ரூ.16,000 கோடி முதலீடு செய்யும் அதானி.. விழிஞ்சம் துறைமுகத்தின் இரண்டாம் கட்டத்திற்கு அடிக்கல்!

திருவனந்தபுரம்: கேரளாவில் உள்ள விழிஞ்சம் சர்வதேச துறைமுகத்தின் இரண்டாம் கட்ட விரிவாக்கப் பணிகளுக்கான அடிக்கல் நாட்டு விழா வெள்ளிக்கிழமை நடைபெற்றது. இது கேரளாவின் கடல்சார் மற்றும் பொருளாதார வளர்ச்சிக்கு ஒரு முக்கிய மைல்கல்லாகப் பார்க்கப்படுகிறது.

சுமார் ₹30,000 கோடி மொத்த முதலீட்டில், அதானி துறைமுகங்கள் மற்றும் சிறப்புப் பொருளாதார மண்டல நிறுவனம் (APSEZ) இந்தப் பணியை மேற்கொள்கிறது. இதில் இரண்டாம் கட்டத்திற்காக மட்டும் ₹16,000 கோடி கூடுதல் முதலீடு செய்யப்படுகிறது.

இந்த விழாவில் பேசிய APSEZ நிறுவனத்தின் நிர்வாக இயக்குநர் கரண் அதானி, கேரளா மற்றும் இந்தியாவின் கடல்சார் எதிர்காலத்திற்கு இத்திட்டம் வரலாற்றுச் சிறப்புமிக்க நாள் என்றார். விழிஞ்சம் துறைமுகம் உலகளவில் போட்டியிடும் மறு ஏற்றுமதி மையமாக மாறும் என்றும், இந்தியாவின் துறைமுகம் சார்ந்த வளர்ச்சி உத்திக்கு முக்கிய தூணாக அமையும் என்றும் அவர் கூறினார். இந்த நிகழ்ச்சியில் கேரள முதலமைச்சர் பினராயி விஜயன், மத்திய அமைச்சர் சர்பானந்த சோனோவால், எதிர்க்கட்சித் தலைவர் வி.டி. சத்தீசன் உள்ளிட்டோர் கலந்துகொண்டனர்.

விழிஞ்சம் திட்டம் பல்வேறு அரசுகளின் அரசியல் தொலைநோக்குப் பார்வையின் தொடர்ச்சியைப் பிரதிபலிப்பதாகக் கரண் அதானி தெரிவித்தார். இத்திட்டத்திற்கு ஆரம்பக்காலத்தில் அடிக்கல் நாட்டிய முன்னாள் முதலமைச்சர் உம்மன் சாண்டியின் பங்களிப்பை அவர் நினைவுகூர்ந்தார். மேலும், கிரீன் ஃபீல்ட் உள்கட்டமைப்பு திட்டங்களைச் செயல்படுத்த அரசியல் தெளிவும், நிர்வாக அர்ப்பணிப்பும் அவசியமெனக் குறிப்பிட்டு, முதலமைச்சர் பினராயி விஜயனின் ஆதரவையும் அவர் பாராட்டினார்.

அரசியல் தலைவர்களால் வழங்கப்படும் இத்தகைய ஆதரவு குறித்துப் பேசிய கரண் அதானி, கேரளாவின் நீண்டகாலப் பொருளாதார முன்னுரிமைகள் குறித்த முதலீட்டாளர்களுக்கு இது ஓர் வலுவான சிக்னல் என்றார். உலகளாவிய கப்பல் போக்குவரத்து வரைபடத்தில் கேரளாவிற்கு ஒரு முக்கிய இடம் பெற்றுத் தந்ததில் இத்துறைமுகம் பெரும் பங்காற்றியுள்ளது என்றும் அவர் குறிப்பிட்டார்.

வர்த்தகச் செயல்பாடுகள் தொடங்கிய 15 மாதங்களுக்குள் ஒரு மில்லியன் TEU-களைக் கையாண்ட அதிவேக இந்தியத் துறைமுகமாக விழிஞ்சம் உருவெடுத்துள்ளது. இரண்டாம் கட்டப் பணிகள் நிறைவடைந்ததும், இந்தத் துறைமுகத்தின் கொள்ளளவு 1 மில்லியன் TEUகளிலிருந்து 2029க்குள் 5.7 மில்லியன் TEUகளாக உயரும். இதன் மூலம், இந்தியத் துணைக்கண்டத்தின் மிகப்பெரிய மறு ஏற்றுமதி துறைமுகமாகவும், நாட்டின் அதிநவீனத் துறைமுகங்களில் ஒன்றாகவும் விழிஞ்சம் மாறும் என எதிர்பார்க்கப்படுகிறது.

துறைமுக உள்கட்டமைப்பை விரிவுபடுத்துவது மட்டுமல்லாமல், நாட்டின் திறனை விரிவுபடுத்துவதாகவே விழிஞ்சம் திட்டம் அமையும் எனக் கரண் அதானி தெரிவித்தார். தொழில்நுட்பம், செயல்திறன் மற்றும் அளவு ஆகியவற்றில் எதிர்கால இந்தியத் துறைமுகங்களுக்கு விழிஞ்சம் ஒரு முன்மாதிரியாகச் செயல்படும் என்றார். மத்திய அரசின் துறைமுகம் சார்ந்த பொருளாதார வளர்ச்சி தொலைநோக்குப் பார்வையுடன் ஒத்துப்போகும் இந்தத் திட்டம், கூட்டாட்சிக்கு ஒரு வலுவான உதாரணமாகவும் கருதப்படுகிறது.

தனது உரையை முடித்த கரண் அதானி, கேரள அரசு, மத்திய அரசு, அரசியல் கட்சிகள் மற்றும் திருவனந்தபுரம், கேரள மக்கள் என அனைவருக்கும் அதானி குழுமத்தின் மீது வைத்துள்ள நம்பிக்கைக்காக நன்றி தெரிவித்தார். மேலும், நிறுவனம் தனது கொடுக்கப்பட்ட வாக்குறுதிகளைத் தொடர்ந்து நிறைவேற்றும் என்றும் அவர் உறுதியளித்தார்.

English summary

Vizhinjam port in Kerala advances to a second phase with a 16,000 crore rupee investment by APSEZ, lifting capacity from 1 million TEU to 5.7 million TEU by 2029 and reinforcing India’s coastal trade framework.