ஆர்.எம்.வீரப்பனின் 90வது பிறந்தநாள்... கருணாநிதி, ஸ்டாலின், ரஜினி நேரில் வாழ்த்து
சென்னை: முன்னாள் அமைச்சரும், பிரபல திரைப்படத் தயாரிப்பாளருமான ஆர்.எம்.வீரப்பன் இன்று தனது 90வது பிறந்தநாளைக் கொண்டாடினார்.
இதையடுத்து அவருக்கு திமுக தலைவர் கருணாநிதி நேரில் தனது வாழ்த்துக்களைத் தெரிவித்தார்.
புதுக்கோட்டை மாவட்டம் வல்லத்திராக்கோட்டை கிராமத்தில் பிறந்தவர் ஆர்.எம்.வீ.என அழைக்கப்படும் இராம. வீரப்பன். இவர் கடந்த 1977 - 1986 வரை இருமுறை மாநிலச் சட்ட மேலவை உறுப்பினராகவும், இருமுறை திருநெல்வேலி மற்றும் காங்கேயம் தொகுதிகளில் இருந்து தேர்வாகி தமிழக சட்டசபை உறுப்பினராகவும் பதவி வகித்துள்ளார்.
எம்.ஜி.ஆர், ஜெயலலிதா உள்ளிட்டோரின் அமைச்சரவைகளில் அமைச்சராகவும் பணியாற்றியுள்ளார்.
அரசியல் மட்டுமின்றி சினிமாவிலும் பிரபலமான தயாரிப்பாளராக திகழ்ந்தவர் ஆர்.எம்.வீ. சத்யா மூவிஸ் இவரது குடும்ப தயாரிப்பு நிறுவனம் ஆகும். சத்யா மூவிஸ் மூலம் எம்.ஜி.ஆர்., ரஜினி உள்பட பல்வேறு நடிகர்களின் திரைப்படங்கள் தயாரிக்கப்பட்டுள்ளன.
இந்நிலையில், இன்று தனது 90வது பிறந்தநாளைக் கொண்டாடினார் ஆர்.எம்.வீ. வீட்டிலேயே பிறந்தநாள் கொண்டாடிய ஆர்.எம்.வீ.யை அரசியல் தலைவர்கள் மற்றும் திரையுலகினர் நேரிலும், போனிலும் வாழ்த்து தெரிவித்தனர்.
திமுக தலைவர் கருணாநிதி, பொருளாளர் ஸ்டாலின், ஜெகத்ரட்சகன், வைரமுத்து உள்ளிட்டோர் ஆர்.எம்.வீ.யை நேரில் சென்று வாழ்த்தினர்.
நடிகர் ரஜினிகாந்த்தும் ஆர்.எம். வீரப்பனை நேரில் சந்தித்து, காலில் விழுந்து வணங்கி ஆசி பெற்றார்.