பாஜகவுக்கு ஓடிவந்துட்டா சரத்பவாருக்கு 2 'செம வெயிட்டா'ன ஆஃபர்.. 'தரகு' வேலையில் அஜித் பவார் படுபிஸி!

மும்பை: தேசியவாத காங்கிரஸ் ஒட்டுமொத்தமாக பாஜக தலைமையிலான தேசிய ஜனநாயகக் கூட்டணியில் இணைந்துவிட்டால் அக்கட்சித் தலைவர் சரத்பவாருக்கு என்ன என்ன பதவிகள் கிடைக்கும்? சரத்பவார் மகளுக்கு என்ன பதவி வழங்கப்படும் என பட்டியலை அஜித்பவார் கொடுத்துள்ளார் என்கின்றன காங்கிரஸ் வட்டாரங்கள்.

லோக்சபா தேர்தலை எதிர்கொள்வதற்கு காங்கிரஸை உள்ளடக்கிய "இந்தியா" கூட்டணியை எதிர்க்கட்சிகள் உருவாக்கி உள்ளன. "இந்தியா" கூட்டணியில் சரத்பவாரின் தேசியவாத காங்கிரஸ் முக்கிய கட்சியாக உள்ளது. மகாராஷ்டிராவில் சிவசேனாவின் ஏக்நாத் ஷிண்டே பிரிவு, தேசியவாத காங்கிரஸின் அஜித் பவார் பிரிவு என சிதறு தேங்காய்கள்தான் பாஜகவின் அணியில் உள்ளன. ஆனால் சரத்பவார் தலைமையிலான தேசியவாத காங்கிரஸ் அணி, காங்கிரஸ், உத்தவ் தாக்கரே தலைமையிலான சிவசேனா அணி ஆகியவை எதிர்க்கட்சிகளின் அணியாக உள்ளன.

இதனாலேயே "இந்தியா" கூட்டணியின் 3-வது கூட்டம் மும்பையில் நடைபெற உள்ளது. இதற்கான ஏற்பாடுகள் முழுவீச்சில் நடைபெற்று வருகின்றன. ஆனால் மும்பையில் "இந்தியா" கூட்டணி கட்சி கூட்டம் நடைபெறும் போது அந்த அணியில் இருந்து தேசியவாத காங்கிரஸ் கட்சியை முழுமையாக வெளியேற்றி தங்களது அணிக்கு கொண்டுவந்துவிட வேண்டும் என்பதில் பாஜக படுதீவிரமாக இருக்கிறது. இதற்காகவே அஜித்பவார் தொடர்ந்து சரத்பவாருடன் பேச்சுவார்த்தைகள் நடத்தி வருகிறார். இதன் ஒரு பகுதியாகவே, பிரதமர் மோடியுடன் சரத் பவார் ஒரே மேடையில் பங்கேற்றார்.

சரத்பவாரை இழுப்பதற்காக பாஜக பேசிவரும் பேரங்கள் தொடர்பான தகவல்களை காங்கிரஸ் தரப்பு வெளியிட்டிருக்கிறது. அதாவது பாஜக தலைமையிலான தேசிய ஜனநாயகக் கூட்டணிக்கு 2024 லோக்சபா தேர்தலில் ஆதரவு என சரத்பவார் அறிவித்தார் அவருக்கு மத்திய அமைச்சர் பதவி அல்லது நிதி ஆயோக் தலைவர் பதவி வழங்கப்படுமாம்; அதேபோல அவரது மகள் சுப்ரியா சுலே மற்றும் பிரஃபுல் பட்டேல் ஆகியோருக்கும் மத்திய அமைச்சர் பதவிகள் வழங்கப்படுமாம். இந்த பேரங்களை முன்வைத்துதான் அஜித் பவார் இடைவிடாமல் சரத்பவாருடன் பேச்சுவார்த்தை நடத்தி வருகிறார் என்கின்றன காங்கிரஸ் வட்டாரங்கள். ஆனாலும் சரத்பவார் இன்னமும் இறங்கிவராமல், பிடி கொடுக்காமல்தான் இருக்கிறார். ஆகையால் அனைவரும் பொறுத்திருந்துதான் முடிவ்களைப் பார்க்க வேண்டும் என்கின்றனர் காங்கிரஸ் தலைவர்கள்.

English summary

Congress sources said that the BJP offered NCP Chief Sharad Pawar berth in Union Cabinet for the Lok Sabha Election 2024 support.