லிங்க்டின் தளத்தின் மூலம் என்ன கற்கலாம்? Linkedin எதற்காக பயன்படுகிறது?
லிங்க்டின் என்பது ஒரே நேரத்தில் வேலைவாய்ப்பு, தொழில்முறை தொடர்புகள், மற்றும் தனிநபர் வளர்ச்சி ஆகியவற்றின் சந்திப்புக் கட்டமாக மாறிவிட்டது. இத்தளத்தின் மூலம் பலதரப்பட்ட பயன்கள் கிடைக்கின்றன.
முதலாவதாக, தொழில்முறை சந்தையின் தற்போதைய போக்குகளைப் புரிந்துகொள்ள முடிகிறது. வேலைவாய்ப்பு அறிவிப்புகள், நிறுவனங்களின் வளர்ச்சி, துறையின் முன்னேற்றம் ஆகியவற்றைப் பற்றி நேரடி தகவல்களை பெறலாம்.
இரண்டாவதாக, தொழில்முறை நெட்வொர்க்கிங் - அதாவது, உங்களின் துறையில் உள்ள முக்கிய நபர்களுடன் தொடர்பு ஏற்படுத்துவது, ஆலோசனைகள் பெறுவது, வாய்ப்புகள் தேடுவது போன்றவை - மிக எளிதாக நடக்க முடிகிறது.
மூன்றாவதாக, பல முக்கிய நிறுவனங்கள் தங்கள் சேவைகளையும், வெற்றிகளையும், பணியாளர்களின் சாதனைகளையும் பகிர்வதால், உங்களுக்கும் தூண்டுதல் கிடைக்கும்.
நான்காவதாக, லிங்க்டின் லர்னிங் (LinkedIn Learning) போன்ற பயன்பாடுகள் மூலம் புதிய திறன்கள், சான்றிதழ்கள் ஆகியவற்றைப் பெற முடிகிறது.
முடிவில், இந்த தளத்தின் மூலம் ஒருவர் தங்களை ஒரு தொழில்முறை பிராண்டாக மாற்றி, துறையில் ஒரு நம்பகமான முகமாக வளர முடியும்.
இயல்பு மாறிவிட்டதா?
லிங்க்டின் தளம் ஆரம்பத்தில் தொழில் வளர்ச்சிக்கும், வேலை வாய்ப்பிற்கும், தொழில்முனைவோர் மற்றும் பணிபுரிபவர்களுக்கிடையே நெடுங்கால உறவுகளை கட்டி எழும் தளமாக இருந்தது. புதிய விஷயங்களை கற்கவும், தொழில்முறை திறன்களை மேம்படுத்தவும் இது முக்கியப் பங்கு வகித்தது. ஆனால், சமீபத்திய காலங்களில் லிங்க்டின் தளத்தின் இயல்பு மாறிவிட்டது.
இப்போது, லிங்க்டினில் வரும் பதிவுகளில் வெறும் 20 சதவிகிதம் மட்டுமே நேரடி தொழில்முறை சார்ந்தவை - அறிவியல், தொழில் வளர்ச்சி, வேலை வாய்ப்பு தகவல்கள் போன்றவை. மீதமுள்ள பெரும்பாலான பதிவுகள், தனிப்பட்ட வாழ்க்கை அனுபவங்களைப் பகிர்வதோ, முன்னேற்றப் பாதையை விவரிப்பதோ அல்லது வெற்றி பெற்ற தருணங்களை புகைப்படத்துடன் பகிர்வதோ ஆகியவற்றை மையமாகக் கொண்டுள்ளன.
இது ஒரு பக்கம் சில நேரங்களில் ஊக்கத்தையும் உற்சாகத்தையும் தரும். பிறரின் வெற்றி கதைகளை அறிந்தால், தங்களுக்கும் அது ஒரு பேருதவியாக இருக்கும். ஆனால் மற்றொரு பக்கம், தளத்தின் தொழில்முறை தன்மை குறைந்து, தனிப்பட்ட சமூக ஊடகத்தளங்களின் போக்கு ஏற்கப்பட்டுவிட்டது என்று குறை கூறும் நிலையும் உருவாகியுள்ளது.
போலி வேலைவாய்ப்பு
மேலும் கவனிக்க வேண்டிய விஷயம் ஒன்று உள்ளது. சிலர் லிங்க்டின் தளத்தில் போலி வேலைவாய்ப்பு விளம்பரங்களை போடுகின்றனர். "விரைவில் வேலை வாய்ப்பு," "உடனடி ஆட்சேர்ப்பு" போன்ற வார்த்தைகள் பயன்படுத்தி, நம்பிக்கையை ஏற்படுத்துகிறார்கள். இதனை முழுமையாக நம்பி, உங்கள் அனைத்து தனிப்பட்ட தகவல்களையும், சான்றிதழ்களையும் பகிர்ந்துவிடக் கூடாது. எந்த ஒரு வேலைவாய்ப்பு விளம்பரத்தையும் எதிர்கொள்ளும் முன், அந்த நிறுவனத்தின் நம்பகத்தன்மையை உறுதி செய்ய வேண்டும். விளம்பரம் செய்த நபர் உண்மையில் அந்த நிறுவனத்தைச் சேர்ந்தவரா எனவும் சரிபார்க்க வேண்டும். சிறிது ஆராய்ச்சி செய்தால், ஏமாற்றுகளிலிருந்து தப்பிக்க முடியும்.
லிங்க்டின் பதிவு
இன்னொரு பரிசீலனை செய்ய வேண்டிய அம்சம், லிங்க்டின் பதிவுகளின் வடிவமைப்பும் மாறி வருகிறது. இப்போது பலர் இன்ஸ்டாகிராம், X போன்ற தளங்களில் பிரபலமான வீடியோக்களை எடுத்து, அதற்கு சில தொழில்முறை வார்த்தைகளை இணைத்து பதிவிட்டு தங்களை தொழில்முறை பிரபலங்களாக கட்டமைத்து வருகின்றனர். உண்மையான தொழில்முறை அறிவு, ஆய்வு சார்ந்த கருத்துகள், தனித்துவமான அனுபவப் பகிர்வுகள் ஆகியவை குறைந்து விட்டன என்று சிலர் குறை கூறுகின்றனர்.
தொழில்முறை வளர்ச்சி
இதன் மூலம் கிடைக்கும் முக்கியமான பாடம் என்னவென்றால், லிங்க்டின் தளத்தை நாம் எவ்வாறு பயன்படுத்துகிறோம் என்பதே முக்கியம். தொழில்முறை வளர்ச்சிக்கு, தகுந்த நெறிமுறைகளை பின்பற்றி, உண்மையான அறிவைப் பகிர்வதும், நம்பகமான வாய்ப்புகளை தேடும் முனைவுடன் செயல்படுவதும் நமது பொறுப்பு.
இன்றைய சமூக ஊடக உலகில், தளங்களின் இயல்புகள் மாறுவது இயல்பானதே. ஆனால், அந்த தளங்களை பயன்படுத்தும் விதத்தில் நமது தெளிவும் கவனமும் இருந்தால், லிங்க்டின் போல் எந்த தளத்தையும் நம் வளர்ச்சிக்கே பயன்படுத்த முடியும்.
- குரு கிருஷ்ணன்
Click it and Unblock the Notifications
Sign in with Google