ஈரான் பயன்படுத்திய ’கில் ஸ்விட்ச்’ சீனா, ரஷ்யா உதவியா? டிரம்ப் திட்டத்திற்கு செக் வைத்த கமேனி

வாஷிங்டன்: ஈரானில் அதிபர் கமேனிக்கு எதிராக போராட்டம் இரண்டு வாரங்களுக்கும் மேலாக நீடித்து வருகிறது. நாடு முழுவதும் இணைய சேவை முடக்கப்பட்ட நிலையில், செயற்கை கோள் அடிப்படையில் இணைய சேவை வழங்கும் எலான் மஸ்க்கின் ஸ்டார்லிங் இணைய சேவையை அளிக்க திட்டமிட்டு இருப்பதாக டிரம்ப் கூறிய நிலையில், இதற்கும் செக் வைக்கும் வகையில் ஒரு விஷயத்தை ஈரான் செய்துள்ளது.

ஈரானில் பொருளாதார நெருக்கடி மற்றும் விலைவாசி உயர்வு காரணமாக மக்கள் அரசுக்கு எதிரான போராட்டம் நடத்தி வருகின்றனர். பாதுகாப்புப் படையினர் போராட்டத்தை ஒடுக்கும் நடவடிக்கையில் ஈடுபட்ட போது வன்முறை ஏற்பட்டது.

ஈரானில் 12வது நாளாக போராட்டம்

போராட்ட வன்முறையின் காரணமாக உயிரிழந்தோர் எண்ணிக்கை 544 ஆக அதிகரித்துவிட்டதாக தகவல்கள் வெளியாகியுள்ளன. இதில் 496 பொதுமக்களும் 48 பாதுகாப்புப் படை வீரர்களும் கொல்லப்பட்டுள்ளனர். அங்கு இணைய சேவை, தொலைபேசி இணைப்புகள் துண்டிக்கப்பட்டதால், ஈரானில் என்ன நடக்கிறது என்ற முழுமையான தகவல்களை அறிவதில் தாமதம் ஏற்படுகிறது.

கடந்த 2 வார போராட்டங்களில் 10,600-க்கும் மேற்பட்டோர் கைது செய்யப்பட்டுள்ளனர். 12வது நாளாக போராட்டம் தீவிரம் அடைந்துள்ள நிலையில் போராட்டத்தை முடிவுக்கு கொண்டு வர பல்வேறு அடக்குமுறைகளை கமேனி ஆட்சி நிர்வாகம் கொண்டு வருகிறது.

இணைய சேவை முடக்கம்

ஈரானில் போராட்டத்தை முடிவுக்கு கொண்டு வர நாடு முழுவதும் இணைய சேவை முடக்கப்பட்டது. ஒட்டு மொத்த நாட்டிலும் இணைய சேவை முடக்கப்பட்டதால் தவித்த ஈரானிய மக்கள் ஆப்ஷன் பி யாக எலான் மஸ்கின் ஸ்டார் லிங் இணைய சேவையை பயன்படுத்த ஆரம்பித்தனர். ஈரானில் என்ன நடக்கிறது என்பது பற்றிய தகவல்களை ஸ்டார்லிங் இணைய சேவை பயன்படுத்தி ஈரானிய மக்கள் வெளி உலக்குக்கு அனுப்பி வந்தனர்.

ஆனால், தற்போது ஸ்டார்லிங் இணைய சேவையும் பாதிக்கப்பட்டுள்ளதாக கூறப்படுகிறது. முதலில் 30 சதவீதம் அளவுக்கு ஸ்டார்லிங் இணைய சேவை முடங்கிய நிலையில், தற்போது 80 சதவீதம் அளவிற்கு சேவை பாதிக்கப்பட்டுள்ளதாக ஈரானிய செய்தி நிறுவனங்கள் தெரிவித்துள்ளன.

கில் ஸ்விட்ச் ஜாமர்

செயற்கைகோள் அடிப்படையிலான இணையசேவைதானே இது எப்படி முடங்கும் என்ற கேள்வி எழலாம். இங்குதான் ஈரான், எலான் மஸ்க்கிற்கே தண்ணி காட்டியதாக சொல்லப்படுகிறது. அதாவது, கில் ஸ்விட்ச் எனப்படும் ஜாமரை ஆன் செய்து ஸ்டார்லிங் சேவை பெறுவதில் இடையூறு ஏற்படுத்தியிருப்பதாக சொல்லப்படுகிறது.

மிகவும் விலை உயர்ந்த மற்றும் ராணுவத் தர ஜாமிங் கருவிகளை பயன்படுத்தி இணைய சேவைக்கு இடையூறு ஏற்படுத்தியதாக சொல்லப்படுகிறது. ஈரானிடம் இதுபோன்ற கருவிகள் இல்லை. எனவே, ரஷ்யா அல்லது சீனா இதை விநியோகித்து இருக்க வாய்ப்பு உள்ளதாக சொல்லபடுகிறது.

ஈரான் வரம்பை மீறிவிட்டது

ஈரானில் இணைய சேவை பாதிக்கப்பட்டு இருப்பதால், அங்கு இணைய சேவை வழங்குவதற்காக எலான் மஸ்கிடம் பேச இருப்பதாக அமெரிக்க அதிபர் டொனால்ட் டிரம்ப் கூறியிருந்தார். இந்த சூழலில்தான் ஈரானில் ஸ்டார்லிங் இணையசேவையே முடங்கியிருப்பதாக சொல்லப்படுகிறது. ஈரான் விவகாரத்தில் விரைவில் உறுதியான நடவடிக்கை எடுக்கப்படும் என்று டிரம்ப் அண்மையில் எச்சரித்து இருந்தார்.

டிரம்ப் இது தொடர்பாக கூறுகையில், ஈரான் வரம்பை மீறிவிட்டதாக நினைக்கிறேன். அவர்கள் அவ்வாறு செய்தால், இதற்கு முன்பு ஒருபோதும் தாக்கப்படாத அளவில் நாங்கள் அவர்களைத் தாக்குவோம். கொல்லப்படக்கூடாத சிலர் கொல்லப்பட்டுள்ளனர். அவர்கள் தலைவர்களா அல்லது வன்முறை மூலம் ஆட்சி செய்கிறார்களா என்று எனக்குத் தெரியவில்லை.

பேச்சுவார்த்தை நடத்த அழைப்பு

ஆனால் நாங்களும் ராணுவமும் இதை மிகவும் தீவிரமாகப் பார்க்கிறோம், நாங்கள் ஒரு தீர்மானத்தை எடுப்போம். அவர்களுடன் ஒரு சந்திப்பை ஏற்பாடு செய்ய எனது நிர்வாகம் பேச்சுவார்த்தை நடத்தி வருகிறது. அமெரிக்காவினால் தாக்கப்படுவதில் அவர்கள் சோர்வடைந்துவிட்டார்கள் என்று நினைக்கிறேன்.

ராணுவ நடவடிக்கை குறித்த அவர்களது அச்சுறுத்தல்களுக்குப் பிறகு, ஈரான் தலைவர்கள் பேச்சுவார்த்தை நடத்த அழைப்பு விடுத்தனர், மேலும் ஒரு கூட்டம் ஏற்பாடு செய்யப்பட்டுள்ளது" என்றார்.

English summary

Protests against Iran President Khamenei have continued for over two weeks. With internet services shut down across the country, Donald Trump said that Elon Musk’s Starlink satellite internet could be offered to Iranian citizens. In response, Iran has taken specific measures to counter this plan.