"இந்தியா" கூட்டணியின் ஒருங்கிணைப்பாளர் நிதிஷ்குமார்? மும்பை கூட்டத்தில் அறிவிப்பு?

மும்பை: லோக்சபா தேர்தலுக்காக உருவாக்கப்பட்டுள்ள எதிர்க்கட்சிகளின் "இந்தியா" கூட்டணி ஒருங்கிணைப்பாளராக ஜேடியூ மூத்த தலைவரும் பீகார் முதல்வருமான நிதிஷ்குமார் அறிவிக்கப்படக் கூடும் என தகவல்கள் தெரிவிக்கின்றன.

பீகார் முதல்வர் நிதிஷ்குமார் ஒருங்கிணைப்பில் நாட்டின் பிரதான எதிர்க்கட்சிகள் அனைத்தும் ஒன்று சேர்ந்து "இந்தியா" கூட்டணி உருவாக்கப்பட்டுள்ளன. இதன் முதல் கூட்டத்தை பீகார் மாநிலம் பாட்னாவில் நடத்தினார் நிதிஷ்குமார். இதன்பின்னர் கர்நாடகா மாநிலம் பெங்களூரில் 2-வது கூட்டம் நடைபெற்றது. அக்கூட்டத்தில் "இந்தியா" என கூட்டணிக்கு பெயரிடப்பட்டது.

"இந்தியா" கூட்டணியின் 3-வது கூட்டம் மகாராஷ்டிரா மாநிலம் மும்பையில் நடைபெற உள்ளது. வரும் 31 மற்றும் செப்டமப்ர் 1-ந் தேதி நடைபெறும் மும்பை கூட்டத்தில் "இந்தியா" கூட்டணி முக்கிய முடிவுகளை அறிவிக்கும் என அக்கூட்டணியில் இடம்பெற்றுள்ள திமுக தலைவரும் தமிழ்நாடு முதல்வருமான மு.க.ஸ்டாலின் தெரிவித்துள்ளார்.

இதனிடையே மும்பையில் நடைபெற உள்ள இந்தியா கூட்டணி கூட்டத்தில் அதன் ஒருங்கிணைப்பாளராக பீகார் முதல்வர் நிதிஷ்குமார் தேர்ந்தெடுக்கப்படக் கூடும் என தகவல்கள் வெளியாகி உள்ளன. மேலும் "இந்தியா" கூட்டணியின் சின்னம் ஒன்றும் வெளியிடப்பட உள்ளதாம்.

மும்பை கூட்டம் தொடர்பாக கருத்து தெரிவித்த பீகார் முதல்வர் நிதிஷ்குமார், இந்தியா கூட்டணி கூட்டத்தில் நான் பங்கேற்கிறேன். மேலும் சில புதிய கட்சிகள் இந்தியா கூட்டணி கூட்டத்தில் இணைய உள்ளன என்றார்.

இந்தியா கூட்டணியில் 26 கட்சிகள் இதுவரை இடம்பெற்றிருக்கின்றன. இந்நிலையில் அஸ்ஸாம் மாநிலத்தில் 3 கட்சிகளும் இதர வடகிழக்கு மாநிலங்களில் இருந்து 2 க்ட்சிகளும் உத்தரப்பிரதேசத்தில் இருந்து ஒரு கட்சியும் இந்தியா கூட்டணியின் மும்பை கூட்டத்தில் இணைய உள்ளதாகவும் கூறப்படுகிறது.

இன்னொரு பக்கம், இந்தியா கூட்டணியின் மும்பை கூட்டத்தை நீர்த்து போகச் செய்ய மத்தியில் ஆளும் பாஜக படுதீவிரமாக முயற்சித்தும் வருகிறது. இந்தியா கூட்டணியின் முக்கிய கட்சிகளில் ஒன்றான தேசியவாத காங்கிரஸை பாஜக பக்கம் இழுத்துவிடுவதற்கான அனைத்து நகவுகளையும் பாஜக மேற்கொண்டு வருகிறது. மும்பையில் கூட்டம் நடைபெறும் போது தேசியவாத காங்கிரஸ் ஏதேனும் ஒரு அதிர்ச்சி தரக் கூடிய அறிவிப்பை வெளியிடக் கூடும் என்கின்றன சில ஊடக செய்திகள்.

English summary

Accroding to the Media Reports that the Bihar CM Nitish Kumar likely to be named I.N.D.I.A. convener.