Aloevera: வெயிலில் உடலை குளுமையாக்க கற்றாழை மோர்! செய்வது எப்படி? யாரெல்லாம் குடிக்கக் கூடாது?

சென்னை: கோடையில் கத்தரி வெயிலின் தாக்கம் தாளித்து எடுத்து வரும் நிலையில் உடலை குளிர்ச்சியாக வைத்துக் கொள்ள கற்றாழை மோரை வீட்டிலேயே செய்வது எப்படி என்பதை பார்க்கலாம்.

வெயிலின் தாக்கம் அதிகரித்து வரும் இக்காலக்கட்டத்தில், உடலைக் குளிர்ச்சியாகவும் ஆரோக்கியமாகவும் வைத்திருப்பது மிகவும் அவசியமாகும். சந்தைகளில் விற்கப்படும் செயற்கைக் குளிர்பானங்களை விட, நம் வீட்டிலேயே இயற்கையான முறையில் தயாரிக்கும் பானங்கள் உடலுக்கு அதிக நன்மை பயக்கும்.

அந்த வகையில், உடலின் வெப்பத்தைத் தணித்து, உடனடி ஆற்றலைத் தரும் 'கற்றாழை மோர்' (Aloe Vera Buttermilk) எவ்வாறு செய்வது மற்றும் அதன் அசாத்திய மருத்துவப் பலன்கள் குறித்து இங்கே காண்போம்.

கற்றாழை மோர் செய்யத் தேவையான பொருட்கள்:

கற்றாழை ஜெல் (Aloe Vera Gel): 2 அல்லது 3 டேபிள் ஸ்பூன் (நன்கு கழுவப்பட்டது)

கெட்டித் தயிர்: 1 கப்

தண்ணீர்: தேவையான அளவு

இஞ்சி: ஒரு சிறிய துண்டு

பச்சை மிளகாய்: பாதியில் சிறிய துண்டு (விருப்பப்பட்டால்)

கருவேப்பிலை, கொத்தமல்லி: சிறிதளவு

சீரகத் தூள்: அரை தேக்கரண்டி

உப்பு: தேவையான அளவு

கற்றாழை மோர் தயாரிக்கும் முறை

கற்றாழையைச் சுத்தம் செய்தல்: முதலில் கற்றாழை மடலின் இருபுறமும் உள்ள முட்களை நீக்கிவிட்டு, அதன் மேல் தோலைச் சீவ வேண்டும். உள்ளே இருக்கும் ஜெல்லி போன்ற பகுதியை எடுத்து, தண்ணீரில் 7 முறை நன்கு அலச வேண்டும். (அலசாவிட்டால் அதன் கசப்புத் தன்மையும், லேசான வாடையும் மாறாது).

அரைத்தல்: நன்கு கழுவிய கற்றாழை ஜெல்லுடன் இஞ்சி, பச்சை மிளகாய், கருவேப்பிலை, கொத்தமல்லி ஆகியவற்றை மிக்ஸியில் போட்டு லேசாக அரைத்துக் கொள்ளவும்.

மோர் சேர்த்தல்: அதனுடன் ஒரு கப் தயிர், தேவையான அளவு உப்பு, சீரகத் தூள் மற்றும் குளிர்ந்த நீர் (Ice Water) அல்லது சாதாரண நீர் சேர்த்து மிக்ஸியை ஒருசுற்று ஓடவிடவும்.

பரிமாறுதல்: இப்போது நுரைப்பொங்க சுவையான, ஆரோக்கியமான கற்றாழை மோர் தயார். இதனை வடிகட்டியோ அல்லது அப்படியே புத்துணர்ச்சியுடன் பருகலாம்.

கற்றாழை மோரின் வியக்கவைக்கும் மருத்துவப் பலன்கள்:

கற்றாழையும் மோரும் தனித்தனியாகவே பல்வேறு மருத்துவக் குணங்களைக் கொண்டவை. இவை இரண்டும் இணையும் போது உடலுக்குக் கிடைக்கும் நன்மைகள் இரட்டிப்பாகின்றன.

உடல் வெப்பத்தைத் தணிக்கும்: கற்றாழை இயற்கையிலேயே உடலுக்குக் குளிர்ச்சி தரக்கூடியது. மோருடன் இணையும் போது உடலின் உள் வெப்பநிலையைச் சீராக்கி, கோடைக்காலக் கட்டிகளிலிருந்து உடலைக் காக்கிறது.

செரிமானக் கோளாறுகளுக்கு முற்றுப்புள்ளி: அஜீரணம், நெஞ்செரிச்சல், அசிடிட்டி மற்றும் வயிற்றுப் புண் (Ulcer) உள்ளவர்கள் காலையில் வெறும் வயிற்றில் இந்த மோரைக் குடித்து வர, நல்ல நிவாரணம் கிடைக்கும்.

மலச்சிக்கல் தீரும்: கற்றாழையில் உள்ள நார்ச்சத்து மற்றும் நீர்ச்சத்து குடல் இயக்கத்தைச் சீராக்கி, நாள்பட்ட மலச்சிக்கல் பிரச்சினையை எளிதில் குணமாக்குகிறது.

உடல் எடையைக் குறைக்கும்: இதில் கலோரி அளவு மிகக் குறைவு. வளர்சிதை மாற்றத்தை (Metabolism) அதிகரிப்பதால், உடலில் உள்ள தேவையற்ற கொழுப்புகளைக் கரைத்து உடல் எடையைக் குறைக்க நினைப்போருக்கு இது ஒரு சிறந்த டயட் பானமாகும்.

சருமம் மற்றும் கூந்தல் ஆரோக்கியம்: கற்றாழை மோர் தொடர்ந்து குடித்து வர, ரத்தம் சுத்திகரிக்கப்பட்டு முகம் பொலிவுறும். தோலில் ஏற்படும் வறட்சி நீங்கி, கூந்தல் வளர்ச்சியும் மேம்படும்.

சர்க்கரை அளவைக் கட்டுப்படுத்தும்: நீரிழிவு நோய் (Diabetes) உள்ளவர்கள், உப்பிற்குப் பதிலாக லேசான சீரகத்தூள் மட்டும் சேர்த்து இந்த மோரைக் குடித்து வந்தால், ரத்தத்தில் சர்க்கரையின் அளவு சீராக இருக்க உதவும்.

கற்றாழை மோர் உடலுக்கு மிகவும் நல்லது என்றாலும், குளிர்ச்சித் தன்மை அதிகம் கொண்டதால் சளி, இருமல் அல்லது ஆஸ்துமா தொந்தரவு உள்ளவர்கள் வாரத்திற்கு ஒன்று அல்லது இரண்டு முறை மட்டும் மதிய வேளையில் குடிப்பது நல்லது.

English summary

As the intense Kathiri Veyil continues to scorch Tamil Nadu, many are looking for natural ways to keep the body cool. Here’s how to prepare refreshing Aloe Vera Buttermilk at home to stay hydrated and refreshed during the summer season.