சபரிமலை சீசன்.. தமிழக எல்லையில் கடும் போக்குவரத்து நெரிசல்.. தவிக்கும் ஐயப்ப பக்தர்கள்

சபரிமலை: தமிழக கேரளா எல்லையான புளியரையில் விடிய,விடிய ஏற்பட்ட போக்குவரத்து நெரிசல் காரணமாக ஐயப்ப பக்தர்கள் பெரும் சிரமத்திற்கு ஆளாகினர். சபரிமலையில் தரிசனத்திற்காக பல மணி நேரம் காத்திருக்க வேண்டியிருக்கும் நிலையில் கேரளா எல்லையிலேயே 5 கிலோ மீட்டர் தூரத்திற்கு வாகனங்கள் வரிசை கட்டி நிற்பதால் பக்தர்கள் தவித்து போயினர்.

பிரசித்திப் பெற்ற சபரிமலை ஐயப்பன் கோவிலுக்கு மண்டல பூஜை விழாவிற்காக ஆண்டுத்தோரும் கார்த்திகை 1ம் தேதிமுதல் மாலை அணிந்து, விரதமிருந்து நாடெங்கிலும் இருந்து பல ஆயிரக்கணக்கான பக்தர்கள் செல்வது வழக்கம். இந்த ஆண்டு சபரிமலை மண்டல பூஜை சீசன் காலம் கடந்த நவம்பர் 16ஆம் தேதி தொடங்கியது.

தினசரியும் லட்சக்கணக்கான பக்தர்கள் தரிசனம் செய்து வருகின்றனர். இதுவரைக்கும் சுமார் 18 லட்சம் பேர் தரிசனம் ஐயப்பனை தரிசனம் செய்துள்ளனர். வருமானமும் பலகோடி ரூபாய் கிடைத்துள்ளது. கூட்ட நெரிசல் காரணமாக பல பக்தர்கள் ஐயப்பனை தரிசனம் செய்யாமலேயே திரும்பும் நிலை ஏற்பட்டுள்ளது.

தற்போது சபரிமலை சீசன் என்பதால் தமிழக எல்லாப் பகுதியான குமுளி,செங்கோட்டை புளியறை வழியாக தினமும் ஆயிரக்கணக்கான வாகனங்கள் விடிய,விடிய சென்று வருகின்றன. நேற்று இரவு சுமார் 11மணிமுதல் திடீர் என ஆரியன்காவு பகுதியில் போக்குவரத்து நெரிசல் ஏற்பட்டது

அதனைத் தொடர்ந்து தமிழகத்தில் இருந்து கேரளா செல்லும் வாகனங்களும் ,கேரளாவிலிருந்து தமிழகம் வரும் வாகனங்களும் இருபகுதிகளிலும் தேக்கம் அடையத் தொடங்கியது. இதனால் இரண்டு பகுதிகளிலும் வாகனங்கள் செல்ல முடியாத சூழல் ஏற்பட்டுள்ளது.

திருமங்கலம் - கொல்லம் தேசிய நெடுஞ்சாலையில் நேற்று இரவு முதல் கடுமையான வாகன நெரிசல் ஏற்பட்டது. இதில் ஐயப்ப பக்தர்களின் வாகனங்கள் சபரிமலை செல்ல முடியாமல் தவித்து வருகின்றனர். சபரிமலை செல்லும் சாலையிலேயே கடும் போக்குவரத்து நெரிசல் உள்ள நிலையில் சன்னிதானம் சென்று 18 படியேறி ஐயபபனை தரிசனம் செய்வது எப்படி என்று ஐயப்ப பக்தர்கள் யோசித்து வருகின்றனர்.

English summary

Sabarimala Season: Ayyappa devotees were put to a lot of trouble due to the traffic jam at Puliarai, bordering Tamil Nadu and Kerala. While having to wait for several hours for darshan at Sabarimala, the devotees suffered because the vehicles lined up for a distance of 5 km from the Kerala border.