என் மகள் மீரா என் கூடவே தான் இருக்கிறா.. நான் பேசிட்டே தான் இருக்கிறேன்! ஆனால், உருக்கமாக பேசிய விஜய் ஆண்டனி

Updated: Monday, September 15, 2025, 19:24 [IST]

Subscribe to Oneindia Tamil

சென்னை: அன்பானவர்களை இழப்பது என்பது வார்த்தைகளால் விவரிக்க முடியாத ஒரு துயரம். அந்தத் துயரம் ஒரு தந்தை தன் மகளை இழக்கும்போது ஏற்படும் வலிக்கு ஈடாகாது. மகளின் மரணத்தால் ஏற்பட்ட பெரும் சோகத்தில் இருந்து மீண்டு, தனது பணிகளில் கவனம் செலுத்தி வரும் நடிகர் விஜய் ஆண்டனி, சமீபத்தில் அளித்த பேட்டி ஒன்றில் தன் மகள் குறித்துப் பேசியது அனைவரின் மனதையும் உருக்கியுள்ளது.

தன்னம்பிக்கை நாயகன்

ஒரு சிறந்த இசையமைப்பாளராகத் தன் கலைப்பயணத்தைத் தொடங்கிய விஜய் ஆண்டனி, நான் திரைப்படத்தின் மூலம் நடிகராக அறிமுகமானார். பின்னர், சலீம், பிச்சைக்காரன் போன்ற படங்களின் மூலம், சமூகப் பிரச்னைகளைப் பேசும் ஒரு நடிகராகவும், இயக்குநராகவும் தன்னை நிலைநிறுத்திக் கொண்டார். தனது தனிப்பட்ட வாழ்க்கையில் பல போராட்டங்களைச் சந்தித்து வெற்றி பெற்றதால், பலருக்கு ஊக்கம் கொடுக்கும் ஒரு தன்னம்பிக்கை நாயகனாக அவர் பார்க்கப்பட்டார்.

மறையாத நினைவுகள்

அவரது வாழ்க்கை பயணத்தில், கடந்த வருடம் நடந்த ஒரு சம்பவம், ஒட்டுமொத்தத் திரையுலகையும் உலுக்கியது. விஜய் ஆண்டனியின் மகள் மீரா, தற்கொலை செய்துகொண்ட சம்பவம், பலரையும் அதிர்ச்சியில் ஆழ்த்தியது. "தன்னம்பிக்கை குறித்துப் பல மேடைகளில் பேசி வந்த விஜய் ஆண்டனியின் வாழ்வில் இப்படி ஒரு சோகமா?" என்று பலரும் ஆதங்கப்பட்டனர்.

ஒரு பெற்றோருக்கு ஏற்படும் இந்த இழப்பின் வலி, ஆறாத காயத்தை ஏற்படுத்தும். சமூக வலைத்தளங்களில் பலரும் தங்கள் இரங்கலைத் தெரிவித்தனர். அந்தத் துயரத்தில் இருந்து மெல்ல மீண்ட விஜய் ஆண்டனி, தனது படப்பிடிப்புகளிலும், மற்ற பணிகளிலும் கவனம் செலுத்தத் தொடங்கினார். தற்போது, அவர் நடித்து வரும் சக்தி திருமகன் திரைப்படம் விரைவில் வெளியாக இருக்கிறது.

விஜய் ஆண்டனியின் உருக்கமான பேட்டி

சமீபத்தில் ஒரு பேட்டியில், தனது மகள் குறித்து அவர் மனம் திறந்து பேசினார். அப்போது அவர், "என் மகள் மீரா கிட்ட நான் இப்பவும் பேசிக்கிட்டுதான் இருக்கிறேன். அவளை நான் மிஸ் பண்ணல. அவளை இழந்துட்டேன்னு நினைச்சா தான் நான் மிஸ் பண்ணுவேன். அவள் எப்போதும் என் கூடவேதான் இருக்கிறாள்" என்று நெகிழ்ச்சியுடன் பேசியுள்ளார்.

விஜய் ஆண்டனியின் இந்த வார்த்தைகள், தனது மகளின் மரணத்தை அவர் இன்னும் ஏற்கவில்லை என்பதைக் காட்டவில்லை; மாறாக, உடல்ரீதியாக அவர் மகளை இழந்திருந்தாலும், மனதளவில் அவர் மகளுடன் இன்னும் பிரிக்க முடியாத அன்புடன் வாழ்கிறார் என்பதைத் தெரிவிப்பதாக இருந்தது. இந்த வார்த்தைகள், இழப்பின் வலியில் தவிக்கும் பலருக்கும் ஆறுதல் அளிக்கும். விஜய் ஆண்டனியின் இந்த அணுகுமுறை, ஒரு தந்தையின் தீர்க்கமான அன்பையும், துயரத்தில் இருந்து மீண்டு வரும் மனவலிமையையும் எடுத்துக்காட்டுகிறது.