குலுங்கப்போகும் காரைக்குடி.. 4 தொகுதி வேட்பாளர்களை ஆதரித்து.. தவெக தலைவர் விஜய் இன்று பிரசாரம்

Updated: Friday, April 10, 2026, 7:31 [IST]

Subscribe to Oneindia Tamil

சிவகங்கை: தமிழகத்தில் சட்டசபை தேர்தலுக்கான பணிகள் தீவிரமாக நடைபெற்று வருகிறது. தமிழ்நாடு சட்டமன்றத்துக்கு வருகிற ஏப்ரல் 23 ஆம் தேதி வாக்குப்பதிவு நடைபெறவுள்ளது. வாக்குறுதிகள், பிரச்சாரம் ஆகியவற்றால் அரசியல் களம் சூடுபிடிக்க தொடங்கியுள்ளது. தவெக தலைவர் விஜய் சிவகங்கை மாவட்டத்தில் உள்ள சிவகங்கை, திருப்பத்தூர், மானாமதுரை, காரைக்குடி ஆகிய 4 தொகுதிகளில் போட்டியிடும் வேட்பாளர்களை ஆதரித்து இன்று பிரசாரம் மேற்கொள்கிறார்.

தமிழகத்தில் வருகிற ஏப்ரல் 23 ஆம் தேதி வாக்குப்பதிவு நடைபெறுகிறது. மாநிலத்தில் திமுக, அதிமுக, தவெக, நாதக என நான்குமுனைப் போட்டி நிலவுகிறது. அனைத்து அரடசியல் கட்சியினரும் தீவிர தேர்தல் பணிகளில் ஈடுபட்டு வருகின்றனர். வாக்குறுதிகள், பிரசாரம் என அரசியல் களம் அனல் பறந்து கொண்டிருக்கிறது. தவெக தலைவர் விஜய் தமிழகத்தில் சுற்றுப்பயணம் மேற்கொண்டு மக்களிடையே தீவிர பிரசாரத்தில் ஈடுபட்டு வருகிறார்.

விஜய் பிரசாரம்

சிவகங்கை மாவட்டத்தில் உள்ள சிவகங்கை, காரைக்குடி, திருப்பத்தூர், மானாமதுரை (தனி) ஆகிய 4 தொகுதிகளில் போட்டியிடும் தமிழக வெற்றிக் கழகத்தின் வேட்பாளர்களை ஆதரித்து விஜய் இன்று பிரசாரம் மேற்கொள்ளவுள்ளார். காரைக்குடி மாநகராட்சி அலுவலகம் எதிரே உள்ள தேவர் சிலை முன்பு மதியம் 12 மணி முதல் 2.30 மணி வரை பிரசாரம் மேற்கொள்கிறார்.

மதுரை விமான நிலையத்தில் இன்று காலை புறப்படும் தவெக தலைவர் விஜய் மேலூர், திருப்பத்தூர் வழியாக காலை 11.30 மணிக்கு காரைக்குடி வருகை தரவுள்ளார். தொடர்ந்து, காரைக்குடி பேருந்து நிலையத்தில் இருந்து வஉசி சாலை, கழனிவாசல், வாட்டர் டேங்க் வழியாக தேவர் சிலை வரை திறந்த வேனில் சென்று பொதுமக்களிடம் ஆதரவு திரட்டவுள்ளார்.

37 நிபந்தனைகள்

அதைத்தொடர்ந்து, மதியம் 12 மணிக்கு மேல் தேவர் சிலை முன்பு திறந்த வேனில் நின்று தவெக தலைவர் விஜய் பேசவுள்ளார். விஜயின் பிரசாரத்துக்கு போலீஸார் 37 நிபந்தனைகளுடன் அனுமதி வழங்கியுள்ளனர். குறிப்பாக, இன்று மதியம் 12.30 மணியில் இருந்து 2 மணிக்குள் பிரசாரத்தை நிறைவு செய்ய வேண்டும். எந்த பாதையில் வருகிறாரோ அதே பாதையில் விஜய் திரும்பி செல்ல வேண்டும் என்று நிபந்தனை விதிக்கப்பட்டுள்ளது.

விஜய் ரசிகர்கள் விஜயை பார்ப்பதற்கு அதிகளவில் கூட வாய்ப்புள்ளதால், தேவர் சிலை அருகே உள்ள மரங்கள், டிரான்ஸ்பார்மர்கள், மின்கம்பங்கள் மீது ஏறி நிற்பதைத் தடுக்கும் வகையில் அவற்றை சுற்றி இரும்புத் தகரங்கள் கொண்டு அடைக்கப்பட்டுள்ளன. மதுரை, திண்டுக்கல், திருப்பத்தூர் பகுதிகளில் இருந்து வரும் வாகனங்களுக்கு மாற்றுப் பாதையில் செல்லும் வகையில் காரைக்குடி போக்குவரத்து போலீஸார் ஏற்பாடு செய்துள்ளனர்.