"இது என் சாதிக்காரனின் படம்! கண்டிப்பா வெற்றி பெறும்" - ரோபோ சங்கரின் சர்ச்சை பேச்சு! குவியும் கமெண்ட்ஸ்

Updated: Thursday, August 7, 2025, 10:47 [IST]

Subscribe to Oneindia Tamil

சென்னை: நடிகர் ரோபோ சங்கர், நேற்று நடந்த 'சொட்ட சொட்ட நனையுது' திரைப்படத்தின் விழாவில் பேசிய பேச்சு, இணையத்தில் பெரும் விவாதத்தைக் கிளப்பியுள்ளது. அவர், "இது என்னுடைய சாதிக்காரனுடைய படம். அதனால், இந்தப் படம் கண்டிப்பாக ஹிட் ஆகும்," என்று பேசியிருந்தார். ரோபோ சங்கர், நகைச்சுவை நடிகர் என்பதையும், இந்தப் படத்தின் இயக்குநரும் ஒரு நகைச்சுவை இயக்குநர் என்பதையும் குறிப்பிடும் விதமாக, இந்த வார்த்தைகளைப் பயன்படுத்தியிருக்கிறார்.

ரோபோ சங்கரின் கடின உழைப்பு

விஜய் டிவியில் ஒளிபரப்பான 'கலக்கப் போவது யாரு' போன்ற நகைச்சுவை நிகழ்ச்சிகள் மூலம் ரோபோ சங்கர் ரசிகர்களிடையே பிரபலமானார். அவரது தனித்துவமான நகைச்சுவை உணர்வும், உடலசைவுகளும் அவருக்கு ஒரு தனி அடையாளத்தைக் கொடுத்தன. விஜய் டிவியில் இருந்து சினிமாவுக்கு வந்தவர்களில், ரோபோ சங்கரும் ஒருவர். இவரது கடின உழைப்பு, அவரை சினிமாவில் ஒரு முன்னணி நகைச்சுவை நடிகராக உயர்த்தியது.

பெயர் பெற்ற திரைப்படங்கள்

'மாரி', 'வேலையில்லா பட்டதாரி', 'விஸ்வாசம்' போன்ற படங்களில் இவரது நகைச்சுவை நடிப்பு பெரிதும் பேசப்பட்டது. இந்தப் படங்கள், ரோபோ சங்கருக்கு ஒரு பெரிய ரசிகர் பட்டாளத்தை உருவாக்கிக் கொடுத்தன. அதிலும் மாரி பட வெற்றிக்கு பிறகு நடிகர் தனுஷ் நடித்த அதிகமான படங்களில் சில வருடங்களாக இவர் நடித்துக் கொண்டிருக்கிறார்.

குடும்பம் மற்றும் சர்ச்சைகள்

ரோபோ சங்கருக்குப் பிரியங்கா என்ற மனைவியும், ஒரு மகளும் இருக்கின்றனர். இவரது மகள் இந்திராஜா சங்கர், 'பிகில்' திரைப்படத்தில் நடிகையாக அறிமுகமாகிப் பிரபலமானார். ரோபோ சங்கர், தனது குடும்பத்தின் மீது மிகுந்த பாசம் கொண்டவர். ஒருமுறை, உடல்நலக் குறைவால் ரோபோ சங்கர் மிகவும் பாதிக்கப்பட்டிருந்தார். அப்போது, "அவர் குடிப் பழக்கத்தால் உடல்நலம் பாதிக்கப்பட்டிருக்கிறார்," என்று பல தகவல்கள் இணையத்தில் பரவின. ஆனால், ரோபோ சங்கரின் மனைவி, "அவருக்கு மஞ்சள் காமாலைதான். அவர் குடிப்பழக்கம் உள்ளவர் இல்லை," என்று தெளிவுபடுத்தினார்.

ரோபோ சங்கரின் பேச்சு

ரோபோ சங்கர், 'சொட்ட சொட்ட நனையுது' படத்தின் விழாவில், நகைச்சுவையாகப் பேசியதை, சிலர் தவறாகப் புரிந்துகொண்டு, இணையத்தில் சர்ச்சையைக் கிளப்பியுள்ளனர். "நகைச்சுவை நடிகர்கள் இணைந்து ஒரு படம் செய்தால் அது வெற்றிபெறும்," என்று சொல்ல வந்ததை, "சாதிக்காரன்" என்ற வார்த்தையைப் பயன்படுத்தி, நகைச்சுவையாக அவர் பேசியிருக்கிறார். ரோபோ சங்கரின் இந்தப் பேச்சு, சமூக வலைதளங்களில் பரபரப்பாகப் பேசப்பட்டு வருகிறது.

எப்படியாவது படத்தைப் பற்றி பேச வைக்க வேண்டும் என்பதற்காக இவர் சர்ச்சையாக பேசியதற்கு பலரும் கமாண்ட் கொடுத்திருக்கிறார்கள். அதிலும் இவர் பேசும் போது அங்கிருந்த செய்தியாளர்களிடம் இது என்னுடைய ஜாதிக்காரன் படம் அதனால் வெற்றி அடையும் என்று சொல்லிவிட்டு இப்போ உங்களுக்கு கண்டன்டு கிடைத்துவிட்டது இதையே செய்தியாக மாற்றி விடுங்கள் என்று கிண்டல் செய்து இருக்கிறார். அதோடு அந்த மேடையில் நடிகர் கமல்ஹாசன் தனக்கு தந்தை வழிகாட்டி கடவுள் என்றும் பேசியிருந்தார்.