KPY Bala: எவ்வளவோ உதவி செய்கிறாரே பாலா? அவருக்கா இந்த நிலைமை? இப்படியுமா அசிங்கப்படுத்துவாங்க!

Updated: Wednesday, August 27, 2025, 16:38 [IST]

Subscribe to Oneindia Tamil

சென்னை: விஜய் டிவியில் ஒளிபரப்பான 'கலக்கப்போவது யாரு?' நிகழ்ச்சி மூலம் தனது ஒன்லைனர் நகைச்சுவையால் தமிழ் மக்களிடம் பிரபலமானவர் நடிகர் கே.பி.ஒய். பாலா. சின்னத்திரை, வெள்ளித்திரையில் நடித்து வந்தாலும், சமூக சேவையில் தன்னை முழுமையாக ஈடுபடுத்திக் கொண்டு பலரின் பாராட்டுகளைப் பெற்று வருகிறார். தற்போது, 'காந்தி கண்ணாடி' என்ற படத்தின் மூலம் நாயகனாக உயர்ந்துள்ளார்.

நகைச்சுவைக்கு பின்னால் நல்ல மனம்

பாலா தனது திறமையால் ஈட்டும் பணத்தை, சமூகப் பணிகளுக்காகச் செலவிடுவது பலரின் கவனத்தை ஈர்த்துள்ளது. மலை கிராம மக்களுக்கு ஆம்புலன்ஸ் வாங்கி கொடுத்தது, மருத்துவச் சிகிச்சை தேவைப்படும் பலருக்கு உதவுவது என இவரது உதவிகள் ஏராளம். கோடி கணக்கில் சம்பாதிக்கும் நடிகர்கள் இவரைப் பார்த்து கற்றுக்கொள்ள வேண்டும் என்று பொதுமக்கள் பலரும் இவரது செயல்களுக்குப் பாராட்டு தெரிவித்து வருகின்றனர்.

சினிமாவில் பாலாவின் பயணம்

2018-ம் ஆண்டு விஜய் சேதுபதி நடிப்பில் வெளியான 'ஜூங்கா' படத்தின் மூலம் பாலா சினிமாவில் அறிமுகமானார். பின்னர், 'புலிக்குத்தி பாண்டி' உள்ளிட்ட பல படங்களில் நகைச்சுவை நடிகராக நடித்து ரசிகர்களைக் கவர்ந்தார். சமீபத்தில் வெளியான 'சென்னை சிட்டி கேங்ஸ்டர்' பாடலிலும் நடித்திருந்தார்.

காந்தி கண்ணாடி- முதல் ஹீரோ படம்

பாலா கதாநாயகனாக நடித்துள்ள 'காந்தி கண்ணாடி' திரைப்படம் வரும் செப்டம்பர் 5-ம் தேதி வெளியாக உள்ளது. இந்தப் படத்தில் நமிதா கிருஷ்ணமூர்த்தி நாயகியாக நடித்துள்ளார். இந்தப் படத்தின் உருவான விதம் குறித்து, பாலா மற்றும் இயக்குநர் ஷெரிப் ஒரு நேர்காணலில் மனம் திறந்து பேசியுள்ளனர்.

50 ஹீரோயின்கள் மறுப்பு

இயக்குநர் ஷெரிப் பேசும்போது, "இந்தக் கதையை பல ஹீரோயின்கள் கேட்டனர். கதை அருமையாக இருக்கிறது என்று சொன்னவர்கள், பாலா ஹீரோ என்றதும், விலகிவிட்டனர். 'பாலா ஹீரோவா? எனக்கு டேட்ஸ் இல்லை' என்று சொல்லிவிடுவார்கள். இப்படியே கிட்டத்தட்ட 50 பேர் விலகிவிட்டனர். 51-வது ஆளாக வந்தவர்தான் இந்தப் படத்தின் கதாநாயகி" என்று வருத்தத்துடன் தெரிவித்தார்.

கலைஞர்களின் ஆதரவு

பாலா பேசும்போது, "இந்தப் படத்தின் ஆரம்பம் குறித்து கேள்விப்பட்டதும், நடிகர் ராகவா லாரன்ஸ் என்னை அழைத்து வாழ்த்தினார். என் பிறந்தநாள் போஸ்டரைப் பார்த்துவிட்டு விஜய் சேதுபதி சார் என்னை வீட்டுக்கு அழைத்து பாராட்டி அட்வைஸ் வழங்கினார். நான் அறிமுகமானதே அவருடைய படத்தில் தான். அவர் எப்போதும் என்னை ஊக்குவிக்கும் ஒரு முக்கியமான நபர்" என்று கூறினார்.

கனவுகள்

ஒரு பேட்டியில் பாலா, "நான் சினிமாவில் ஹீரோவாக நடித்தால், ஒரு படத்தில் கூட சண்டைக் காட்சி இருக்காது. மக்களுக்கு தேவையான சமூக விஷயங்களைதான் நான் படத்தில் பேசுவேன்" என்று கூறியிருந்தார்.

சமூக சேவையின் வெற்றி

கோடிக்கணக்கில் சம்பாதிக்கும் நடிகர்கள் பலரும் செய்யத் தயங்கும் சமூகப் பணிகளை, குறைந்த வருமானத்திலும் செய்து வரும் பாலாவின் மனிதநேயம், அவரை மக்கள் மனதில் ஒரு உண்மையான ஹீரோவாக நிலைநிறுத்தியுள்ளது. சினிமாவில் அவர் ஹீரோவாக உருவெடுத்திருப்பது, அவரது கடின உழைப்பு மற்றும் நல்ல உள்ளத்திற்கு கிடைத்த அங்கீகாரம் என்று ரசிகர்கள் பாராட்டி வருகின்றனர்.