திருமலை திருப்பதியில் 3 மாதங்களுக்கு விஐபி பிரேக் தரிசனம் ரத்து! தேவஸ்தானம் அறிவிப்பு

திருப்பதி: திருப்பதியில் விஐபி பிரேக் தரிசனம் 3 மாதங்களுக்கு ரத்து செய்யப்படும் என திருமலை திருப்பதி தேவஸ்தானம் அறிவித்துள்ளது. நாளை தெலுங்கு வருடப்பிறப்பையொட்டி விஐபி தரிசனம் ரத்து செய்யப்படுவதாகவும் அறிவித்துள்ளது.

திருமலை திருப்பதி ஏழுமலையான் கோயிலுக்கு நாள்தோறும் ஆயிரக்கணக்கான பக்தர்கள் வருகை தருகிறார்கள். அது போல் பண்டிகை காலங்களில் லட்சக்கணக்கான பக்தர்கள் வருகை தருகிறார்கள். எனவே திருப்பதி ஏழுமலையான் கோயில் எப்போதுமே கூட்டம் நிறைந்து காணப்படும்.

திருப்பதி ஏழுமலையானை ரூ 300 சிறப்பு தரிசனம், திவ்ய தரிசனம் எனப்படும் நடைபாதை தரிசனம், ஆர்ஜித சேவைகள், இலவச தரிசனம் உள்ளிட்டவை மூலம் தரிசிக்கலாம். இந்த நிலையில் பண்டிகை காலங்களில் சாதாரண பக்தர்களும் ஏழுமலையானை தரிசிக்க வேண்டும் என்பதற்காக விஐபி தரிசனங்கள் ரத்து செய்யப்படும்.

நாளை தெலுங்கு வருட பிறப்பையொட்டி விஐபி தரிசனம் ரத்து செய்யப்படுகிறது. இதனால் இன்று முதலே அதற்கான பரிந்துரை கடிதங்கள் ஏற்கப்படாது. விஐபி பிரேக் தரிசனத்தில் ஐஏஎஸ், ஐபிஎஸ், அரசியல் கட்சி பிரமுகர்கள், அரசு உயரதிகாரிகளின் சிபாரிசு கடிதங்களுடன் தினமும் 4000 தரிசனம் செய்கிறார்கள்.

இவர்களுக்கென தனி வரிசை, தனி நேரம் இருக்கிறது. எனினும் இலவச தரிசனத்திற்கு செல்லும் மக்கள் மணிக்கணக்கில் காத்திருக்கும் சூழல் எழுகிறது. அதிலும் முக்கியமான பண்டிகை காலங்களில் இந்த காத்திருப்பு நேரம் என்பது அதிகரிக்கிறது. இதை கருத்தில் கொண்டுதான் விஐபி பிரேக் தரிசனம் ரத்து செய்யப்படுகிறது.

அந்த வகையில் தற்போது கோடை காலம் என்பதால் பள்ளி, கல்லூரிகளுக்கு விடுமுறையாதலால் திருப்பதிக்கு ஏராளமானோர் வருகை தருவர். பொதுவாக கடந்த காலங்களில் இலவச தரிசனத்தில் காத்திருப்பு நேரம் 30 மணி நேரங்கள் என்றெல்லாம் ஆகியிருந்தது. இதனால் பக்தர்கள் அவதியடைந்தனர். குழந்தைகள், பெரியவர்கள், உள்ளிட்டோரும் பாதிக்கப்பட்டனர்.

எனவே இந்த முறை விஐபி பிரேக் தரிசனத்தை ரத்து செய்ய முடிவு செய்துள்ளது. அதன்படி ஏப்ரல் 1 ஆம் தேதி முதல் ஜூன் 30 ஆம் தேதிவரை 3 மாதங்களளுக்கு விஐபி பிரேக் தரிசனத்தை ரத்து செய்து உத்தரவிட்டுள்ளது. எனவே விஐபி பிரேக் தரிசனத்திற்கான பரிந்துரை கடிதங்கள் மார்ச் 31 ஆம் தேதி முதலே ஏற்கப்படாது என தேவஸ்தானம் அறிவித்துள்ளது.