நாதஸ்வரம் சீரியல் காஜா ஞாபகம் இருக்கா? இப்போ என்ன வேலை செய்கிறார் தெரியுமா? உருக்கமான வார்த்தை

சென்னை: இயக்குனர் திருமுருகனின் இயக்கத்தில் வெளியான நாதஸ்வரம் சீரியலில் காஜா கேரக்டரில் நடித்த நடிகர் காஜா ஃபெரோஸ் சமீபத்தில் பேட்டி ஒன்றில் தன்னுடைய தற்போதைய நிலை குறித்து உருக்கமாக பேசியிருக்கிறார். சீரியல்களில் பல வருடங்களாக நடித்த காஜா இப்போது செல்போன் கடையில் வேலை பார்த்து வருகிறார்.

அந்த வகையில் ஒரு சில நடிகர்கள் சில சீரியல்களில் நடித்து பெரிய அளவில் பிரபலமடைந்து விடுகிறார்கள். ஆனால் பிறகு அவர்கள் எங்கே போனார்கள் என்று தெரியாத அளவிற்கு காணாமல் போய்விடுகிறார்கள். சிலருக்கு திறமைகள் இருந்தாலும் அதற்கு சரியான வாய்ப்புகள் இல்லாமல் போய்விடுவதுதான் இதற்கு காரணம்.

அந்த வகையில் நாதஸ்வரம் சீரியல் மூலமாக பெரிய அளவில் பிரபலம் அடைந்த காஜா இப்போது நடிப்பு வாய்ப்பு இல்லாததால் தன்னுடைய ஊரில் இருக்கும் செல்போன் கடை ஒன்றில் வேலை பார்த்து வருகிறார். இந்த நிலையில் இயக்குனர் திருமுருகன் பற்றியும் அவர் இயக்கிய சீரியல்களில் தான் நடித்த அனுபவம் குறித்தும் சமீபத்தில் பேட்டி ஒன்றில் பல விஷயங்களை பகிர்ந்து இருக்கிறார்.

அதில் அவர் பேசுகையில், திருமுருகன் சார் கிட்ட இருந்து வர்ற ஒரு போனுக்காக நான் ரொம்பவே வெயிட் பண்ணிக்கிட்டு இருக்கிறேன். திருமுருகன் சார் தான் என்னை சீரியலில் அறிமுகப்படுத்தி இருந்தார். அதற்குப் பிறகு சின்ன திரையில் நான் பிரபலமாக தான் இருந்தேன். ஆனாலும் எனக்கு அதைத் தொடர்ந்து வாய்ப்புகள் கிடைக்கவில்லை.

என்னுடைய சொந்த ஊர் தர்மபுரி. சின்ன வயசிலிருந்து சினிமா பார்க்கிறது ரொம்ப பிடிக்கும். வீட்டுக்கு தெரியாம போய் படம் பார்த்துட்டு திட்டு, அடி எல்லாம் வாங்கி இருக்கிறேன். பெரிய பெரிய நடிகர்களின் படங்களை பார்த்துவிட்டு அவர்களை மாதிரியே ஸ்டைல் பண்ணுவதை கவனித்த சிலர் நீ நடிக்கப் போகலாம் என்று என்னுடைய ஆசையை தூண்டுனாங்க. அந்த சமயத்தில் தான் திருமுருகன் சார் நாதஸ்வரம் சீரியலுக்கான ஆடிஷன் பண்ணுனாங்க என்ற தகவல் கிடைத்தது.

அந்த ஆடிஷனுக்கு நானும் போனேன். அங்கு இருந்த கூட்டத்தில் நான் எப்படியும் செலக்ட் ஆக மாட்டேன் என்று முதலில் நினைத்தேன். ஆனால் நான் எதிர்பார்க்காத விதமாக நான் செலக்ட் ஆகி விட்டேன். பிறகு எனக்குள் இருந்து நடிப்பு திறமையை வெளியே கொண்டு வந்தது திருமுருகன் சார்தான். அவர் என்னை தேர்ந்தெடுத்தது மட்டுமல்லாமல் என் கேரக்டரையும் அவர் கூடவே கடைசி வரைக்கும் இருக்கிற மாதிரியே வைத்திருந்தார்.

அதனால் எனக்கும் சீரியல் முடிகிற வரைக்கும் நல்ல ஒரு வரவேற்பு இருந்தது. அந்த அனுபவங்களை என்னால் மறக்கவே முடியாது. அந்த சீரியலில் நாங்கள் நடிக்கும்போது எல்லோரும் ஒரே குடும்பமாகத்தான் இருந்தோம். ஆனால் சீரியல் முடிந்த பிறகு எல்லோரும் அவர்கள் வழியில் போய்விட்டதால் சரியாக காண்டாக்ட் பண்ண முடியாமல் போய்விட்டது. நான் அந்த சீரியல் முடிந்த பிறகு யாரிடமும் பெரியதாக பேசவில்லை.

ஆனால் இப்போது அந்த சீரியலில் நடித்தவர்கள் எல்லாரும் பேட்டி கொடுத்துக் கொண்டிருக்கிறார்கள். அது பார்க்க சந்தோஷமாகத்தான் இருக்கிறது. நானும் அந்த வீடியோக்களை பார்த்தேன். அதுபோல திருமுருகன் சார் சமீபத்தில் "புதிய படைப்பு விரைவில் வரும்" என்று கூறியிருக்கிறார். அது எனக்கு தன்னம்பிக்கையும், மகிழ்ச்சியையும் கொடுத்திருக்கிறது. அவர் புதியதாக தொடங்க இருக்கும் சீரியலில் எனக்கான ஒரு கேரக்டர் இருக்கும் என்று நான் நம்புகிறேன்.

சீரியலில் பிஸியாக நடித்துக் கொண்டிருக்கும் போது எனக்கு வருமானம் வந்து கொண்டிருந்தது. ஆனால் நான் நாதஸ்வரம் சீரியல் நடித்துக் கொண்டிருந்தாலும் அந்த சீரியலை தாண்டி வேறு யாரிடமும் பெரிய அளவில் எனக்கு அறிமுகம் கிடையாது. அதனால் அடுத்த அடுத்த வாய்ப்பு கிடைக்காமல் போய்விட்டது.

அதனால் சீரியல் முடிவடைந்த பிறகு குடும்ப சூழ்நிலை காரணமாக என்னுடைய ஊரில் இருக்கும் ஒரு செல்போன் கடையில் வேலை பார்த்து கொண்டு இருக்கிறேன். சென்னைக்கு போய் வாய்ப்பு தேடு என்று எல்லோரும் சொல்கிறார்கள். ஆனால் என்னை நம்பி ஒரு குடும்பம் இருக்கிறது. நான் சென்னைக்கு போய் வேலை தேடுற நாட்களில் என்னுடைய குடும்பத்திற்கு வருமானம் இல்லாமல் போய்விடும். அதனாலயே நான் கிடைத்த வேலையை செய்து கொண்டிருக்கிறேன் என்று அந்த பேட்டியில் காஜா பேசியிருக்கிறார்.

English summary

Actor Kaja Feroz, who played the character of Kaja in Nathaswaram serial directed by director Thirumurugan, has recently spoken warmly about his current situation in an interview. Kaja, who has acted in serials for many years, is now working in a cell phone shop.