நீயா-நானா? பிரதமர்-முதல்வர் முன்பே பாஜக-திமுகவினர் கடும் போட்டி! விண்ணை பிளந்த கோஷங்கள்.. பரபரப்பு

திருச்சி: திருச்சியில் ரூ.20,140 கோடி மதிப்பிலான 20 திட்டங்களை பிரதமர் நரேந்திர மோடி நாட்டுக்கு அர்ப்பணிக்கும் விழாவில் முதல்வர் ஸ்டாலின் பேச எழுந்தபோது ‛மோடி.. மோடி.. ' என பாஜகவினரும், அதன்பிறகு ‛‛ஸ்டாலின்.. ஸ்டாலின்’’ என திமுகவினரும் போட்டிப்போட்டு கோஷமிட்ட சம்பவம் பெரும் பரபரப்பை ஏற்படுத்தியது.

திருச்சியில் புதிதாக கட்டப்பட்டுள்ள விமான முனையத்தை பிரதமர் நரேந்திர மோடி இன்று திறந்து வைத்தார். மேலும் தமிழ்நாட்டில் ரூ20,140 கோடி மதிப்பிலான 20 திட்டங்களை பிரதமர் மோடி இன்று நாட்டுக்கு அர்ப்பணித்தார்.

இதற்கான நிகழ்ச்சி திருச்சி விமான நிலையத்தில் நடந்தது. இதில் பிரதமர் நரேந்திர மோடியுடன் மத்திய விமான போக்குவரத்து துறை அமைச்சர் ஜோதிராதித்ய சிந்தியா, மத்திய இணையமைச்சர் எல் முருகன், ஆளுநர் ஆர்என் ரவி, முதல்வர் ஸ்டாலின், அமைச்சர்கள் நேரு, எவ வேலு, அன்பில் மகேஷ் பொய்யாமொழி உள்பட ஏராளமானவர்கள் பங்கேற்றனர்.

இந்த விழாவில் முதல்வர் ஸ்டாலின் பேசினார். அப்போது அவர், ‛‛தொட்ட துறையில் எல்லாம் தமிழ்நாடு சிகரம் தொடர்கிறது. திருச்சியில் புதிய விமான முனையத்தை திறந்து வைத்த பிரதமர் மோடிக்கு நன்றி.

தென்தமிழ்நாட்டில் ராமேஸ்வர், கன்னியாகுமரிக்கு இந்தியாவின் பல்வேறு பகுதிகளில் இருந்து மக்கள் ஆன்மிக பயணமாக வருகின்றனர். வெளிநாட்டினரும் வந்து செல்கின்றனர். இதனால் மதுரை விமான நிலையத்தை பன்னாட்டு விமான நிலையமாக அறிவிக்க வேண்டும். இதனை பிரதமர் பரிசீலனை செய்ய வேண்டும். தமிழ்நாட்டில் சேலம் உள்பட பிற விமான நிலையங்களை நவீனமயமாக்க வேண்டும்.

மேலும் சென்னை -பினாங்கு, சென்னை -டோக்கியோ இடையே நேரடி விமான சேவையை தொடங்க வேண்டும். சென்னை மெட்ரோ பணிகளை விரைவுப்படுத்த வேண்டும். தமிழக வெள்ளப்பாதிப்புகளை சரிசெய்ய நிவாரண நிதி வழங்க வேண்டும்'' என பேசினார்.

முன்னதாக முதல்வர் ஸ்டாலின் தனது உரையை தொடங்க இருக்கையில் இருந்து எழுந்தபோதே பாஜகவினர் ‛‛மோடி.. மோடி’’ என கோஷமிட்டனர். இதனால் அரங்கமே அதிர்ந்து போனது. அதன்பிறகு முதல்வர் ஸ்டாலின் தமிழகத்தின் பெருமையை பேசியபோது திமுகவினர் ‛‛ஸ்டாலின்.. ஸ்டாலின்’’ என கோஷமிட்டனர். இப்படி மாறிமாறி பாஜக மற்றும் திமுகவினர் ‛‛மோடி.. மோடி..’’, ’’ஸ்டாலின்.. ஸ்டாலின்..’’ என கோஷமிட்டதால் அங்கு பெரும் பரபரப்பு ஏற்பட்டது.

English summary

When Chief Minister Stalin spoke at the ceremony of dedicating 20 projects worth Rs.20,140 crore to the country by Prime Minister Narendra Modi in Trichy, there was a stir as the BJP members chanted Modi.. Modi..''.