சச்சின் டெண்டுல்கர் சாதனையை நெருங்கிவிட்ட ஜோ ரூட்.. ஆஷஸ் தொடரில் நடந்த அதிரடி சம்பவம்!

Published: Sunday, January 4, 2026, 17:11 [IST]

Subscribe to Oneindia Tamil

மும்பை: சர்வதேச டெஸ்ட் கிரிக்கெட்டில் சச்சின் டெண்டுல்கரின் பிரம்மாண்ட சாதனையை முறியடிக்கும் வாய்ப்பு இங்கிலாந்து ஜாம்பவான் ஜோ ரூட்டிற்கு அமைந்துள்ளது. ஆஸ்திரேலியா அணிக்கு எதிரான கடைசி டெஸ்ட் போட்டியில் களமிறங்கிய ஜோ ரூட், தனது 67வது அரைசதத்தை நிறைவு செய்து அசத்தி இருக்கிறார்.

சர்வதேச டெஸ்ட் கிரிக்கெட்டில் சச்சின் டெண்டுல்கரின் சாதனையை எட்டிப்பிடிப்பது என்பதே பல வீரர்களுக்கு மிகப்பெரிய கனவாக இருக்கும். ஏனென்றால் 24 ஆண்டுகள் டெஸ்ட் கிரிக்கெட்டை விளையாடியுள்ள சச்சின் டெண்டுல்கர், 200 டெஸ்ட் போட்டிகளில் 51 சதங்கள், 68 அரைசதங்கள் உட்பட 15,921 ரன்களை விளாசி இருக்கிறார்.

இந்த நிலையில் சச்சின் டெண்டுல்கரின் சாதனையை எட்டிப்பிடிக்க இங்கிலாந்து ஜாம்பவான் ஜோ ரூட்டுக்கு வாய்ப்பு கிடைத்துள்ளது. ஆஷஸ் தொடரின் கடைசி டெஸ்ட் போட்டி சிட்னி மைதானத்தில் தொடங்கியது. இந்தப் போட்டியில் டாஸ் வென்ற இங்கிலாந்து கேப்டன் பென் ஸ்டோக்ஸ் பேட்டிங்கை தேர்வு செய்தார்.

இதன்பின் வந்த கிராலி 16 ரன்களிலும், பென் டக்கெட் 27 ரன்களிலும், பெத்தல் 10 ரன்களிலும் ஆட்டமிழந்து வெளியேறினர். இதன்பின் ஜோ ரூட் - ஹாரி ப்ரூக் கூட்டணி இணைந்தது. சிறப்பாக ஆடிய ஜோ ரூ5ட் 103 பந்துகளில் 8 பவுண்டரிகள் உட்பட 72 ரன்களை விளாசி ஆட்டமிழக்காமல் இருந்தார். சர்வதேச டெஸ்ட் கிரிக்கெட்டில் ஜோ ரூட் அடிக்கும் 67வது அரைசதம் இதுவாகும்.

இதன் மூலமாக டெஸ்ட் கிரிக்கெட்டில் அதிக அரைசதங்களை விளாசிய வீரர்கள் பட்டியலில் ஜோ ரூட் 2வது இடத்திற்கு முன்னேறி இருக்கிறார். இதன் மூலமாக வெஸ்ட் இண்டீஸ் ஜாம்பவான் ஷிவ்நரைன் சந்தர்பால் சாதனையை முறியடித்திருக்கிறார். சச்சினின் 68 அரைசதங்கள் சாதனையை சமன் செய்ய, இன்னும் ஒரேயொரு அரைசதம் அடித்தாலே போதுமானது.

அதேபோல் ஜோ ரூட் இந்தப் போட்டியில் இன்னொரு சாதனையையும் படைக்க வாய்ப்பு அமைந்துள்ளது. 163 டெஸ்ட் போட்டிகளில் ஆடியுள்ள ஜோ ரூட், இதுவரை 13,849 ரன்களை விளாசி இருக்கிறார். இந்தப் போட்டியில் இன்னும் 151 ரன்களை எடுத்தால், 14 ஆயிரம் ரன்களை எடுத்த 2வது வீரர் என்ற சாதனையை படைக்க முடியும். இதனால் ரசிகர்களிடையே அதிக எதிர்பார்ப்பு ஏற்பட்டுள்ளது.

Published On January 4, 2026