எனக்கு குழந்தை பிறக்க போகுது! இனி என் பிள்ளையும் என்னை மாதிரியே கஷ்டப்படணுமா? பிரதீப் ஆண்டனி உருக்கமான போஸ்ட்

சென்னை: விஜய் டிவியில் ஒளிபரப்பான பிக் பாஸ் தமிழ் சீசன் 7 நிகழ்ச்சியின் மூலம் மக்கள் மத்தியில் பிரதீப் ஆண்டனி பிரபலமானார். பிக் பாஸ் வீட்டில் அவர் நிகழ்த்திய சில சர்ச்சையான சம்பவங்களால் அதிகமாக பேசப்பட்டாலும், அதற்கு முன்பே சின்னத்திரை மற்றும் வெள்ளித்திரையில் அவர் நண்பர் கதாபாத்திரங்களிலும், துணை வேடங்களிலும் நடித்த அனுபவம் கொண்டவர்.

பிக் பாஸ் நிகழ்ச்சியில் அவருக்கு 'ரெட் கார்டு' கொடுக்கப்பட்டு நிகழ்ச்சியில் இருந்து வெளியேற்றப்பட்ட விவகாரம் பெரும் சர்ச்சையை ஏற்படுத்தியது. அந்த நிகழ்வுக்குப் பிறகு பிரதீப் திரைத்துறையில் பெரிய அளவில் பட வாய்ப்புகள் கிடைக்காமல் இருந்தது குறித்து ரசிகர்கள் பலரும் சமூக வலைதளங்களில் கேள்வி எழுப்பி வந்தனர்.

திருமணத்திற்கு பின் மகிழ்ச்சியான செய்தி

சமீபத்தில் தான் பிரதீப்புக்கு திருமணம் நடைபெற்றது. இந்த நிலையில், இன்று தனது இன்ஸ்டாகிராம் பக்கத்தில், "நான் விரைவில் அப்பா ஆகப் போகிறேன்" என்ற மகிழ்ச்சியான செய்தியை ரசிகர்களுடன் பகிர்ந்துள்ளார். அதோடு தனது குழந்தையின் ஸ்கேன் ரிப்போர்ட்டையும் அவர் பதிவிட்டிருந்தார்.

அந்த பதிவில், "என்னுடைய குழந்தையும் என்னை மாதிரி தான் இருக்குமோ? இந்த உலகத்தில் இனி என்னென்ன கஷ்டங்களை சந்திக்கப் போகிறதோ" என்று சற்றே மனவேதனை கலந்த வார்த்தைகளுடன் அவர் தனது உணர்ச்சிகளை வெளிப்படுத்தியிருந்தார்.

ரசிகர்களின் ஆறுதல்

பிரதீப்பின் இந்த பதிவு வெளியான உடனே, அவரது ரசிகர்கள் மற்றும் பிக் பாஸ் பிரபலங்கள் பலரும் ஆறுதல் வார்த்தைகளை பதிவு செய்து வருகின்றனர்.

"பயப்படாதீங்க, குழந்தையின் எதிர்காலம் நிச்சயம் நல்லா இருக்கும்","ஒரு நல்ல அப்பாவாக நீங்கள் இருப்பீங்க, அதுவே குழந்தைக்கு பெரிய பலம்", "உங்களுடைய அனுபவம் தான் உங்கள் குழந்தையை பாதுகாப்பாக வளர்க்க உதவும்" என்று பலரும் ஆதரவு தெரிவித்து வருகின்றனர்.

சிலர், "குழந்தையை பற்றி இப்போவே கவலைப்படாதீங்க, இந்த உலகத்தில் நல்ல விஷயங்களும் நிறைய இருக்கிறது" என்றும் கருத்து தெரிவித்துள்ளனர்.

பிக் பாஸ் பிரதீப் ஆண்டனி

பிரதீப், பிக் பாஸ் நிகழ்ச்சிக்கு முன்பே நடிகர் கவினுடன் நெருங்கிய நட்பில் இருந்து வந்தவர். கவின் நடித்த 'டாடா' உள்ளிட்ட சில திரைப்படங்களில் பிரதீப் நண்பர் கதாபாத்திரங்களில் நடித்திருந்தார். அதேபோல் குறும்படங்களிலும் அவர் நடித்த அனுபவம் கொண்டவர்.

பிக் பாஸ் நிகழ்ச்சியில் கலந்து கொண்ட பிறகு, அவரின் தனிப்பட்ட நடத்தை மற்றும் சில கருத்துகள் சர்ச்சையாக மாறின. 'ரெட் கார்டு' விவகாரம் காரணமாக அவர் வெளியேற்றப்பட்ட சம்பவம், அந்த சீசனில் மிகவும் பேசப்பட்ட நிகழ்வுகளில் ஒன்றாக அமைந்தது.

அதன் பிறகு பிரதீப் திரைத்துறையில் பெரிய அளவில் தோன்றவில்லை என்றாலும், சமூக வலைதளங்களில் தனது கருத்துகள், பதிவுகள் மூலம் ரசிகர்களுடன் தொடர்பில் இருந்து வருகிறார். சில நேரங்களில் தனது மனநிலையையும், வாழ்க்கையில் சந்திக்கும் ஏற்ற இறக்கங்களையும் வெளிப்படையாக பகிர்ந்து கொள்வது அவரது தனித்துவமாக பார்க்கப்படுகிறது.

வாழ்க்கையின் புதிய அத்தியாயம்

திருமணத்திற்கு பிறகு தற்போது தந்தை ஆகும் புதிய கட்டத்தில் நுழைய இருக்கும் பிரதீப் வாழ்க்கையில் ஒரு முக்கியமான திருப்புமுனையை சந்தித்து வருகிறார். கடந்த கால சர்ச்சைகள், தொழிலில் ஏற்பட்ட இடைவெளிகள் ஆகியவற்றைத் தாண்டி, குடும்ப வாழ்க்கையில் அவர் புதிய பொறுப்புகளை ஏற்க தயாராகி வருவது ரசிகர்களிடையே கலந்த உணர்வுகளை ஏற்படுத்தியுள்ளது.