சூப்பர் சிங்கர் நோக்கமே மாறிடுச்சு! மாஸ்டர் படத்தில் வந்த பிரச்சனை! பாடகி சௌந்தர்யா வெளிப்படையான பேச்சு

Updated: Tuesday, August 12, 2025, 15:47 [IST]

Subscribe to Oneindia Tamil

சென்னை: விஜய் டிவியில் ஒளிபரப்பான 'சூப்பர் சிங்கர்' நிகழ்ச்சியின் மூலம் பிரபலமான பாடகி சௌந்தர்யா, சமீபத்தில் ஒரு பேட்டியில், தனது சினிமா, இசை, மற்றும் சீரியல் அனுபவங்களைப் பற்றி மனம் திறந்து பேசியுள்ளார். சீரியல் துறையில் நிலவும் அரசியல், 'மாஸ்டர்' படத்தில் கிடைத்த சிறிய கதாபாத்திரம் என, தான் சந்தித்த அனுபவங்களைப் பற்றி அவர் வெளிப்படையாகப் பகிர்ந்து கொண்டது, பலரையும் நெகிழ்ச்சியில் ஆழ்த்தியுள்ளது.

சௌந்தர்யாவின் பயணம்

சௌந்தர்யா, விஜய் தொலைக்காட்சியில் ஒளிபரப்பான, 'சூப்பர் சிங்கர் 3' மற்றும் 'சூப்பர் சிங்கர் 4' நிகழ்ச்சிகளில், போட்டியாளராகப் பங்கேற்று, தனது தனித்துவமான குரலால், ரசிகர்களின் கவனத்தை ஈர்த்தார். பின்னர், 'சூப்பர் சிங்கர் 5' நிகழ்ச்சியின் இறுதிப்போட்டியிலும் அவர் கலந்துகொண்டார். சௌந்தர்யா, பல தமிழ் திரைப்படங்களில், பின்னணிப் பாடகியாகப் பாடியுள்ளார். அவரது குரலில், "முத்தமழை" போன்ற பாடல்கள், ரசிகர்களிடையே பெரும் வரவேற்பைப் பெற்றுள்ளன.

சீரியல் மற்றும் சினிமா

'சூப்பர் சிங்கர்' நிகழ்ச்சிக்குப் பிறகு, சௌந்தர்யாவுக்கு, விஜய் டிவியில் ஒளிபரப்பான 'பகல் நிலவு' சீரியலில் நடிக்க வாய்ப்பு கிடைத்தது. மேலும், நடிகர் விஜய் நடித்த மாஸ்டர் படத்திலும், ஒரு சிறிய கதாபாத்திரத்தில் நடித்தார். ஆனால் தான் நடித்த திரைப்படங்களில் தனக்கு சரியான அங்கீகாரம் கிடைக்கவில்லை என்று தன்னுடைய வருத்தத்தையும் பகிர்ந்திருக்கிறார்.

சீரியலில் அரசியல்

'பகல் நிலவு' சீரியலில் நடித்த அனுபவம் குறித்துப் பேசிய சௌந்தர்யா, "சீரியல் உலகில், எனக்குத் தெரியாத பல அரசியல்கள் இருந்தன. நான் கண்ட சில நிகழ்வுகள், எனக்கு வருத்தமளிப்பதாக இருந்தன," என்று கூறினார். அந்த அனுபவம், தனக்கு ஒரு பெரிய பாடத்தைக் கற்றுக்கொடுத்ததாகக் கூறிய அவர், அதன்பிறகு நடிப்பை விட்டு, மீண்டும் இசை மீது கவனம் செலுத்தத் தொடங்கினார். விஜய் நடித்த 'மாஸ்டர்' படத்தில், ஒரு சிறிய கதாபாத்திரத்தில் நடித்த அனுபவம் குறித்துப் பேசிய சௌந்தர்யா, "அது ஒரு நல்ல அனுபவமாக இருந்தாலும், எனக்குக் கிடைத்த ரோல், மனதளவில் சோகத்தை ஏற்படுத்தியது. அந்த ரோல் எனக்கு ஊக்கமளிக்காமல், சோர்வை ஏற்படுத்தியதால், நடிப்புத் துறையை விட்டு விலகி, முழு நேரமும் பாடலுக்கு முக்கியத்துவம் அளிக்க முடிவு செய்தேன்," என்று தெரிவித்தார்.

சூப்பர் சிங்கரில் மாற்றம்

சூப்பர் சிங்கர்' நிகழ்ச்சி குறித்துப் பேசிய அவர், "ஆரம்பத்தில் இருந்தது போல, இப்போது அந்த நிகழ்ச்சியின் நோக்கம் மாறிவிட்டது. முன்பு இயல்பாக இருந்த அந்த நிகழ்ச்சி, இப்போது அதிக கண்டெண்ட்டுக்காக மட்டுமே நடப்பதாக நான் உணர்கிறேன்," என்று வருத்தத்துடன் தெரிவித்தார். "இசைத்துறையில், இப்போது டோனாலிட்டி அடிப்படையிலான குரல்களுக்கு முக்கியத்துவம் கொடுக்கப்படுகிறது. முன்பு, பாரம்பரியமான குரல்களுக்கு முக்கியத்துவம் இருந்தது," என்று அவர் கூறினார்.

சௌந்தர்யாவின் இந்த உருக்கமான பேட்டி, சினிமா, சீரியல், இசை என, ஒரு கலைஞன், தான் சந்திக்கும் சவால்களையும், போராட்டங்களையும், வெளிப்படையாகப் பேச, ஒரு தைரியத்தை அளிப்பதாக அமைந்துள்ளது.