அமெரிக்க வெள்ளை மாளிகையில் பரபரப்பு! ஆயுதத்துடன் சுற்றிய நபர் மீது சீக்ரெட் சர்வீஸ் துப்பாக்கிச்சூடு

வாஷிங்டன்: அமெரிக்க அதிபரின் அதிகாரப்பூர்வ இல்லமான வெள்ளை மாளிகை அருகே இன்று மர்மமான முறையில் துப்பாக்கியுடன் சுற்றிய நபர் மீது சீக்ரெட் சர்வீஸ் படையினர் துப்பாக்கிச்சூடு நடத்தியுள்ளனர். வெள்ளை மாளிகை அருகே நடைபெற்று இருக்க கூடிய இந்த சம்பவம் பெரும் பரபரப்பையும் அதிர்ச்சியையும் ஏற்படுத்தியுள்ளது.

அமெரிக்காவில் வாஷிங்டன் டிசி நகரில் வெள்ளை மாளிகை உள்ளது. அமெரிக்க அதிபராக இருப்பவரின் அதிகாரப்பூர்வ இல்லம் என்பதால் இங்கு எப்போதுமே பலத்த பாதுகாப்பு போடப்பட்டு இருக்கும். உலகில் அதிக பாதுகாப்பு கொண்ட இடங்களில் ஒன்றாக வெள்ளை மாளிகை உள்ளது. அமெரிக்க அதிபருக்கு பாதுகாப்பு அளிக்கு சீக்ரெட் சர்வீஸ் படையினரின் முழு கட்டுப்பாட்டுக்குள் உள்ள வெள்ளை மாளிகையில், ஒரு துரும்பு கூட அவர்களின் கண்களை மீறி செல்ல முடியாத அளவுக்கு கடுமையான கெடுபிடிகள் இருக்கும்.

இந்த நிலையில்தான் வெள்ளை மாளிகை அருகே ஆயுதத்துடன் வந்த நபர் ஒருவர் அங்கு இருந்த பாதுகாப்பு அதிகாரிகளுடன் மோதலில் ஈடுபட்டு இருக்கிறார். இதையடுத்து, சீக்ரெட் சர்வீஸ் துப்பாக்கிச்சூடு நடத்தியுள்ளனர். அமெரிக்க நேரப்படி ஞாயிற்றுக்கிழமை இரவு இந்த சம்பவம் நடைபெற்றுள்ளது. இந்த நிகழ்வு நடைபெற்ற போது அமெரிக்க அதிபர் டொனால்டு டிரம்ப் வெள்ளை மாளிகையில் இல்லை. வார இறுதி நாள் என்பதால் புளோரிடாவில் உள்ள Mar-a-Lago இல்லத்திற்கு அவர் சென்று இருக்கிறார்.

வெள்ளை மாளிகையின் மேற்கு பகுதியில் உள்ள ஐசனோவர் நிர்வாக அலுவலகக் கட்டிடம் அருகே இந்த சம்பவம் நடைபெற்றுள்ளது. தற்கொலை செய்து கொள்ளும் எண்ணத்துடன் அந்த நபர் வெள்ளை மாளிகை பகுதிக்கு வந்து இருப்பதாக அமெரிக்க பாதுகாப்பு படை அதிகாரிகள் கூறியுள்ளனர். இண்டியானா மாகாணத்தை சேர்ந்த அந்த நபர் வெள்ளை மாளிகை பகுதிக்கு வருவதாக ஏற்கனவே அமெரிக்க பாதுகாப்பு படை அதிகாரிகள், சீக்ரெட் சர்வீஸ்க்கு அலர்ட் செய்து இருக்கிறார்கள்.

அதன்பிறகுதான், அங்கு வந்த நபர் ஒருவரை அதிகாரிகள் விசாரித்த போது, தன்னிடம் இருந்த துப்பாக்கியை எடுத்து சுட்டுள்ளார். இதையடுத்துதான் அந்த நபர் மீது சீக்ரெட் சர்வீஸ் படையினர் பதில் தாக்குதல் நடத்தியுள்ளனர். தற்போது மருத்துவமனையில் அனுமதிக்கப்பட்டுள்ள அந்த நபரின் நிலை என்ன என்பது குறித்து சீக்ரெட் சர்வீஸ் தரப்பில் எந்த தகவலும் தெரிவிக்கப்படவில்லை. அமெரிக்க அதிபரின் அதிகாரப்பூர்வ இல்லம் அருகே நடைபெற்று இருக்க கூடிய இந்த சம்பவம் பெரும் பரபரப்பை ஏற்படுத்தியுள்ளது..

English summary

Secret Service agents opened fire on a man who was mysteriously walking around with a gun near the White House, the official residence of the US President, today. The incident, which is believed to have taken place near the White House, has caused great excitement and shock.