வீட்டில் சிவலிங்கங்களுக்கு அன்னாபிஷேகம் செய்ய உகந்த நேரம் எது? ஜென்மத்திற்கும் உணவு பஞ்சம் வராது!

சென்னை: ஐப்பசி மாதம் பவுர்ணமியையொட்டி இன்று அன்னாபிஷேகம் நடைபெறும் நிலையில் உங்கள் வீட்டில் உள்ள சிலைகளுக்கு அன்னத்தால் அபிஷேகம் செய்ய நல்ல நேரம் என்ன என்பதை தெரிந்து கொள்ளலாம். ஆண்டுக்கு ஒரு முறை மட்டுமே் நடக்கும் முக்கிய நிகழ்வு இது.

இந்த நன்னாளில் சிவலிங்கத்திற்கு சார்த்தப்படும் ஒவ்வொரு அன்னமும் ஒவ்வொரு சிவலிங்கங்களாக பாவிக்கப்படுகின்றன. அன்னாபிஷேகத்தை தரிசித்தால் அந்த பக்தரின் தலைமுறைக்கே உணவு தட்டுப்பாடு வராது என்கிறார்கள்.

ஐப்பசி மாத பவுர்ணமியும் அஸ்வினி நட்சத்திரமும் இணைந்து வரும் நாளில்தான் இந்த அன்னாபிஷேகம் செய்யப்படுகிறது.இன்று கோயிலுக்கு சென்று சிவனுக்கு சாத்தப்படும் அன்னாபிஷேகத்தை நேரில் காண முடியாதவர்கள், வீடுகளிலேயே செய்யலாம்.

வீட்டில் சிவலிங்கம் இருந்தால் பால், தயிர், பன்னீர், விபூதி, சந்தனம், விபூதி, இளநீர் உள்ளிட்ட பொருட்களால் அபிஷேகம் செய்துவிட்டு அன்னத்தால் அபிஷேகம் செய்யப்பட வேண்டும். இன்றைய தினம் பவுர்ணமியன்று காலை 6 மணி முதல் 10.20 மணி வரையும், பகல் நேரத்தில் 12.10 மணி முதல் மதியம் 1.10 மணி வரையும் மாலை வேளைகளில் 4.35 மணி முதல் 6 மணி வரையும் வீட்டு சிவலிங்கங்களுக்கு அன்னாபிஷேகம் செய்யலாம்.

வீட்டில் இருக்கும் சிவலிங்கத்தை எடுத்து ஒரு தாம்பாள தட்டிலோ அல்லது வாழை இலையிலோ வைக்க வேண்டும். அதற்கு மேற்கண்ட பொருட்களாக அபிஷேகம் செய்துவிட வேண்டும். பிறகு பச்சரிசியால் செய்யப்பட்ட அன்னத்தை ஆறவைத்து கைகளால் லேசாக பிசைந்து லிங்கத்தின் மேலிருந்து கீழாக சாத்த வேண்டும்.

இந்த அன்னத்துடன் காய்கறிகள், பழங்களையும் அலங்காரம் செய்யலாம். இந்த நாளில் வீட்டை சுத்தமாக பெருக்கி துடைத்து வீடு முழுவதும் சாம்பிராணி புகை போட வேண்டும். சிவனுக்கு அன்னாபிஷேகம் செய்யும் போது வேறு எதையும் நினைக்காமல் அந்த சிவபெருமானை நினைத்து துதி பாட வேண்டும்.

சிவனுக்கு ஏராளமான ஸ்தோத்திரங்கள் உள்ளன. இவற்றை எல்லாம் சொல்ல முடியாவிட்டாலும் அவருக்கு மிகவும் பிரசித்தியான மந்திரமான ஓம் நமசிவாய என சொல்லிக் கொண்டே இருக்கலாம். இல்லாவிட்டால் 108 முறை சொல்லலாம்.தனது அன்னத்தில் சிவபெருமான் வந்து தங்கள் குடும்பத்திற்கு அருள் செய்ய வேண்டும் என வேண்டிக் கொள்ளுங்கள்.

English summary

Do you want to do Annabhishekam in house? What is the perfect timing for that?