100 வயதில் கன்னி சாமியாக சபரிமலை வந்த பாட்டி.. ஐயப்பனிடம் வைத்த "சர்வதேச அளவிலான" பிரார்த்தனை

Updated: Saturday, December 9, 2023, 16:17 [IST]

Subscribe to Oneindia Tamil

சபரிமலை: 100 வயதில் மாலை அணிந்து கன்னிச்சாமியாக சபரிமலைக்கு வந்து ஐயப்பனை தரிசனம் செய்துள்ளார் மூதாட்டி ஒருவர். பாலஸ்தீனம் - இஸ்ரேல் இடையேயான போர் முடிவுக்கு வர வேண்டும் என்று ஐயப்பனிடம் பிரார்த்தனை செய்ததாகவும் அந்த பாட்டி கூறியுள்ளார்.

சபரிமலை ஐயப்பன் கோவிலில் மண்டல பூஜை காலம் நடைபெற்று வருகிறது. இதற்காக கோவில் நடை நவம்பர் 16ஆம் தேதி திறக்கப்பட்டது. 17ஆம் தேதி முதல் தினசரியும் ஆயிரக்கணக்கான பக்தர்கள் இருமுடி சுமந்து வந்து ஐயப்பனை தரிசனம் செய்து வருகின்றனர். இதுவரைக்கும் 10 லட்சத்திற்கும் மேற்பட்ட பக்தர்கள் சாமி தரிசனம் செய்துள்ளனர்.

100 year old age women who came to Sabarimala dharsan as a Kanni samy

சபரிமலையில் வரும் 27ஆம் தேதியன்று மண்டல பூஜைகள் நடைபெற உள்ளன. இந்த ஆலயத்திற்கு தவழ்ந்து வரும் குழந்தை முதல் 100 வயதானவர்கள் வரை மாலை அணிந்து வருகின்றனர். அந்த வகையில் கேரளாவை சேர்ந்த 100 வயது மூதாட்டி ஒருவர் கன்னிசாமியாக மாலை அணிந்து வந்து சபரிமலை சென்று சாமி தரிசனம் செய்துள்ளார்.

வயநாடு மாவட்டம் மூந்நானக்குழியை சேர்ந்தவர் பாருக்குட்டி அம்மா. அவர் தனது 100 வயதில் மாலையிட்டு விரதமிருந்த அவர் தனது பேரப்பிள்ளைகள் மற்றும் பிள்ளைகளுடன் பம்பை வந்தார். பின்னர் டோலி மூலம் சபரிமலை சன்னிதானம் சென்று சாமி தரிசனம் செய்தார்.

சாமி தரிசனம் செய்த பின்னர் பாருக்குட்டி அம்மா பேசிய போது " முன்பே சபரிமலைக்கு வரவேண்டும் என்று ஆசைப்பட்டேன். ஆனால் அந்த ஆசை நிறைவேறவில்லை. 100 வயதில் தான் சபரிமலைக்கு செல்ல வேண்டும் என்று அப்போது முடிவு செய்தேன். அதன்படி இப்போது சபரிமலைக்கு வந்துவிட்டேன். பதினெட்டாம் படியில் ஏறிச்சென்று பொன்னம்பலத்தை தரிசனம் செய்தேன். பகவானை பார்த்த போது கண்ணும் மனதும் நிறைந்துவிட்டது என்று கூறினார்.

3 தலைமுறைகளை சேர்ந்தவர்களுடன் வந்து 100 வயது பாட்டி சபரிமலையில் சாமி தரிசனம் செய்தது பக்தர்களுக்கு நெகிழ்ச்சியை ஏற்படுத்தியது. இதையடுத்து பாருக்குட்டி அம்மாவுக்கு சால்வை அணிவித்து மரியாதை அளிக்கப்பட்டது. சாமியே சரணம் ஐயப்பா என்று பக்தர்கள் பலரும் அப்போது முழக்கமிட்டனர்.