சந்தானம் செய்த செயல்.. ஆனால் கடைசியில் நடந்தது வேறு! லொள்ளு சபா உதயா உருக்கம்! நெகிழ வைத்த பேச்சு

சென்னை: தமிழ் தொலைக்காட்சி ரசிகர்கள் மத்தியில் ஒருகாலத்தில் மிகப்பெரிய வரவேற்பைப் பெற்ற காமெடி நிகழ்ச்சி என்றால் அது லொள்ளு சபா தான். சினிமா படங்களை நகைச்சுவையாக ட்ரோல் செய்து காட்டிய அந்த நிகழ்ச்சி, பல திறமையான காமெடி நடிகர்களை ரசிகர்களிடம் அறிமுகப்படுத்தியது. அந்த நிகழ்ச்சியின் மூலம் பிரபலமானவர்களில் ஒருவர்தான் நடிகர் சிரிக்கோ உதயா.

லொள்ளு சபாவில் இருந்து ரசிகர்கள் மனதில் இடம்

விஜய் டிவியில் ஒளிபரப்பான லொள்ளு சபா நிகழ்ச்சியில் உதயா நடித்த பல காமெடி காட்சிகள் அப்போது ரசிகர்களை வயிறு குலுங்க சிரிக்க வைத்தது. சின்ன கதாபாத்திரமாக இருந்தாலும் அவருடைய முகபாவனை, டைமிங் காமெடி, பேசும் விதம் எல்லாம் ரசிகர்களிடம் நல்ல வரவேற்பை பெற்றது.

இந்த நிகழ்ச்சியில் நடித்த பலரும் பின்னர் சினிமாவிலும் வாய்ப்புகளை பெற்றனர். அதில் முக்கியமாக காமெடி நடிகராக உயர்ந்தவர் சந்தானம். லொள்ளு சபா காலத்திலேயே உதயாவுக்கும் சந்தானத்துக்கும் நல்ல நட்பு இருந்தது.

சர்க்கரை நோயால் ஏற்பட்ட பெரிய சோதனை

ஆனால் வாழ்க்கை எல்லோருக்கும் ஒரே மாதிரி இருக்காது. சமீப காலமாக உதயா கடுமையான சர்க்கரை நோயால் பாதிக்கப்பட்டார். அந்த நோய் அதிகமாகி விட்டதால் அவருடைய இடது காலை மருத்துவர்கள் அகற்ற வேண்டிய நிலை ஏற்பட்டது.

சென்னையில் உள்ள ஓமந்தூர் அரசு மருத்துவமனையில் சிகிச்சை பெற்று வந்த அவர், ஒரு காலை இழந்தது ரசிகர்களுக்கும், அவருடன் வேலை செய்த கலைஞர்களுக்கும் பெரும் அதிர்ச்சியை ஏற்படுத்தியது.

இந்த செய்தி வெளியானதும் பல சினிமா மற்றும் தொலைக்காட்சி பிரபலங்கள் மருத்துவமனைக்கு சென்று அவரை பார்த்து ஆறுதல் கூறினர். சிலர் பொருளாதார உதவிகளையும் செய்ததாக கூறப்படுகிறது.

750 ரூபாய்க்கு நடிக்க சொன்னார்

மருத்துவமனையில் இருந்து வீட்டிற்கு திரும்பிய பிறகு உதயா அளித்த ஒரு பேட்டியில் பழைய நினைவுகளை பகிர்ந்துள்ளார். அதில் அவர் கூறியதாவது: "நாம் பெரிய ஆளாகிவிட்டாலும் நம்மோட இருந்தவர்களை மறக்கக்கூடாது, அண்ணன்களை விட்டுடக்கூடாது என்று சந்தானம் அடிக்கடி சொல்லுவார். ஒரு நாள் திடீரென்று எனக்கு போன் பண்ணி, 'அண்ணா ஒரு சின்ன ரோல் இருக்கு... சம்பளம் 750 ரூபாய் தான்... நீங்க பண்ணீங்கனா நல்லா இருக்கும்' என்று சொன்னார்" என்று நினைவு கூறினார்.

அதன்பிறகு அந்த வாய்ப்புக்காக அவர் சென்றது தீராத விளையாட்டு பிள்ளை படத்தின் படப்பிடிப்புக்கே என்று அவர் கூறியுள்ளார்.

படம் வெளியானபோது நடந்த சம்பவம்

அந்த படத்தில் அவர் ஒரு நோயாளி கதாபாத்திரத்தில் நடித்ததாகவும், "ஷூட்டிங் நடந்தபோது நான் டயலாக் பேசினேன். அது நல்லா இருக்கு என்று சந்தானம் பாராட்டினார். ஆனால் படம் வெளியானபோது நான் பேசிய டயலாக் எல்லாம் எடிட்டில் கட் ஆகி விட்டது. 'ரிலையன்ஸ்-ஆ' என்று ஒரு வார்த்தை மட்டும் தான் இருந்தது" என்று அவர் சிரித்தபடியே அந்த அனுபவத்தை பகிர்ந்தார்.

ஒரு காலுடன் வந்த உதயா

சமீபத்தில் அவர் கலந்து கொண்ட ஒரு நிகழ்ச்சி பலரையும் உணர்ச்சிவசப்பட வைத்தது. நடிகர் மீசை ராஜேந்தர் வீட்டில் நடந்த திருமண விழாவில் உதயா கலந்து கொண்டார். ஒரு காலை இழந்த பிறகு முதன்முறையாக பல நண்பர்களை அவர் சந்தித்ததாக கூறப்படுகிறது. அப்போது அவரை பார்த்ததும் லொள்ளு சபா நிகழ்ச்சியில் நடித்த மற்றொரு நடிகர் மனோகர் கண் கலங்கி அழுதுவிட்டாராம்.

பல வருடங்களுக்கு முன்பு ஒன்றாக மேடையில் நகைச்சுவை செய்த நண்பரை இப்படி ஒரு நிலையில் பார்க்க வேண்டி வந்தது அவருக்கு மிகவும் வேதனையாக இருந்ததாக அங்கு இருந்தவர்கள் கூறினர்.

சிரிக்க வைத்த மனிதரின் பின்னணி கதை

ஒருகாலத்தில் ரசிகர்களை சிரிக்க வைத்த நடிகர் இன்று வாழ்க்கையின் கடினமான சோதனையை சந்தித்து வருகிறார். ஆனால் அதற்கிடையிலும் அவர் தன்னுடைய அனுபவங்களை சிரித்தபடியே பகிர்ந்து கொள்வது பலரையும் பாதித்திருக்கிறது. லொள்ளு சபா காலத்தில் இருந்த நட்புகள், சினிமா வாய்ப்புகள், வாழ்க்கையில் ஏற்பட்ட சோதனைகள் - இவை எல்லாம் சேர்ந்து உதயாவின் வாழ்க்கையை ஒரு உணர்ச்சிபூர்வமான கதையாக மாற்றியிருக்கிறது.