் கடத்தல் குழுக்களுக்கு எதிராகப் பல அதிரடி நடவடிக்கைகளை மேற்கொண்டது.

செயற்கைப் போதைப்பொருட்கள், கடலோரப் பகுதிகள் வழியாகக் கடத்தப்பட்ட கஞ்சா பறிமுதல், டார்க்நெட் நெட்வொர்க் தொடர்பான கைதுகள் ஆகியவை இந்த நடவடிக்கைகளில் அடங்கும். உளவுத் தகவல்கள் அடிப்படையிலான அவரது அணுகுமுறை, அப்பகுதியில் போதைப்பொருள் தடுப்புப் பணிகளுக்குப் பெரிதும் வலு சேர்த்தது.

திறமையான அதிகாரி

இதற்கு முன், சின்ஹா சென்னை அண்ணாநகரின் துணை ஆணையராகப் பணியாற்றினார். அங்கு, முக்கியக் குற்றப் பகுதிகளைக் கண்டறிய, விரிவான குற்ற வரைபட முறையை அறிமுகப்படுத்தினார்; அடிமட்டக் காவல்துறை கண்காணிப்பையும் (பீட் போலீசிங்) பலப்படுத்தினார். அப்பகுதியின் முக்கியப் பிரச்சினையாக இருந்த சங்கிலிப் பறிப்பு வழக்குகள் இவரது பதவிக்காலத்தில் குறைந்ததாகக் கூறப்பட்டது. குடியிருப்போர் சங்கங்கள், உள்ளாட்சி அமைப்புகளுடன் அவரது ஒருங்கிணைப்பு, சமூகக் காவல் மற்றும் அவசரக்காலப் பதிலளிப்பு நேரத்தை மேம்படுத்தியது.

தற்போது மதுரை தெற்கு மண்டலக் காவல் துறைத் தலைவராக (IG) உள்ள சின்ஹா, பல மாவட்டங்களில் சட்டம்-ஒழுங்கை மேற்பார்வையிடுகிறார். பெரிய கோவில் திருவிழா பாதுகாப்பு, முக்கிய காலகட்டங்களில் மாவட்ட ஒருங்கிணைப்பு, மதுரை, திண்டுக்கல், தேனி, சிவகங்கை, ராமநாதபுரம் மாவட்டங்களில் குற்றப் பதிவுகளைக் கண்காணித்தல் போன்ற பல பொறுப்புகளை அவர் ஏற்றுள்ளார்.

இவரது முறையான மேற்பார்வை மற்றும் ஒருங்கிணைப்புக்கு முக்கியத்துவம் அளிப்பதை அப்பகுதி அதிகாரிகள் சுட்டிக்காட்டியுள்ளனர். நிர்வாகத்தில் ஒரு முறையான அமைப்பையும் சின்ஹா கொண்டு வருகிறார். வணிகவியல் மற்றும் ICWA பின்னணி கொண்ட அவர், தரவு சார்ந்த திட்டமிடல், வெளிப்படையான நடைமுறைகள், காவல் நிலைய அளவில் மேம்பட்ட பொறுப்புணர்வை ஊக்குவித்துள்ளார்.

அவரின் நேர்மை, பணி திறமை ஆகியவை, மத்திய அரசால் 2021-ல் அவருக்கு ஐ.ஜி பதவி உயர்வு கிடைக்க ஒரு முக்கியக் காரணமாக அமைந்தது குறிப்பிடத்தக்கது.

English summary

CISF at Thirupparankundram Deepam on Karthigai stopped by Police: Who is IG Prem Anand Sinha