சம்பா கோதுமை ரவை கஞ்சி! டயட் இருப்பவர்களுக்கான சிறந்த ஃபைபர் நிறைந்த இரவு உணவு!

Broken Wheat Porridge Recipe In Tamil: இரவு நேரத்தில் என்ன சமைப்பது என்று குழப்பமாக இருக்கிறதா? உடல் எடையை குறைக்க நினைப்பவர்களுக்கு ஏற்ற, அதே சமயம் வயிறு நிறையக்கூடிய ஆரோக்கியமான உணவு வேண்டுமா? சர்க்கரை நோயாளிகள் மற்றும் டயட்டில் இருப்பவர்களுக்கு உகந்த ஒரு ரெசிபியைத் தான் இன்று நாம் பார்க்கப் போகிறோம். கோதுமை ரவை அல்லது சம்பா கோதுமை என்று அழைக்கப்படும் இந்த தானியம், அரிசிக்கு மிகச்சிறந்த மாற்றாகும்.

இதில் உள்ள நார்ச்சத்து செரிமானத்தை மெதுவாக்கி, ரத்தத்தில் சர்க்கரை அளவு திடீரென உயர்வதைத் தடுக்கிறது. நீண்ட நேரம் பசி எடுக்காமல் தடுக்கும் இந்த உணவு, உடல் பருமனை குறைக்க விரும்புவோர் தாராளமாக பயன்படுத்தலாம். சுலபமாக செய்யக் கூடிய இந்த கஞ்சி, உங்கள் இரவு உணவை ஆரோக்கியமானதாகவும், அதே சமயம் சுவையானதாகவும் மாற்றும் என்பதில் எள்ளளவும் சந்தேகமே இல்லை. இதனைத் தயாரிப்பது மிகவும் எளிது.

இந்த கோதுமை ரவை கஞ்சியில் ஏராளமான சத்துக்கள் நிறைந்துள்ளன. குறிப்பாக, இதில் உள்ள அதிகப்படியான நார்ச்சத்து மலச்சிக்கல் பிரச்சனையை தீர்க்க பெரிதும் உதவுகிறது. அரிசி உணவுகளைத் தவிர்த்துவிட்டு, குறைந்த கலோரி கொண்ட உணவை தேடுபவர்களுக்கு இது ஒரு மிகச்சிறந்த தேர்வாகும். இதில் நாம் சேர்க்கும் பாசிப்பருப்பு மற்றும் காயறிகள், உடலுக்குத் தேவையான புரதச்சத்தையும் அத்தியாவசிய வைட்டமின்களையும் தாதுக்களையும் வழங்குகின்றன.

அதிக சத்துக்கள் கொண்ட இந்த கஞ்சியை எப்படி செய்யலாம் என்பதை தெரிந்து கொள்ளலாம்.

தேவையான பொருட்கள்

• கோதுமை ரவை (Broken Wheat) - 1 கப்
• பாசிப்பருப்பு (Moong Dal) - 1/4 கப்
• சின்ன வெங்காயம் - 10 (பொடியாக நறுக்கியது)
• தக்காளி - 1 (நறுக்கியது)
• இஞ்சி பூண்டு விழுது - 1 டீஸ்பூன்
• பச்சை மிளகாய் - 2
• கேரட், பீன்ஸ் - 1/2 கப் (நறுக்கியது)
• மஞ்சள் தூள் - 1/4 டீஸ்பூன்
• சீரகம் - 1 டீஸ்பூன்
• மிளகு - 1/2 டீஸ்பூன்
• உப்பு - தேவையான அளவு
• தண்ணீர் - 5 கப்
• கொத்தமல்லி தழை - சிறிதளவு

செய்முறை விளக்கம்

• முதலில், கோதுமை ரவை மற்றும் பாசிப்பருப்பை நன்றாகக் கழுவி 15 நிமிடங்கள் தண்ணீரில் ஊற வைக்கவும்.
• பின், ஒரு பிரஷர் குக்கரில் ஒரு டீஸ்பூன் எண்ணெய் அல்லது நெய் ஊற்றி மிதமான தீயில் சூடாக்கவும்.
• அடுத்து, சீரகம் மற்றும் மிளகு சேர்த்து பொரிந்ததும், நறுக்கிய சின்ன வெங்காயம் மற்றும் பச்சை மிளகாய் சேர்த்து பொன்னிறமாக வதக்கவும்.
• பிறகு, இஞ்சி பூண்டு விழுது சேர்த்து அதன் பச்சை வாசனை முழுமையாகப் போகும் வரை வதக்க வேண்டும்.
• அடுத்து, நறுக்கிய தக்காளி மற்றும் காய்கறிகளைச் சேர்த்து, தக்காளி குழைந்து வரும் வரை நன்கு வதக்கவும்.
• இறுதியாக, ஊறவைத்த கோதுமை ரவை, பாசிப்பருப்பு, மஞ்சள் தூள், தேவையான அளவு உப்பு மற்றும் 5 கப் தண்ணீர் சேர்த்து குக்கரை மூடவும்.
• மிதமான தீயில் 3 முதல் 4 விசில் வரும் வரை வேக வைத்து, பிரஷர் தானாக அடங்கியதும் குக்கரைத் திறக்கவும்.
• கஞ்சி கெட்டியாக இருந்தால் சிறிது சுடுதண்ணீர் சேர்த்து கிளறி, நறுக்கிய கொத்தமல்லி தழை தூவி இறக்கவும்.